Í gær fóru um 100 eldri félagsmenn Verkalýðsfélags Akraness í dagsferð í boði félagsins. Í þetta sinn var farið um Reykjanesið og heppnaðist ferðin afskaplega vel. Veðrið lék við ferðalangana sem í fylgd Jóhönnu Þórarinsdóttur leiðsögumanns skoðuðu sig um á svæðinu.

Steinunn Kolbeinsdóttir við myndina

Þegar leiðsögumaðurinn var komin upp í rútuna í Keflavík var ekið sem leið lá yfir Miðnesheiði. Fyrsti áfangastaður var Hvalsneskirkja þar sem fróðleikur var fenginn um kirkjuna sjálfa og Hallgrím Pétursson sem var prestur þar um tíma. Síðan var ekið um Romshvalanes í gegnum Sandgerði út í Garð þar sem Byggðasafnið á Garðsskaga var skoðað. Þar er einnig mikið vélasafn sem vakti athygli margra. Sérstaklega er skemmtilegt að minnast þess að á byggðasafninu rákust ferðalangarnir óvænt á málverk af Steinunni Kolbeinsdóttur sem einmitt var með í för. Málverkið var gert árið 1940 eftir ljósmynd af Steinunni þar sem hún situr við rokkinn sinn.

Eftir áhugavert stopp á Garðsskaga var ekið til Keflavíkur þar sem boðið var upp á hádegisverð á veitingastaðnum Ránni. Að hádegisverði loknum var farið Reykjaneshringinn, ekið um Hafnir, Álfubrúin, Reykjanesviti og Valahnúkur skoðaður og stoppað við Gunnuhver. Þaðan var ekið framhjá Grindavík og í Bláa Lónið þar sem boðið var upp á kaffi og meðlæti áður en lagt var af stað upp á Skaga.

Myndir frá ferðinni verða settar inn á síðuna von bráðar.

Stjórn Verkalýðsfélags Akraness samþykkti á stjórnafundi í gærkveldi að styrkja unglingastarf SÁÁ um 100.000 kr. 

Rökin fyrir því að Verkalýðsfélag Akraness skuli telja sér það skylt að styðja við bakið á unglingastarfi SÁÁ blasa raunar allstaðar við.  Tugir einstaklinga af okkar félagssvæði sem hafa átt um sárt að binda sökum ofneyslu áfengis eða fíkniefna hafa notið aðstoðar og hjálpar SÁÁ .

Stjórn Verklýðsfélags Akraness er stolt af því að geta lagt unglingastarfi SÁÁ lið í því góða starfi sem þar er unnið.