• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Subscribe to this RSS feed
10
 May

Fundað hjá Ríkissáttasemjara

Formaður fundaði með forsvarsmönnum Samtaka atvinnulífsins vegna kjarasamnings á hinum almenna vinnumarkaði hjá Ríkissáttasemjara í gær. Formaður lagði fram tillögu að breytingu á þeim kjarasamningi sem ASÍ undirritaði við SA fyrir síðustu helgi. Þær breytingar sem um ræðir er að lágmarkskauptrygging fari strax í 200.000 við undirritun samnings og einnig að fiskvinnslufólk færist upp um 2 launaflokka sökum góðrar stöðu þeirrar greinar um þessar mundir.

Það er skemmst frá því að segja að þessum tillögum var snarlega hafnað og er staða félagsins afar takmörkuð í ljósi þess sem áður hefur komið fram hér að 99% verkalýðshreyfingarinnar hefur nú gengið frá samningum á hinum almenna vinnumarkaði og því staðan lítil sem engin til sóknarfæra.

Formaður á von á því að gengið verði endanlega frá samningi á hinum almenna vinnumarkaði á fimmtudaginn en áður en af því getur orðið þarf að ganga frá fyrirtækjasamningi fyrir starfsmenn ISS sem rann út 31. desember 2007 og ekki hefur tekist að semja um þrátt fyrir ítrekaðar tilraunir.

Í gær var einnig til umræðu kjarasamningur fiskimjölsverksmiðjunnar og verður væntanlega undirritaður samhliða kjarasamningi á hinum almenna vinnumarkaði.

06
 May

Ótrúleg bókun milli ASÍ og SA

Eins og fram hefur komið margoft hér á heimasíðunni þá hefur félagi barist fyrir því að útflutningsfyrirtæki eins og t.d öll álfyrirtækin og önnur fyrirtæki starfandi í útflutningi skili meiri launahækkun til sinna starfsmanna en greinar sem eiga í erfiðleikum eins og t.a.m. byggingariðnaðurinn.

Þetta tókst eins og áður hefur komið fram hér á heimasíðunni gagnvart Elkem Ísland en félagið á eftir að ganga frá launalið fyrir starfsmenn Norðuráls sem rann út um áramótinn. Þess vegna vakti það forundrun formanns að lesa bókun sem aðildarfélög ASÍ skrifuðu undir í gær, en þar segir m.a. um Sameiginlega launastefnu ASÍ og SA:

 

"Almennar launahækkanir verða samtals 11,40% á samningstímanum. Sérstök hækkun kauptaxta er láglaunaaðgerð sem hækkar launakostnað misjafnlega eftir því hve margir taka laun skv. kauptöxtum. Framangreind niðurstaða kjarasamninga felur í sér að mótuð hefur verið sameiginleg og samræmd launastefna gagnvart þeim fjölmörgu samningum sem enn eru ógerðir á samningssviði aðila. Samningsaðilar skuldbinda sig til þess að framfylgja framangreindri launastefnu í framhaldinu"

Er það virkilega þannig að aðildarfélög ASÍ séu búin að skuldbinda sig til að ganga frá öllum kjarasamningum sem ógerðir eru í anda þess samnings sem gerður var á hinum almenna vinnumarkaði? Þýðir það t.d. fyrir þau félög sem eiga aðild að Norðurálssamningnum með VLFA að þau séu búin að skuldbinda sig til þess að semja ekki um meiri hækkanir á launaliðnum en sem nemur 11,4% til næstu þriggja ára? Eru stéttarfélögin búin að skuldbinda sig til að ganga frá launalið Norðuráls uppá 11,4% en ekki uppá 26% eins og starfsmenn Elkem fengu?  Ef það er raunin, eins og reyndar kemur fram í þessari bókun sem hér var vitnað í, þá er það eitthvað sem flokkast undir stórfellt skemmdarverk.

05
 May

Annríki í kjarasamningsgerð framundan

Húsakynni ríkissáttasemjaraHúsakynni ríkissáttasemjaraFormaður fundaði með starfsmönnum Klafa í gær og voru skilaboðin alveg skýr frá starfsmönnum: að þær launahækkanir sem um var samið hjá Elkem komi að öllu leyti yfir til Klafa. Klafi er í eigu Elkem Ísland og Norðuráls og því telja starfsmenn engar forsendur fyrir því að það eigi að skilja þá eftir í komandi kjaraviðræðum.

Á morgun mun formaður funda hjá ríkissáttasemjara vegna kjarasamnings á hinum almenna vinnumarkaði ásamt stéttarfélaginu Framsýn frá Húsavík. Einnig hefur formaður óskað eftir að fundað verði vegna launaliðar Norðuráls en hann var laus um áramótin og hafa viðræður legið niðri að undanförnu sökum þess álags sem verið hefur vegna annarra kjarasamninga. Einnig vildi Verkalýðsfélag Akraness klára samninginn við Elkem Ísland sem klárlega verður hafður til hliðsjónar þegar viðræður við forsvarsmenn Norðuráls hefjast að nýju.  

04
 May

Fundað með starfsmönnum Klafa

Verksmiðjur Elkem og Norðuráls á GrundartangaVerksmiðjur Elkem og Norðuráls á GrundartangaFundað var vegna kjarasamnings Klafa hjá ríkissáttasemjara í gær. Ekkert markvert kom fram á fundinum en fulltrúar SA og fyrirtækisins óskuðu eftir því að lokið yrði við kjarasamning á hinum almenna vinnumarkaði, sem væri í raun og veru í lokaferli, áður en haldið yrði áfram með kjarasamningsviðræður vegna Klafa. 

Félagið féllst á þessa ósk Samtaka atvinnulifsins í ljósi þess að kjarasamningsviðræður á milli ASÍ og SA voru komnar á fulla ferð og því erfitt að ganga frá kjarasamningi við þær aðstæður. Hins vegar gerði formaður VLFA Samtökum atvinnulífsins það alveg ljóst að starfsmenn Klafa, sem er í eigu útflutningsfyrirtækjanna Elkem og Norðuráls, gera þá skýlausu kröfu að þeir fái sömu launahækkanir og um var samið við Elkem Ísland. Er ljóst að starfsmenn muni ekki víkja frá þeirri kröfu enda engar forsendur fyrir slíku þar sem starfsmenn Klafa eru fyrrverandi starfsmenn Elkem Ísland og það væri í raun og veru nöturlegt ef ætti að fara að skilja þennan hóp starfsmanna eftir varðandi sambærilegar launahækkanir og um var samið fyrir starfsmenn Elkem.

Starfsmenn Klafa hafa óskað eftir að funda með formanni VLFA vegna þessarar stöðu og verða fundirnir í dag, fyrri fundurinn kl. 13 og síðari fundurinn verður kl. 16:40. Þar verður farið yfir þessa stöðu en það er alveg ljóst að starfsmenn ætla að senda félaginu skýr skilaboð um það að þeir muni aldrei sætta sig við neitt annað en að fá að njóta sömu launahækkana og starfsmenn Elkem.

Yfir 200 manns mættu á baráttufund vegna 1. maí
02
 May

Yfir 200 manns mættu á baráttufund vegna 1. maí

Gríðarleg stemmning var á baráttufundi vegna 1. maí hátíðarhaldanna sem stéttarfélögin á Akranesi stóðu fyrir í gær. Farin var kröfuganga sem fjölmargir tóku þátt í. Að aflokinni kröfugöngu hófust hátíðarhöld í sal Verkalýðsfélags Akraness þar sem formaður VLFA hélt ávarp en Stefán Skafti Steinólfsson, verkamaður í Elkem Ísland, hélt hátíðarræðuna í tilefni dagsins. Grundartangakórinn tók nokkur lög við texta eftir gamla snillinginn Theódór Einarsson og féllu þau í góðan jarðveg á meðal fundargesta.

Formaður Verkalýðsfélags Akraness kom víða við í sinni ræðu og gagnrýndi meðal annars Samtök atvinnulífsins harðlega fyrir þá sérhagsmuangæslu sem þeir hafa ástundað fyrir LÍÚ og að Samtök atvinnulífsins séu búin að halda kjarasamningum í herkví í eina fimm mánuði. Fram kom í ræðu formanns meðal annars eftirfarandi:

Ágætu félagar.

Ég veit vel að Samtök atvinnulífsins eru ekkert ýkja ánægð með þá stefnufestu sem VLFA hefur sýnt í mörgum málum. Og sem dæmi þá gagnrýndi Vilhjálmur Egilsson, framkvæmdastjóri SA, mig harkalega í viðtali á Bylgjunni í þættinum Ísland í bítið á föstudaginn. Hann kallaði mig meðal annars „korter í þrjú gæjann“. Ekki veit ég hvað hann á við blessaður. Kannski sér hann eftir dansinum sem ég bauð honum uppí þegar ég samdi um góðan samning fyrir starfsmenn Elkem og telur sig núna hafa verið misnotaður! Hver veit?

 

Að öllu gríni slepptu þá lít ég á það sem hól þegar Samtök atvinulífsins gagnrýna mig.  Hins vegar skil ég vel að Vilhjálmur Egilsson og SA pirrist yfir störfum Verkalýðsfélags Akraness. Auðvitað fer það í taugarnar á SA að félagið náði að landa samningi við Elkem Ísland langt umfram það sem til stóð að semja á hinum almenna vinnumarkaði.  En þetta þurfti félagið meðal annars að gera í reykfylltu bakherbergi með forsvarsmönnum fyrirtækisins án vitneskju Samtaka atvinnulífsins.

Að afloknu ávarpi formanns kom Stefán Skafti Steinólfsson og hélt mjög fína barátturæðu en í ræðu hans kom meðal annars eftirfarandi fram:

Atvinnurekendur nota ástandið markvisst til að níðast á verkafólki.

Var það ekki Akraneskaupstaður sem reið á vaðið og bauð út ræstingar í leikskólum...Eins og venjulega er ráðist á lítlmagnann þegar EXCEL kynslóðin ætlar að spara. Hver er sparnaðurinn fyrir samfélagið þegar upp er staðið.

Að loknum ræðuhöldum og söngatriðum buðu stéttarfélögin upp á kaffi og kökuhlaðborð sem var í umsjón Lionsklúbbsins Eðnu og var það afar veglegt að vanda en yfir 200 manns mættu í kaffisamsætið.

1. maí hátíðahöld á Akranesi
29
 Apr

1. maí hátíðahöld á Akranesi

Hátíðahöld á Akranesi vegna 1. maí verða með hefðbundnum hætti.

Safnast verður saman við Kirkjubraut 40 klukkan 14:00 í kröfugöngu og genginn hringur á neðri-Skaga í takt við lúðra og áslátt Skólahljómsveitar Akraness. Að göngu lokinni verður hátíðardagskrá í sal Verkalýðsfélags Akraness á 3ju hæð Kirkjubrautar 40. Fundarstjóri er Vilhjálmur Birgisson og mun hann flytja ávarp. Ræðumaður dagsins er Stefán Skafti Steinólfsson, verkamaður. Grundartangakórinn mun syngja fyrir gesti og boðið verður upp á veglegt kaffihlaðborð. Eins og undanfarin ár býður 1. maí nefndin börnum frítt í bíó í Bíóhöllinni kl. 15:00.

Félagsmenn eru eindregið hvattir til að mæta og taka þátt í dagskránni.

Page 214 of 485

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image