• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
08
Mar

Lágmarkslaun væru 24.000 kr. hærri á mánuði, hefðu þau fengið sömu prósentuhækkanir og þingfarakaupið á síðustu 10 árum

Í samantekt sem VLFA hefur gert kemur fram að þingfarakaupið hefur hækkað um 40% meira heldur en lágmarkslaun á tímabilinu 1997 til ársins 2007.

Árið 1997 voru lágmarkslaun 61.000 kr. en í dag eru þau 125.000 og hafa því hækkað um 64.000 kr á mánuði eða um 105%. 

Athyglisvert er að sjá hversu miklu hærri prósentuhækkanir hafa komið til þingmanna heldur en verkfólks sem starfar eftir lágmarkslaunum á síðustu 10 árum.

Árið 1997 var þingfarakaupið 212.000 kr. en í dag er það 518.000 kr. og hefur hækkað um 306.000 kr á mánuði eða sem nemur 145%.

Einstaka þingmönnum hefur verið tíðrætt um að lægstu launin hafi hækkað verulega hér á landi á undanförnum árum nægir þar að nefna þingmenn eins og Pétur Blöndal og Einar Odd Kristjánsson í því samhengi. 

Staðreyndin er hins vegar sú að laun þingmanna hafa hækkað um 306 þúsund á mánuði á meðan lægstu launin hafa einungis hækkað um 64 þúsund.  Þingfarakaupið hefur eins og áður sagði hækkað um 40% meira heldur en lægstu launin.

Ef lægstu launin hefðu fengið sömu prósentuhækkun og þingmenn á umræddu tímabili þá væru lágmarkslaunin ekki 125.000 eins og þau eru í dag heldur 149.000 og munar þar um 24.000 á mánuði.

Vissulega þarf verkalýðshreyfingin að skoða nánar hvort hún eigi að taka upp krónutöluhækkanir handa þeim sem lægstu hafa launin.  Það er eðli málsins samkvæmt ekki sama hvort þriggja prósenta hækkun leggst ofaná 125.000 lágmarkslaun  eða þingfarakaup sem nemur 518.000.  Við slíka 3% hækkun myndu lágmarkslaunin hækka einungis um 3.750 á meðan þingfarakaupið myndi hækka um 15.540, munurinn er 11.790.  Prósentuhækkanir gera lítið ekkert annað en að auka á það launamisrétti sem ríkir í þessu landi.

Formaður félagsins ætlar ekki að leggja mat á hvort þingfarakaupið sé of hátt eða ekki og ugglaust vinna langflestir þingmenn vel fyrir sínum launum, enda ábyrðarfullt starf að vera þingmaður. 

Staðreyndin er hins vegar sú að lágmarkslaun hafa fengið 40% minni hækkun á síðustu tíu árum sé tekið mið af þingfarakaupinu.  Það er hollt fyrir þá þingmenn sem tala ætíð um að lægstu launin hafi hækkað mikið á undaförnum árum, að minnast að þeir hafa sjálfir fengið 40% meiri hækkun en verkafólk sem tekur laun eftir lágmarkslaunum.

07
Mar

Orlofshús - Sumar 2007

Þessa dagana stendur undirbúningur fyrir sumarorlofstímann sem hæst á skrifstofu félagsins og ættu félagsmenn að fá umsóknareyðublað og bækling um sumarleiguna inn um lúgu sína í kringum 20. mars. 

  Í sumar verður sem fyrr boðið upp á dvöl í orlofshúsum félagsins í Húsafelli, Svínadal, Hraunborgum, Ölfusborgum og í þremur íbúðum á Akureyri. Einnig er félagið með í leigu íbúð í Stykkishólmi (nánari upplýsingar hér), bústað að Eiðum (nánari upplýsingar hér) og nýr möguleiki í sumar er bústaðurinn Bláfell í Koðrabúðum á landi Heiðar í Biskupstungum (nánari upplýsingar hér).

Helstu dagssetningar:

13. apríl - Frestur til að skila inn umsóknum um orlofshús í sumar

20. apríl - Fyrri úthlutun fer fram, þeir sem fá úthlutað fá það staðfest með bréfi

02. maí  - Eindagi fyrri úthlutunar, þeim vikum sem ekki eru greiddar á eindaga er úthlutað aftur

10. maí  - Endurúthlutun fer fram, þeir sem fá úthlutað fá það staðfest með bréfi

16. maí  - Eindagi endurúthlutunar

18. maí  - Fyrstur kemur, fyrstur fær! Lausum vikum er úthlutað til þeirra sem fyrstir koma

  Úthlutun fer þannig fram að allar umsóknir eru skráðar inn í tölvukerfi félagsins. Kerfið raðar öllum umsóknum í röð eftir punktastöðu, þ.e. þeir umsækjendur sem flesta hafa punktana eru fremstir í röðinni og svo koll af kolli. Ef punktar tveggja eru jafnir fær sá úthlutað sem fyrr sótti um. Kerfið vinnur sig síðan í gegnum umsóknirnar og úthlutar vikum eftir punktastöðu.

  Þeir sem ekki fá úthlutað í fyrri úthlutun lenda sjálfkrafa í endurúthlutun þar sem þeim vikum er úthlutað sem ekki voru greiddar á eindaga fyrri úthlutunar. Eftir eindaga endurúthlutunar verða lausar vikur auglýstar hér á heimasíðunni og hægt verður að sækja um þær á skrifstofu félagsins. Gildir þá hin ágæta regla: Fyrstur kemur, fyrstur fær.

06
Mar

Stóraukin þjónusta við félagsmenn

Stjórnir orlofs- og sjúkrasjóðs funduðu í gærkveldi.  Það liggur þónokkuð fyrir hjá orlofsstjórn þar sem töluverðar endurbætur eru framundan á orlofshúsum félagsins.

Ákveðið hefur verið að stækka svalir á þremur íbúðum sem félagið á að Furulundi 8 á Akureyri og hefjast þær framkvæmdir í haust.  Einnig var ákveðið að mála sumarhúsin í Húsafelli og í Svínadal og stefnt er að þeim framkvæmdum verði lokið fyrir sumarúthlutun 15. maí.

Þessu til viðbótar hefur verið ákveðið að skipta um eldúsinnréttingar í Hraunborgum og Svínadal og stefnt er að því að þeim framkvæmdum verði einnig lokið fyrir 15. maí.

Eins og áður sagði þá fundaði stjórn sjúkrasjóðs einnig í gærkveldi og liggur ljóst fyrir að félagið mun taka inn allavega þrjá nýja styrki á næsta aðalfundi, sem verður um miðjan apríl.

Það er alveg ljóst að gríðarleg umskipti hafa orðið á rekstri félagsins á þeim þremur árum sem ný stjórn tók við og sést það best á þeirri stórauknu þjónustu nú er verið að veita félagsmönnum. 

Markmið núverandi stjórnar hefur ávallt verið skýrt, það er að þjóna okkar félagsmönnum eins vel og kostur er.

05
Mar

Fiskvinnslufólk vill bónusinn inní launataxtana

Starfsgreinasamband Íslands hélt ráðstefnu um “kaupaukakerfi í fiskvinnslu” á Íslandi, kosti og galla launakerfisins og vinnuverndarsjónmarmið með tilliti til aukinnar tækni og hraða vinnslunnar. Ráðstefnan var notuð til að móta hugmyndir að kröfugerð fyrir næstu kjarasamninga.

Það var alveg ljóst að fiskvinnslufólk gerir miklar væntingar til næstu kjarasamninga enda telur það sig hafa borið skarðan hlut frá síðustu kjarasamningum.

Það virðist vera nokkuð víðtæk sátt hjá fiskvinnslufólki að færa hina ýmsu kaupaukagreiðslur fiskvinnslufólks inní launataxtanna.  Samkvæmt þeim upplýsingum sem VLFA hefur er meðaltalsbónus hjá fiskvinnslufólki í kringum 200 til 230 kr. á tímann. 

Einnig kom fram á ráðstefnunni að það verður að vera eitt af forgangskröfum í næstu samningum að verja markaðslaunakerfið.  Voru ráðstefnugestir sammála um það verði gert með því að færa launataxtana upp að markaðslaunum.

02
Mar

Orlofshús Verkalýðsfélags Akraness – Páskar 2007

Nú er opið fyrir umsóknir um dvöl í orlofshúsum félagsins yfir páskana. Tekið verður á móti umsóknum til og með 9. mars 2007 á skrifstofu félagsins, Sunnubraut 13, sími 4309900.

Dregið verður úr umsóknum 12. mars og haft samband við þá sem fá úthlutað. Eins og með aðra vetrarleigu hefur páskaúthlutun ekki áhrif á punktastöðu félagsmanna.

Orlofshús til útleigu um páska 2007:

Bláskógar 12, Svínadal

Ásendi 10, Húsafelli

Húsasund 15, Hraunborgum

Hús nr.11, Ölfusborgum

Laufásvegur 31, Stykkishólmi

Furulundur 8a, Akureyri

01
Mar

Framtalsaðstoð félagsins hefst í næstu viku

Framtalsaðstoð félagsins hefst mánudaginn 5. mars nk. Takmarkaður fjöldi tíma er í boði svo félagsmenn eru beðnir að panta sem fyrst. Nauðsynlegt er að hafa öll gögn og veflykil meðferðis, starfsfólk skrifstofu getur aðstoðað við að útvega nýjan veflykil hafi hann glatast.

Hægt er að bóka tíma á skrifstofu félagsins, Sunnubraut 13, sími 4309900

Fréttir

Style Switcher
Layout Style
Predefined Colors
Background Image