Í dag var farin hin árlega ferð þar sem Verkalýðsfélag Akraness bauð eldri félagsmönnum í dagsferð. Um 108 eldri félagsmenn þáðu boð félagsins og komu með í þessa ferð.  Ferðatilhögun var þannig að byrjað var á því að stoppa í Reykholti þar sem Geir Waage prestur tók á móti okkur, og hélt fyrirlestur um það sem fyrir augu bar.  Þegar Geir Waage hafði farið yfir sögu Reykholts, var snæddur hádegisverður á Hótel Reykholti.

Síðan lá leiðin að Hraunfossum og var gert stutt stopp þar og menn dáðust að þeirri fegurð sem þar er.  Leiðin lá síðan yfir Kaldadal og niður á Þingvöll og var peningagjá skoðuð, þegar því var lokið var skundað á Hótel Vallhöll, þar sem boðið var uppá kaffi og meðlæti.  Þaðan var ekið  í Mosfellsbæ þar sem bæjarstjóri Mosfellsbæjar Ragnheiður Ríkharðsdóttir (skagakona)  tók á móti okkur og hafði bæjarstjórinn fengið kór eldri borgara til að syngja fyrir okkur.  Var þessi móttaka bæjarstjórans frábær og kann Verkalýðsfélag Akraness henni bestu þakkir fyrir.  Leiðsögumaður í þessari ferð var Björn Finsen og verður að segjast alveg eins og er að hann fór á kostum í þessari ferð.  Hér er mikill sagnabrunnur á ferð, gerði hann góða ferð enn betri.  Vill Verkalýðsfélag Akraness þakka Birni kærlega fyrir hans framlag.  Þeir sem voru fulltrúar félagsins í þessari ferð voru Vilhjálmur Birgisson formaður félagsins, Hugrún Olga Guðjónsdóttir framkvæmdastjóri, Auður Ásgeirsdóttir varaformaður félagsins og Sigríður Sæmundsdóttir í stjórn orlofssjóðs.  Hægt er að skoða myndir úr ferðinni með því að smella á myndir og velja síðan flokk sem heitir Ferð eldri félagsmanna.

Fundur var haldinn í stjórn og trúnaðarráðu félagsins í kvöld.  Á dagskrá fundarins voru um 8 mál til umfjöllunar.  Formaður félagsins boðaði trúnaðarmenn Klafa á fundinn.  Var það gert til að meta stöðuna betur  sem upp er komin eftir að eigendur Klafa neituðu að greiða ágóðahlutdeild til starfsmanna Klafa.  Voru þær umræður afar gagnlegar og er stjórn og trúnaðarráð ákveðið að standa vel við bakið á starfsmönnum í þessu máli.   

80 ára afmæli félagsins sem er 14 október 2004 var líka til umræðu og var upplýst að undirbúningur að dagskrá afmælisins myndi hefjast fljótlega, ýmsar hugmyndir komu fram og mun verða unnið úr þeim.  Formaður félagsins gerði grein fyrir þeim sérkjarasamningum sem félagið hefur  lokið við að gera, eins hvaða kjarasamningum ætti eftir að ljúka, en það eru allar stóriðjurnar.