Framkvæmdastjórn Starfsgreinasambands Íslands fundaði á Egilsstöðum um helgina. Um var að ræða svokallaðan vinnufund vegna ársfundar sambandsins í haust. Fundarmenn töldu fulla ástæðu til að álykta um fjölmiðlafrumvarp stjórnvalda. Ályktunin er svohljóðandi:

Um fjölmiðla verður að ríkja þverpólitísk og þjóðfélagsleg samstaða. Framkvæmdastjórnin telur mikilvægt að efnt verði til víðtækrar umræðu um starfsumhverfi fjölmiðla hér á landi, m.a. með þátttöku þeirra sem starfa við fjölmiðla, fulltrúa aðila vinnumarkaðarins og annarra sem láta sig málið varða. Mikilvægt er treysta og efla vandaðan og sjálfstæðan fréttaflutning fjölmiðla til að tryggja tjáningarfrelsi, fjölbreytni og gagnrýna þjóðfélagsumræðu. 

Fyrsta skóflustungan var í dag tekin að væntanlegri stækkun álvers Norðuráls við Grundartanga úr 90 í 180 þúsund tonna framleiðslugetu. Fulltrúar Century Aluminum, nýs eiganda Norðuráls, og yfirmenn Norðuráls tóku skóflustunguna en viðstaddir voru m.a. starfsmenn og fulltrúar sveitarfélaga. Jarðvegsframkvæmdir hefjast þegar eftir helgina á vegum Íslenskra aðalverktaka og á þeim að verða lokið í haust. Sjálf byggingin verður boðin út í júní. 

Stækkuð álverksmiðja á að taka til starfa vorið 2006 og þegar framkvæmdum lýkur munu 320 manns starfa hjá Norðuráli. Er það 130 störfum meira en nú eru í verksmiðjunni. Áætluð fjárfesting í stækkuninni er 23 miljarðar króna og mun verðmæti útflutnings aukast um 12 milljarða króna á ári. Við framkvæmdirnar skapast um þúsund ársverk á verktímanum.