Í síðustu viku leituðu tveir Pólverjar til félagsins vegna grunsemda um að hafa ekki fengið greitt samkvæmt lágmarkstöxtum hjá atvinnurekanda sem þeir störfuðu hjá á síðasta ári.  Afhentu þeir formanni félagsins launaseðla sem staðfestu að grunsemdir þeirra voru á rökum reistar.

Pólverjanir sem hafa fleiri ára reynslu af byggingarvinnu víðsvegar um heiminn, voru einungis með 648 kr á tímann í dagvinnu og 1.166 í yfirvinnu.  Því til viðbótar kom fyrir að þeir væru látnir vinna allt að 184 tíma í dagvinnu á mánuði áður en þeir fengu greitt í yfirvinnu. Samkvæmt samkomulagi við Samtök avinnulífsins sem gert var 1. júlí 2006 átti Pólverjanir að vera með í það minnsta 735 kr. í dagvinnu og 1.322 kr. 

Krafan sem félagið hefur gert á atvinnurekandann sem pólverjarnir störfuðu hjá hljóðar uppá  rúmar 72.000 kr. á hvorn fyrir sig. 

Það er alveg ljóst að brotum á erlendu vinnuafli ætlar ekkert að linna og þessi brot gera ekkert annað en að gjaldfella launakjör hjá íslensku verkafólki.  Það hefur komið fram hjá Vinnumálastofnun að það hefur þurft að leiðrétta launakjör hjá 50 til 60% þeirra sem starfa á vegum starfsmannaleigna, en ekki hefur verið kannað hvert hlutfallið í leiðréttingum er hjá þeim sem ráðnir eru í beint ráðningarsamband.  Reynslan sýnir að einnig er mikið um leiðréttingar hjá þeim sem ráðnir eru í beint ráðningarsamband.