Á mánudaginn sl. var haldinn á Akranesi stofnfundur Festu lífeyrissjóðs. Sjóðurinn varð til við sameiningu Lífeyrissjóðs Vesturlands og Lífeyrissjóðs Suðurlands. Lífeyrissjóður Suðurlands var sameinaður úr Lífeyrissjóði Suðurnesja og Lífeyrissjóði Suðurlands um mitt síðasta ár.  Stjórnir sjóðanna hófu viðræður í apríl á síðasta ári og á vormánuðum síðasta árs var skipuð sérstök viðræðunefnd sem í sátu stjórnarformenn og framkvæmdastjórar sjóðanna auk eins stjórnarmanns frá hvorum sjóði. Einnig komu tryggingafræðingar sjóðanna að málinu.

Á stofnfundinum kom fram að markmið með sameiningu sjóðanna sé að auka hagkvæmni í rekstri, bæta áhættudreifingu og ávöxtun eigna og hámarka með þeim hætti þau lífeyrisréttindi sem sjóðirnir geta veitt sjóðsfélögum sínum. Einnig að stærri sjóður sé betur í stakk búinn til þess að veita þá þjónustu sem nú er krafist. Í stofnefnahagsreikningi hins nýja sjóðs þann 1. janúar 2006 var hrein eign til greiðslu lífeyris rúmlega 39,4 milljarðar króna og verður sjóðurinn því í hópi stærstu lífeyrissjóða landsins.

Heimili og varnarþing hins nýja sjóðs verður í Reykjanesbæ en skrifstofa sú sem Lífeyrissjóður Vesturlands rak á Akranesi verður rekin þar áfram. Framkvæmdastjóri sjóðsins er Gylfi Jónasson sem áður var framkvæmdastjóri Lífeyrissjóðs Vesturlands. Kristján Gunnarsson er formaður stjórnar sjóðsins og Bergþór Guðmundsson varaformaður. Aðrir stjórnarmenn eru Ragna Larsen, Þórarinn Helgason, Bergþór Baldvinsson og Sigrún Helga Einarsdóttir.