Í hátíðarguðsþjónustu í Akraneskirkju í gær voru heiðraðir tveir merkismenn í tilefni sjómannadagsins. Þeir sem heiðraðir voru eru þeir Ásgeir Samúelsson, fyrrverandi vélstjóri og Böðvar Jóhannesson, fyrrverandi stýrimaður.

Að heiðruninni lokinni var gengið fylktu liði að minnismerki sjómanna á Akratorgi þar sem Jóhann Matthíasson, formaður Sjómannadeildar Verkalýðsfélags Akraness, Tómas Rúnar Andrésson og Svavar Skarphéðinn Guðmundsson lögðu blómsveig að því eftir stutta athöfn.

Það er Verkalýðsfélag Akraness sem stendur að þessari athöfn er lýtur að heiðrun sjómanna, minningarathöfninni um týnda sjómenn og athöfninni sem fram fer á Akratorgi þar sem blómsveigur er lagður að minnisvarða um látna sjómenn.

Akraneskaupstaður bauð síðan þeim sem heiðraðir voru og mökum þeirra til kvöldverðar á Galito og ber að þakka fyrir það.

Verkalýðsfélag Akraness óskar áðurnefndum aðilum innilega til hamingju með heiðrunina.