Það er óhætt að segja að algjör ringulreið ríki nú á íslenskum vinnumarkaði ef marka má þá holskeflu uppsagna sem nú ríður yfir íslenskan vinnumarkað.  Íslenskir launþegar vita vart hvaðan á sig stendur veðrið og ríkir ótti og angist víða í þjóðfélaginu vegna þeirra uppsagna sem nú dynja á landsmönnum.

Eins og fram kom hér á heimsíðunni í fyrradag þá óttaðist formaður félagsins að fleiri uppsagnir myndu líta dagsins ljós áður en mánuðurinn yrði allur, en á miðvikudaginn sl. var búið að tilkynna 42 einstaklingum um uppsögn í vikunni hér á Akranesi.  Í dag er þessi tala því miður komin uppí 63 einstaklinga.  Sem dæmi þá þurfti fyrirtæki sem tilkynnti á miðvikudaginn um uppsagnir á 13 starfsmönnum að segja upp 9 til viðbótar í dag.  Með öðrum orðum þá ríkir algjört panik hjá atvinnurekendum vegna þess ástands sem ríkir í efnahagslífi þjóðarinnar.

Formaður félagsins vill hvetja atvinnurekendur til að virða þær leikreglur og kjarasamninga sem gilda á íslenskum vinnumarkaði þegar staðið er að uppsögnum og breytingu á vinnutilhögun.  Sem dæmi þá ætlaði t.d. fyrirtæki að segja upp núverandi vaktakerfi og setja upp nýtt vaktakerfi með einungis nokkurra daga fyrirvara þótt kveðið sé á um að slíkt sé ekki hægt að gera með svo stuttum fyrirvara. 

Stjórn félagsins vill minna félagsmenn sína á að leita upplýsinga hjá félaginu ef þeir eru í minnsta vafa um að verið sé að ganga á kjarasamningsbundinn rétt þeirra.

Stjórn Verkalýðsfélags Akraness vill segja við ráðamenn þessarar þjóðar, vaknið, því íslenskum fyrirtækjum, launþegum og heimilum er að blæða út.  Stjórn félagsins vill ítreka að ríkisstjórn Íslands verður að koma fyrirtækjum,launþegum og heimilum landsins til hjálpar og það tafarlaust og það aðgerða- og úrræðaleysi sem blasað hefur við þjóðinni að undanförnu verður að heyra sögunni til.

Eins og fram hefur komið hér á heimasíðunni þá hefur Verkalýðsfélag Akraness lagt til að ríkisstjórn Íslands auki nú þegar aflaheimildir í þorski umtalsvert á yfirstandandi fiskveiðiári. Slík ákvörðun ætti alls ekki að stofna þorsksstofninum í neina hættu þótt slíkt væri gert í eitt fiskveiðiár eða svo.

Nú er ástandið með þeim hætti í íslensku atvinnulífi að stjórnvöld verða að koma með einhverjar lausnir til að skapa hér auknar gjaldeyristekjur og aukin störf handa verkafólki og sjómönnum.  Að auka aflaheimildir í þorski væri tilvalin leið til þess.

Nú hafa fleiri verið að þrýsta á stjórnvöld að auka aflaheimildir að undanförnu. Til að mynda hefur LÍÚ skorað á sjávarútvegsráðherra að auka þorskkvótann um 30 þúsund tonn. 

Á bæjarstjórnarfundi á þriðjudaginn var lögð fram tillaga til bæjarstjórnar sem hljóðaði eftirfarandi:

"Með hliðsjón af þeirri alvarlegu stöðu sem íslenska þjóðin stendur frammi fyrir nú um stundir, fyrirsjáanlegu atvinnuleysi og þrengingum, hjá bæði fjölskyldum og fyrirtækjum á næstu misserum, skorar bæjarstjórn Akraness á sjávarútvegsráðherra og ríkisstjórn Íslands að nú þegar verði auknar fiskveiðiheimildir.“  

Með tillögunni er gerð krafa um að aukningunni verði úthlutað til sveitarfélaga sem síðan ráðstafi aflanum til vinnslu innan síns sveitarfélags. Þannig verði stuðlað að minna atvinnuleysi, auknum útflutningstekjum og meiri umsvifum í þjóðfélaginu.  Formaður félagsins tekur undir með bæjaryfirvöldum að sveitarfélögum verði úthlutuð sú viðbót í þorski ef til aukningar kemur.