Í nótt landaði Lundey frá Vopnafirði 150 tonnum af kolmunna hér á Akranesi. Skipið varð fyrir einhverri bilun og gat því ekki klárað túrinn að fullu.

Hins vegar kom Faxinn strax í kjölfarið með um 1600 tonn af kolmunna sem er fullfermi. Stendur nú vinnsla í verksmiðju Síldarbræðslunnar á fullu yfir.  Ingunn Ak er nú á miðunum og samkvæmt upplýsingum sem formaður hefur fengið þá var Ingunin komin með rúm 400 tonn af kolmuna í gær.  Skipin eru að veiðum á Rockhallsvæðinu.

Verksmiðjan hér á Akranesi er ein fárra verksmiðja á landinu sem getur framleitt hágæðamjöl og samkvæmt starfsmönnum hefur nánast allt hráefni sem borist hefur til verksmiðjunnar að undanförnu farið í hágæðamjöl en slík afurð er mun auðseljanlegri en standard mjöl og einnig fæst betra verð fyrir hágæðamjölið en standard mjölið.

Verkalýðsfélag Akraness ásamt starfsmönnum Spalar gengu frá fyrirtækjasamningi fyrir nokkrum dögum á milli Spalar ehf. annars vegar og starfsmanna í gjaldskýli hins vegar.

Fyrirtækjasamningurinn hefur sama gildistíma og kjarasamningurinn á hinum almenna vinnumarkaði eða til 30. nóvember 2010.

Heildarhækkun launa starfsmanna gjaldskýlisins í nýjum samningi er um 32 þúsund krónur á mánuði.  Einnig hækkuðu orlofs- og desemberuppbætur umtalsvert.

Starfsmenn eru nokkuð vel sáttir við nýgerðan samning, þótt vissuleg hafi gengisfall krónunar og hækkun verðbólgunnar sett strik í reikninginn hvað varðar ávinning af nýgerðum samningi.