Rétt í þessu var formaður að ljúka fundi með Kristjáni Loftssyni, forstjóra Hvals. Tilefni fundarins var komandi hvalavertíð sem mun hefjast fljótlega í júní og greindi Kristján formann frá því að allt að 150 manns myndu starfa á komandi hvalavertíð, fyrir utan afleidd störf. Þetta verða að teljast gríðarlega jákvæð tíðindi vegna þess ástands sem nú ríkir á íslenskum vinnumarkaði.

Vinnslan mun að stórum hluta fara fram í Hvalstöðinni í Hvalfirði, en það liggur fyrir að vinna við frystingu á afurðum mun einnig fara fram hér á Akranesi og er áætlað að um 30 til 40 manns muni starfa við þann hluta starfseminnar.

Formanni er kunnugt um það að töluverður fjöldi Akurnesinga mun starfa á komandi hvalavertíð, bæði uppi í hvalstöð sem og við frystingu afurða hér á Akranesi. Það er ljóst að þetta mun verða mikil innspýting í samfélagið hér á Akranesi, enda eru í dag yfir 300 manns án atvinnu á Akranesi og yfir 500 manns á Vesturlandinu öllu.

Það er því óhætt að segja að þetta sé ljósið í myrkrinu hvað varðar tíðindi af vinnumarkaðnum hér á landi, en Verkalýðsfélag Akraness hefur barist hart fyrir því að hvalveiðar yrði leyfðar á nýjan leik og nægir að nefna gríðarlega fjölmennan fund sem félagið stóð fyrir með Akraneskaupstað í febrúar sl.

Það er skylda okkar að nýta okkar auðlindir á sjálfbæran hátt t.d. stórhveli að fenginni ráðgjöf Hafrannsóknastofnunar og það er ljóst að þær veiðar sem nú fara að hefjast munu skila fjölda starfa og auknum útflutningstekjum þjóðinni til heilla.