Fulltrúar frá Atvinnufjelaginu óskuðu eftir fundi með formanni og varaformanni Starfsgreinasambands Íslands og var sá fundur haldinn á skrifstofu VLFA mánudaginn 26. september. En Atvinnufjelagið er undir forystu Sigmars Vilhjálmssonar veitingamanns og kom hann ásamt öðrum stjórnarmönnum á þennan fund. Fundurinn var svosem ágætur þar sem þau fóru yfir áherslur félagsins en þeir sem eru aðilar að þessu félagi eru lítil og meðalstór fyrirtæki. Kom meðal annars fram að þau vilja fá breytingu á svokölluðu dagvinnutímabili ásamt vaktaálögum en það kom skýrt fram frá SGS að slíkar breytingar væru ekki fyrirhugaðar í þessum samningum og samningsaðili SGS væru Samtök atvinnulífsins.

Vissulega er það stefna SGS að hlusta á raddir allra atvinnurekenda og meðtaka áherslur þeirra og einnig að nýta tækifærið og koma áherslum SGS á framfæri er lúta að hagsmunum launafólks hér á landi. Það eru reyndar fleiri baráttumál sem þetta umrædda félag stendur fyrir en þau mál lúta meira að stjórnvöldum og má þar nefna þrepaskipt tryggingagjald og að einyrkjar greiði ekki tryggingagjald. Eins og áður sagði var fundurinn ágætur en formenn SGS komu því skýrt á framfæri hver stefna SGS væri í þessum málum og því var algjörlega hafnað að breyta dagvinnutímabili og lækka hér álagsgreiðslur hjá þeim sem vinna um kvöld, helgar og á nóttunni.