Í gær hélt formaður félagsins tvær kynningar um styttingu á vinnuvikunni fyrir starfsmenn íþróttamannvirkja Akraneskaupstaðar. Fyrri kynningin fór fram fyrir starfsmenn í íþróttahúsinu að Vesturgötu og síðari kynningin fór fram fyrir starfsmenn sem starfa í íþróttamiðstöðinni að Jaðarsbökkum.
Formaður fór ítarlega yfir helstu breytingar hvað varðar styttinguna svo sem breytingu á vaktarálögum, vaktahvata, breytingargjaldi, vægi vinnustunda og fleiri þáttum er lúta að styttingunni.
Fjölmargar spurningar komu til formanns og voru flestir sammála að fyrirkomulagið við styttingu vinnuvikunnar væri afar flókið.
Einnig fór formaður yfir þá þjónustu sem félagið býður félagsmönnum sínum upp á svo sem styrkjum úr sjúkrasjóði sem og þjónustuna sem orlofssjóður er með fyrir sína félagsmenn.
Nú liggur fyrir að framkvæmdir á stækkun á steypuskála Norðuráls mun hefjast síðar í þessum mánuði og er áformað að taka hann í notkun í byrjun árs 2024.
Þetta er fjárfestin sem nemur 15 milljörðum og mun skapa um 100 störf á byggingartímanum og 40 ný varanleg störf að framkvæmdum loknum. Rétt er að geta þess að þessi stækkun á steypuskálanum mun auka útflutningstekjur Norðuráls um 4 milljarða og mun þessi stækkun á steypuskálanum klárlega styrkja og tryggja rekstarforsendur Norðuráls sem og atvinnuöryggi starfsmanna.
Það er einnig frábært að hægt sé að framleiða hér á landi einn umhverfisvænasti málm í heimi sem er ál með vistvæni grænni orku og er það mitt mat að okkar stærsta framlag til umhverfismála sé að við séum að nota vistvæna orku í þessa framleiðslu.
Það er morgunljóst að Norðurál er eitt mikilvægasta fyrirtækið sem félagsmenn VLFA starfa hjá enda eru yfir 420 manns sem vinna hjá Norðuráli sem tilheyra VLFA og voru meðallaunin 710.000 kr. síðasta mánuði. Rétt er að geta þess að unnið er á 8 tíma vöktum eða nánar tilgetið teknar 6 vaktir á 54 dögum og fimm dagar í frí og nemur vinnuskylda vaktavinnumanna 145,6 vinnustundum á mánuði.
Það ríkir umtalsvert neyðarástand hér á Akranesi þessa dagana þar sem covid smitum hefur fjölgað nokkuð hratt en smitin teygi anga sína inn í fjölmörg fyrirtæki, grunn-og leikskóla og aðrar stofnanir samfélagsins.
Á þeirri forsendu er formaður algjörlega sammála Bæjarráði Akraness sem komst að þeirri niðurstöðu að fella niður alla starfsemi í leikskólum, grunnskólum, tónlistarskóla og frístundastarfi bæjarins föstudaginn 5. nóvember, sökum mikillar fjölgunar á covid smitum í bænum.
En í gær voru 75 í einangrun og 109 manns eru í sóttkví og því er ljóst að smituðum hefur fjölgað um 50 á milli daga og nauðsynlegt að grípa til aðgerða til að sporna við útbreiðslu á veirunni. Þegar þessi frétt er skrifuð liggur ekki endanlega fyrir smittölur frá gærdeginum en skv. upplýsingum heldur smitum í bænum að fjölga.
Eins og áður sagði þá greindust 50 manns á Akranesi í gær sem myndi þýða miðað við hina margfrægu höfðatölu að um 1500 manns hefðu greinst með covid smit á höfuðborgarsvæðinu og því ljóst að við Akurnesingar verðum að taka höndum saman um að stöðva útbreiðsluna.
Í ljósi þessara stöðu hefur félagið tekið upp grímuskyldu þegar félagsmenn koma á skrifstofu félagsins. Formaður vill hvetja alla félagsmenn sína til að huga vel að sínum persónubundnu sóttvörnum og fara varlega til að okkur takist að ná niður þessu hópsmiti sem nú hefur skotið sér niður hér á Akranesi.
Á miðvikudaginn í síðustu viku var undirritaður stofnanasamningur FVA við Verkalýðsfélag Akraness. Í samningnum eru starfslýsingar, ístarfaflokkar eru tilgreindir og raðað í nýja launaflokka skv. gildandi launatöflu með tilliti til grunnröðunar, vörpunar og annarra þátta. Samningurinn nær til starfsmanna skólans, þ.e. þau sem vinna við ræstingu, störf í mötuneyti og aðstoð á starfsbraut.
Þessi stofnanasamningur er í anda þess samnings sem félagið gerði við Heilbrigðisstofnun Vesturlands þ.e.a.s hvað varðar starfaflokkun til launa og grunnröðun sem og þáttum er lúta að fjölgun flokka og þrepa vegna menntunar, endur- og símenntunar sem og starfsreynslu.
Þessi stofnanasamningur gildir afturvirkt frá 1. janúar og munu því starfsmenn fá laun sín leiðrétt afturvirkt 10 mánuði aftur í tímann. Mesta hækkun sem skilar sér í þessum samningi er hjá ræstingafólki og nemur sú hækkun 19,72% í einhverjum tilfellum.
Á myndinni eru Steinunn Inga Óttarsdóttir, skólameistari, og formaður VLFA, Vilhjálmur Birgisson, kampakát með samninginn.
Í gær var flutt mál Verkalýðsfélags Akraness gegn Samtökum atvinnulífsins fyrir Félagsdómi.
Málið lýtur að kröfu um að viðurkennt sé af Félagsdómi að Verkalýðsfélag Akraness sé með samningsumboð til þess að semja um ráðstöfun framlags til lífeyrissjóða í kjarasamningi VLFA við Elkem Ísland á Grundartanga.
Í öðru lagi krafðist VLFA fyrir Félagsdómi að viðurkennt verði Iðgjald í lífeyrissjóð fyrir félagsmenn VLFA verði 12%. Starfsmaður greiði 4% og 8% koma frá atvinnurekenda. Til viðbótar 8% mótframlagi fyrirtækisins í lífeyrissjóð koma 3,5% sem félagsmenn VLFA ákveða hvort þeir ráðstafa í samtrygginguna í sínum lífeyrissjóði, tilgreinda séreign eða í frjálsan viðbótarsparnað.
Það er mikilvægt að það komi skýrt fram að VLFA og Elkem Ísland voru sammála um að semja með þeim hætti að starfsmenn fyrirtækisins hefðu aukið val til að ráðstafa sínum kjarasamningsbundnum iðgjöldum í lífeyrissjóð með ofangreindum hætti.
Nei það voru ASÍ og Samtök atvinnulífsins sem tóku höndum saman og sögðu að samningsrétturinn um lífeyrismál væri hjá þeim og vísuðu í samning frá árinu 1996 og árinu 1995. Ekki bara það heldur hélt lögmaður ASÍ því fram fyrir félagsdómi að starfsmenn Elkem og annarra starfsmanna sem hafa sjálfstæðan kjarasamning við stóriðju væru búnir að afsala sér rétti til að semja um iðgjöld til lífeyrissjóða.
Þetta er svo ótrúlegur málflutningur því í öllum lögum þar sem kveðið er á um stéttarfélög er skýrt kveðið á um að það eru þau sem fara með samningsumboð fyrir sína félagsmenn til að semja um kaup og kjör þeirra og iðgjöld til lífeyrissjóða eru svo sannarlega hluti af starfskjörum launafólks.
Það verður fróðlegt að sjá hvernig Félagsdómur ætlar að komast hjá því að við kjarasamningsgerð séu stéttarfélög ekki lögformlegur samningsaðili um kaup og kjör meðlima sinna, eins og skýrt er kveðið á um skv. 1. mgr. 5. gr. laganna um stéttarfélög og vinnudeilur. Eða í 74. gr. stjórnarskrár lýðveldisins Íslands nr. 33/1944 þar sem kveðið á um félagafrelsi. Í ákvæðinu er sérstaklega minnst á stéttarfélög og verður af því ráðið að þeim sé ætlað mikilvægt hlutverk. Hlutverk stéttarfélaga er nánar útlistað í lögum nr. 80/1938, um stéttarfélög og vinnudeilur eins og áður sagði.
Í gærkvöldi var formanni boðið að flytja erindi á Lionsfundi á Akranesi. Á fundinum fór formaður ítarlega yfir sögu félagsins og hin ýmsu mál sem lúta að félaginu með einum eða öðrum hætti.
Hann fór yfir atvinnulífið og þær hremmingar sem við Akurnesingar höfum þurft að þola í þeim efnum eins og með lokun Sementsverksmiðjunar á sínum tíma sem og þegar allar aflaheimildir frá Akranesi voru fluttar hér í burtu með skelfilegum afleiðingum efnahagslega fyrir samfélagið hér á Akranesi.
Einnig fór hann yfir mikilvægi stóriðjunnar á Grundartanga og öll þau gríðarlegu efnahagsáhrif sem þær hafa á samfélagið.
Einnig bar lífeyriskerfið á góma og sú mikla sjóðasöfnun sem á sér stað innan lífeyrissjóðakerfisins og benti formaður m.a. á að lífeyrissjóðirnir ættu um eða yfir 50% af öllum skráðum hlutabréfum í kauphöllinni. Þetta gerir það að verkum að samkeppni á matvælum, olíu, og tryggingarmarkaði verður eðli málsins samkvæmt afar takmarkað þegar sjóðirnir eiga yfir 50% í öllum þessum aðilum.
Þetta var góður fundur og alltaf gott fyrir forystumenn í verkalýðshreyfingunni að fá tækifæri til að tala milliliðalaust við hin ýmsu félagasamtök.
Verkalýðsfélag Akraness
Kt. 680269-6889
Til skrifstofunnar geta félagsmenn leitað eftir
upplýsingum og annarri aðstoð.
300 Akranes
4309900
skrifstofa@vlfa.is
Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.
