Allt útlit er fyrir að ekki takist að ganga frá nýjum kjarasamningi fyrir starfsmenn Klafa fyrir helgi.  Eins og fram hefur komið hér á heimasíðunni þá ríkti töluverð bjartsýni hjá formanni félagsins að það myndi takast að klára nýjan samning fyrir helgi.  Ljóst er að það var of mikil bjartsýni.  Það er enn ágreiningur um eitt atriði sem því miður kemur í veg fyrir að hægt sé að ganga frá nýjum samningi.  Verkalýðsfélag Akraness lagði fram tillögu til lausnar á þessu eina  atriði sem útaf stendur og var allt útlit fyrir í gær að aðilar væru að ná  saman.  Því miður kom bakslag í dag þar sem forsvarsmenn Klafa höfnuðu tillögu félagsins.  Er félagið því að láta lögmann félagsins skoða tillögu sem forsvarsmenn Klafa lögðu fram til lausnar á þessari deilu.   Túlkun lögmanns félagsins á þessari tillögu forsvarsmanna Klafa mun ráða úrslitum hvort félagið mun samþykkja eða synja tillögunni.  Ef tillögunni verður hafnað mun félagið  vísa deilunni til sáttasemjara fyrir helgi.  Formaður félagsins hefur boðað trúnaðarmann Klafa til fundar í fyrramálið þar sem staðan verður metin.

Kynningafundur á vegum forsvarsmanna Laugafisks var haldinn í dag og hófst fundurinn kl 17:30.  Tilgangur með fundinum var að  kynna fyrir bæjarbúum hvað fyrirtækið hefur verið að gera til að sporna við þeirri lyktarmengun sem hefur verið að angra þá sem búa í næsta nágrenni við fyrirtækið.   Það voru viss vonbrigði hvað fáir sáu sér fært að mæta á fundinn en heildarfjöldi fundarmanna var 17 og þar af voru fulltrúar frá fyrirtækinu 5.  Verkalýðsfélag Akraness telur samt sem áður að fundurinn hafi verið afar gagnlegur og  voru allir fundarmenn sammála um að sameinast í að finna lausn á vandamálinu.  Ekki er ólíklegt að boðað verði til annars kynningafundar í haust þegar þær rannsóknir sem fyrirtækið er að láta vinna að liggja fyrir.   Eftir fundinn fóru allir sem voru á fundinum  niður að fyrirtækinu til að kanna hvor einhver lyktmengun væri til staðar þessa stundina, og reyndist svo ekki vera í þetta sinn.