Fundað var í dag um gildissvið kjarasamnings Norðuráls. Er það mat formanns Verkalýðsfélags Akraness að samningsaðilar hafi nálgast nokkuð á fundinum í dag. Ákváðu samningsaðilar að hittast aftur föstudaginn 17. des. Mun á þeim fundi væntanlega koma í ljós hvort mat formanns félagsins eigi við rök að styðjast eða ekki. Formenn og trúnaðarmenn funduðu síðan eftir hádegi í dag, voru menn að fara yfir stöðuna á þeim fundi.
Fundur verður haldinn um gildissvið kjarasamnings Norðuráls á morgun kl. 09:00. Einnig munu trúnaðarmenn og formenn stéttarfélaganna funda kl. 12:00. Á þeim fundi ætlar samninganefndin að fara yfir stöðuna. Eins fram hefur komið hér á heimasíðunni þá hafa samningsaðilar komið sér saman um að fara í þær kröfur sem ekki hafa í för með sér aukinn kostnað fyrir fyrirtækið. Ætla menn að klára þau atriði nú desember. Í janúar verða síðan launaliðirnir til umræðu.
Fundað var hjá ríkissáttasemjara í dag vegna kjarasamnings Íslenska járnblendifélagsins. Stéttarfélögin lögðu fram tillögu að nýju bónuskerfi, og er það nú til skoðunar hjá stjórnendum Íj. Ákveðið hefur verið að funda nokkuð stíft í þessari viku og er næsti fundur miðvikudaginn 15. des. kl. 10:00. Eru deiluaðilar sammála um að reyna að klára samninginn fyrir áramót.
Samráðsnefnd Sjúkrahúss Akraness mun funda mánudaginn 13. des. kl. 09:00. Til umræðu eru tvö mál þ.e. túlkun á kjarasamningi starfsmanna og einnig munu fulltrúar stéttarfélagsins og trúnaðarmanna afhenda forsvarsmönnum SHA yfirlýsingu og áskorun. Mikil óánægja ríkir meðal starfsmanna vegna þeirrar ákvörðunar stjórnenda SHA að segja upp núverandi vinnufyrirkomulagi. Nýtt vinnufyrirkomulag mun taka gildi 1. jan. 2005. Yfirlýsingin og áskorun starfsmanna SHA munu birtast hér á heimasíðunni eftir helgi í heild sinni.
Ákveðið hefur verið að funda um gildissvið kjarasamnings Norðuráls þriðjudaginn 14. desember kl. 09.00. Þeir sem munu sitja fundinn fyrir stéttarfélögin eru formaður Verkalýðsfélags Akraness, formaður Fit, aðaltrúnaðarmaður NA, ásamt lögmanni stéttarfélaganna. Hugmynd Verkalýðsfélags Akraness er nokkuð skýr hvað gildissviðið varðar þ.e. að kjarasamningur Norðuráls gildi sem lágmarkssamningur í öllum störfum sem unninn eru reglulega eða daglega á athafnasvæði Norðuráls.
Fundað var um bónusmál starfsmanna Íslenska járnblendifélagsins í dag. Kynnt var fyrir samninganefnd Íj, hvað þær tillögur forsvarsmanna Íj að nýjum bónus hefðu gefið á síðastliðnum tveimur árum ef hann hefði verið við lýði. Ljóst má vera að þær forsendur sem forsvarsmenn Ij komu með um nýjan bónus ganga alls ekki upp. Erum við í samninganefnd Íj að skoða niðurstöður úr þessari úttekt sem kynnt var fyrir okkur í dag. Samninganefnd stéttarfélaganna er sammála um að leggja fram tillögur að nýjum bónus á fundi sem haldinn verður hjá ríkissáttasemjara á mánudaginn 13. desember.
Verkalýðsfélag Akraness
Kt. 680269-6889
Til skrifstofunnar geta félagsmenn leitað eftir
upplýsingum og annarri aðstoð.
300 Akranes
4309900
skrifstofa@vlfa.is
Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.
