• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Subscribe to this RSS feed
20
 Apr

Samningur Norðuráls undirritaður í nótt

Klukkan 1 í nótt var undirritaður nýr kjarasamningur fyrir starfsmenn Norðuráls en þá hafði fundur staðið yfir samfleytt í tæpa 15 klukkutíma.

Meginkröfur stéttarfélaganna náðust fram í þessari mjög erfiðu kjaradeilu. Samningurinn mun gefa starfsmönnum á 1. ári 11,2% launahækkun, en inni í þeirri tölu er eingreiðsla upp á kr. 150.000 sem verður til greiðslu í maí 2010.

Heildarlaun vaktavinnumanna á 5 ára taxta í dag með öllu eru kr. 406.418. Þau munu hækka í kr. 439.418 eða sem nemur kr. 33.000 á mánuði. Laun eru að hækka um kr. 30.000 og upp í tæpar 34.000 kr. á mánuði. Samningurinn mun gilda frá 1. janúar 2010 til 31. desember 2014. Hafa ber það í huga að launaliðurinn verður laus um næstu áramót og verður þá samið um hvernig þróun launaliða skuli háttað á samningstímanum.

Eitt gríðarlega mikilvægt atriði náðist fram í þessum kjarasamningum, en það var að nú munu starfsmenn Norðuráls eiga verkfallsrétt eins og flestir aðrir launþegar þessa lands. En eins og flestir vita þá var gengið frá því í kjarasamningum 1998 að starfsmenn Norðuráls höfðu ekki slíkan rétt. Nú er, eins og áður sagði, búið að ná þessum rétti aftur inn og var það ekki átakalaust.

Á heildina litið er formaður Verkalýðsfélags Akraness mjög sáttur með þennan samning, enda náðust fram allflestar meginkröfur okkar eins og áður hefur komið fram. Þessi barátta hefur staðið yfir frá 30. október 2009 eða í tæpt hálft ár og er ein sú alerfiðasta kjaradeila sem formaður hefur tekið þátt í að leysa frá því hann tók við formennsku í Verkalýðsfélagi Akraness.

Nú er verið að undirbúa kynningar á þessum samningi og munu flestar kynningarnar fara fram á vinnustaðnum og í vinnutíma. Verður fyrsta kynningin á fimmtudagsmorgun kl. 06:00 og verða kynningar nánast linnulaust allan þann dag. Kynningar munu einnig fara fram á föstudag og mánudag og síðustu kynningarnar verða þriðjudaginn 27. apríl. Hægt verður að kjósa um samninginn að lokinni hverri kynningu fyrir sig og einnig hjá aðaltrúnaðarmanni.

Formaður félagsins vill fyrir hönd samninganefndarinnar þakka starfsfólki Ríkissáttasemjara fyrir frábær störf. Það er alveg ljóst að þar er mikið fagfólk á ferð enda voru öll vinnubrögð af hálfu starfsfólksins og sáttasemjara til mikillar fyrirmyndar í þessari erfiðu deilu.

Upplýsingar um tímasetningar allra kynninga sem framundan eru fyrir starfsfólk Norðuráls má finna hér. 

Hægt er að skoða meginniðurstöður samningsins með því að smella á meira.

Megin niðurstöður samningsins eru eftirfarandi:

·         4,7% grunnlaunahækkun frá 1. 1. 2010

·         3,75% hækkun á bónus frá 1.1. 2010 (hámarksbónus verður 11,25%)

.         Nýir bónusar bætast við í tengslum við ristíma og ristíðni

·         Bónus reiknast af föstum launum, þ.m.t. ferðapeningum

·         150.000 kr. eingreiðsla í maí 2010

·         Uppfærð slysa- og sjúkratryggingarákvæði til samræmis við almenna samninga

·         Aukin réttindi vegna veikinda barna

·         Norðurál mun greiða í starfsmenntasjóði og endurhæfingarsjóð

·         Verkfallsákvæði hefur verið tekið inn

·         Launaliðurinn gildir til eins árs, þ.e. til 31. des 2010

·         Samningurinn í heild sinni gildir til 31. des 2014

Fundur hjá Ríkissáttasemjara
19
 Apr

Fundur hjá Ríkissáttasemjara

Fundur hófst hjá Ríkissáttasemjara klukkan 09:00 í morgun vegna kjaraviðræðna við Norðurál. Þótt samkomulag hafi þegar tekist um ákveðin mikilvæg atriði í samningalotu síðustu viku, þá hefur ekki enn tekist að ná samkomulagi um stóra málið, launalið samningsins.

Miðað við viðbrögð forsvarsmanna Norðuráls í lok sáttafundar síðastliðinn föstudag þá var formaður félagsins ekki bjartsýnn fyrir fundinn í morgun. Krafa samninganefndar stéttarfélaganna er skýr og afar sanngjörn: að laun starfsmanna Norðuráls verði jöfnuð á við laun starfsmanna í sambærilegum stóriðjufyrirtækjum. Frá þessari kröfu verður ekki hvikað.

16
 Apr

13 tíma samningalotu lauk í gærkvöldi án samnings

Samningafundi sem stóð í nær 13 klukkustundir lauk hjá Ríkissáttasemjara á ellefta tímanum í gærkvöldi án þess að undirritaður væri nýr kjarasamningur við Norðurál.

Því miður náðist ekki að klára nýjan samning í gærkvöldi eins og vonir samninganefndarinnar stóðu til. Það sem út af stendur núna er launaliðurinn, en því miður ber enn töluvert á milli samningsaðila og það er dapurlegt að verða vitni að því að samningsvilji eigenda þessa fyrirtækis virðist því miður vera af skornum skammti.

Það liggur fyrir að launakjör starfsmanna Norðuráls eru mun lakari en hjá starfsbræðrum þeirra bæði hjá Elkem Ísland og Alcan og það er orðið tímabært að eigendur Norðuráls geri sér grein fyrir því að Verkalýðsfélag Akraness og samninganefndin í heild sinni mun ekki sætta sig við slíkan ójöfnuð.

Rétt er þó að geta þess að nokkur mikilvæg réttindamál áunnust í samningalotu gærdagsins, en aðalmálið sem er launaliðurinn virðist ætla að verða afskaplega þungur í skauti fyrir eigendur þessa fyrirtækis.

Ríkissáttasemjari hefur boðað til fundar á mánudaginn kl. 09:00 og það er öllum ljóst, bæði samninganefnd fyrirtækisins, samninganefnd stéttarfélaganna og Ríkissáttasemjara, að úrslitatilraun um hvort samningsaðilar leysa þessa deilu eður ei mun verða gerð á mánudaginn.

Því miður er formaður samninganefndar ekki bjartsýnn, miðað við viðbrögð eigenda fyrirtækisins í lok fundar í gær. En það er orðið tímabært að þeir menn sem ráða þessu ferli fari að opna augun fyrir því að það eru engar forsendur fyrir því að starfsmenn Norðuráls njóti lakari kjara en starfsmenn annarra sambærilegra verksmiðja.

Það mun aldrei líðast að rekinn verði einhver láglaunastefna í stóriðjum þessa lands. Álverðið í dag er 2.400 dollarar, gengi dollars gagnvart íslensku krónunni er útflutningsfyrirtækjum afar hagkvæmt og rekstur Norðuráls frá upphafi hefur skilað eigendum þessa fyrirtækis tugum milljarða í hagnað. Á þessum forsendum munu stéttarfélögin alls ekki hvika frá sinni sanngjörnu kröfu um jöfnun launa á við önnur stóriðjufyrirtæki.

Fyrri úthlutun sumarsins 2010 lokið
15
 Apr

Fyrri úthlutun sumarsins 2010 lokið

Fyrri úthlutun orlofshúsa sumarið 2010 er nú lokið og gekk vonum framar. Í fyrsta sinn var nú hægt að skila umsóknum á Félagavefnum og bárust um helmingur umsókna á þann hátt sem er mun hærra hlutfall en vonast var eftir.

Svarbréf til allra umsækjenda, hvort sem þeir fengu úthlutað eða ekki, voru póstlögð í gær. Þeir sem fengu úthlutað geta nú þegar séð bókun sína á Félagavefnum (undir Orlofshús og Bókunarsaga) og geta á sama stað greitt með greiðslukorti. Einnig er hægt að ganga frá greiðslu með millifærslu í heimabanka eða á skrifstofu félagsins. Ganga verður frá greiðslu fyrir eindaga sem er 23. apríl.

Eftir eindaga verða ógreiddar bókanir felldar niður og teknar til endurúthlutunar. Allir þeir sem ekki fengu úthlutað í fyrri úthlutun eru sjálfkrafa með í endurúthlutun og einnig geta þeir sem voru seinir fyrir skilað inn umsókn. Þeim sem eiga inni umsókn í endurúthlutun er bent á að hægt er að breyta umsókninni fyrir endurúthlutunina til að auka möguleika á að fá úthlutað. Nú þegar er hægt að sjá á Félagavefnum (undir Orlofshús og Laus orlofshús) hvaða vikur gengu ekki út í fyrri úthlutun. Eftir eindaga, 23. apríl, mun þessum lausu vikum fjölga umtalsvert þegar búið er að fella niður ógreiddar bókanir.

Frestur til að skila nýjum eða breyttum umsóknum í endurúthlutun er til miðnættis 28. apríl. Endilega hafið samband við skrifstofu ef aðstoðar er þörf við umsóknarferlið eða ef spurningar vakna við notkun Félagavefsins..

14
 Apr

Úrslitastund á morgun

Á morgun rennur upp úrslitastund varðandi hvort deiluaðilar vegna kjarasamnings Norðuráls muni ná saman eða ekki en ríkissáttasemjari hefur boðað til fundar kl. 10 í fyrramálið.

Það er alveg ljóst að ennþá ber töluvert í milli samningsaðila í stórum málum og nægir að nefna í því samhengi launaliðinn en ljóst er samkvæmt því tilboði sem forsvarsmenn Norðuráls hafa lagt fram að umtalsverður munur er ennþá á milli deiluaðila. Eins og margoft hefur komið fram hér á heimasíðunni er meginkrafa samninganefndar stéttarfélaganna að starfsmenn Norðuráls njóti sömu kjara og starfsbræður þeirra í Alcan í Straumsvík.

Það er einnig ljóst að frá þessari kröfu um jöfnun launa við verksmiðjur í sambærilegum iðnaði verður ekki hvikað. Með öðrum orðum: Það verður ekki skrifað undir kjarasamning þar sem jöfnun launa er ekki að eiga sér stað. Þessu sjónarmiði hefur margoft verið komið fram við forsvarsmenn fyrirtækisins og ríkissáttasemjara er það kunnugt enda eru engar forsendur fyrir því að starfsmenn Norðuráls njóti lakari kjara heldur en aðrir starfsmenn í sambærilegum iðnaði.

Árið 2008 höfðu greiningardeildir bankanna áhyggjur af kjarasamningum á hinum almenna vinnumarkaði
13
 Apr

Árið 2008 höfðu greiningardeildir bankanna áhyggjur af kjarasamningum á hinum almenna vinnumarkaði

Formaður Verkalýðsfélags Akraness og Aðalsteinn Baldursson, formaður Framsýnar stéttarfélags á Húsavík voru í útvarpsviðtali í Íslandi í bítið í morgun þar sem skýrsla Rannsóknarnefndar Alþingis var til umfjöllunar.

Fram kom í máli formanns félagsins að honum væri það minnistætt þegar verið var að ganga frá kjarasamningi á hinum almenna vinnumarkaði árið 2008, þá heyrðust varnaðarorð frá greiningardeildum bankanna. Byggðust þau varnaðarorð á því að launafólk þyrfti að semja með hófstilltum hætti til að ná tökum á verðbólgunni og stuðla að stöðugleika til lengri tíma litið.

Þetta sögðu snillingarnir sem voru í greiningardeildum bankanna í byrjun árs 2008, með öðrum orðum var aðalmálið hjá þeim að vara verkalýðshreyfinguna við að fara fram á miklar launabætur til handa sínu fólki. Á sama tíma var verið að ræna bankana innan frá en aðaláhyggjur greiningadeildanna voru launahækkanir verkafólks.

Græðgin var allsráðandi í bankakerfinu og nægir að nefna eins og fram kemur í rannsóknarskýrslunni að ráðningarsamningur Lárusar Welding var metinn á 5,1 milljarð króna. Ekki má gleyma launakjörum Bjarna Ármannssonar en á árinu 2004 var hann með 9 milljónir á mánuði en einungis þremur árum seinna voru launin orðin 50 milljónir á mánuði. Þetta kallar maður alvöru starfsaldurshækkun.

Krafan er skýr frá íslensku verkafólki: að þeir aðilar sem bera ábyrgð á þessum hlutum verði látnir sæta þeirri ábyrgð og það eins fljótt og kostur er. Grundvallaratriðið er að eigur þessara manna sem bera ábyrgð á þessu verði frystar hið snarasta á meðan á rannsókninni stendur. Það er óþolandi að verða vitni að því eins og fram kemur í rannsóknarskýrslunni að Lárus Welding tæmdi bankareikning sinn, 318 milljónir, á sama tíma og hann sagði við alþjóð að allt væri í stakasta lagi í bankanum. Þetta gerðu Elín Sigfúsdóttir og Sigurjón Þ. Árnason, bankastjórar hjá Landsbankanum einnig en þau komu greiðslum í séreignalífeyrissjóðum sínum í skjól. Fram kemur einnig í rannsóknarskýrslunni að margir af æðstu stjórnendum bankanna hafi verið að setja eigur sínar yfir á maka sína, augljóslega til að reyna að skjóta einhverju undan.

Page 247 of 485

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image