AkraneshöfnÍ gær var haldinn aðalfundur sjómannadeildar Verkalýðsfélags Akraness. Á dagskrá fundarins var meðal annars að kjósa í stjórn sjómannadeildar og ein breyting varð í stjórn deildarinnar en Guðlaugur Elís Jónsson, skipverji á Ingunni AK, kom inn í stjórnina. 

Það sem bar hæst á fundinum var eðli málsins samkvæmt kjaradeila sjómanna við LÍÚ en nú er að verða liðið eitt ár frá því að kjarasamningur sjómanna rann út. Sáralitlar viðræður hafa átt sér stað á milli Sjómannasambands Íslands, sem fer með samningsumboð fyrir hönd félagsins, og LÍÚ. Ástæðan er einföld, Friðrik J. Arngrímsson, framkvæmdastjóri LÍÚ hefur gefið það út að á meðan óvissa ríki um fiskveiðistjórnunarkerfið verði ekki samið við sjómenn. Þetta er að mati fundarmanna algjörlega óásættanlegt, að halda kjarasamningum sjómanna í herkví vegna ágreinings útgerðarmanna við stjórnvöld.  Hins vegar voru fundarmenn sammála um það að það sé ámælisvert af stjórnvöldum hversu lengi það hefur dregist að leggja fram breytingar á fiskveiðistjórnunarkerfinu og lögðu fundarmenn ríka áherslu á það að í fyrirhuguðum breytingum á fiskveiðistjórnunarkerfinu verði hagsmunir sjómanna og fiskvinnslufólks algjörlega hafðir að leiðarljósi við þær breytingar.

Fundarmenn fordæmdu einnig stjórnvöld fyrir að afnema sjómannaafsláttinn í þrepum eins og nú er verið að gera enda er sjómannaafslátturinn búinn að vera hluti af kjörum sjómanna í tugi ára og því munu sjómenn alls ekki sætta sig við að sjómannaafslátturinn verði þurrkaður út án þess að sambærilegar bætur komi í staðinn fyrir hann. Það er með ólíkindum ef sjómenn eiga að vera eina stéttin í þessu landi sem til að mynda á ekki rétt á skattfrjálsum dagpeningum eins og allar aðrar stéttir þessa lands eiga rétt á.

Það kom einnig fram hjá sjómönnum að það verði að finna ásættanlega aðferðafræði við verðlagningu á öllum fiski, þar með talið uppsjávarfiski, en sjómönnum finnst oft á tíðum það afar undarlegt hvernig útgerðin hefur fengið að komast upp með að verðleggja sínar afurðir á hverjum tíma fyrir sig. Það verður ekki gengið frá kjarasamningum nema þessir hlutir verði komnir í ásættanlegt horf.

Það er náttúrulega eins og áður hefur komið fram algjörlega með ólíkindum að sjómenn skuli vera búnir að vera samningslausir í heilt ár. Rétt er samt að geta þess að kauptrygging hækkaði um 4,25% í sumar og er það í raun og veru það eina sem hefur gerst í þessum kjaraviðræðum. En nú er farið að gæta óþreyju hjá sjómönnum um að fara að klára þennan kjarasamning og skorar sjómannadeild Verkalýðsfélags Akraness á LÍÚ að setjast nú niður með sjómönnum og ganga frá nýjum kjarasamningi hratt og vel.

Rétt fyrir jól náði Verkalýðsfélag Akraness ásamt þeim félögum sem eiga aðild að kjarasamningi við Norðurál samkomulagi vegna ágreinings sem laut að því að starfsmenn sem ráðnir voru til afleysinga í orlofi hafa ekki verið að fá greiddan fullan bónus fyrr en eftir 4 mánuði í starfi.

Samningsaðilar fóru yfir þessa framkvæmd og benti Verkalýðsfélag Akraness á að ekki hafði verið rætt sérstaklega um þessa takmörkun á bónusgreiðslum til afleysingamanna þegar umfangsmiklar breytingar voru gerðar á bónuskerfinu í kjarasamningnum sem tók gildi 1. janúar 2010. Ekkert var getið um slíka takmörkun á bónusgreiðslum til afleysingamanna í þeim kjarasamningi. Voru samningsaðilar sammála um að vafi léki á hvort heimilt hafi verið að greiða ekki umræddum starfsmönnum fulla hlutdeild í árangri en Norðurál byggði sína framkvæmd á samkomulagi sem undirritað var af fyrrverandi trúnaðarmanni frá árinu 2000.

Samningsaðilar gengu frá samkomulagi um að frá og með 1. janúar 2012 breytist framkvæmd greinarinnar 3.14 í kjarasamningi þannig að allir starfsmenn eigi rétt á fullri hlutdeild í árangri frá upphafi ráðningar. Jafnframt er samkomulag um að starfsmenn sem ekki fengu greidda fulla hlutdeild í árangri frá 1. janúar 2010 og út árið 2011 fái greidda eingreiðslu sem svari til mismunar á greiddri hlutdeild annars vegar og fullri hlutdeild í árangri hins vegar sem greidd var á starfstíma árin 2010 og 2011. Áætlað er að kostnaður Norðuráls vegna þessarar leiðréttingar sé um 8 milljónir fyrir hvort ár fyrir sig eða samtals um 16 milljónir króna. Uppgjör fer fram samhliða launaútborgun 31. janúar 2012.

Formaður er afar ánægður með þetta samkomulag og sérstaklega í ljósi þess að ekki hafi þurft að koma til þess að málið færi fyrir félagsdóm. Hér er um umtalsverða kjarabót að ræða fyrir alla þá starfsmenn sem eru ráðnir til afleysinga því nú munu þeir framvegis njóta fulls bónus en ekki með takmörkunum eins og framkvæmdin var áður.