Í desember á síðasta ári gekk Verkalýðsfélag Akraness frá afar góðum samningi fyrir starfsmenn Elkem Ísland. Í þeim samningi var verið að breyta bónuskerfi starfsmanna, en bónuskerfið í gamla samningnum hafði ekki verið að skila starfsmönnum því sem ætlast var til.

Þetta nýja bónuskerfi getur gefið starfsmönnum allt að 10% ofan á heildarlaun þeirra og áætluðu samningsaðilar að meðaltalið yrði í kringum 70% af því sem hann gæti gefið en á þessum mánuðum sem nýja bónuskerfið hefur verið við lýði þá hefur hann ætíð verið yfir þessu meðaltali og nú síðast gaf bónusinn starfsmönnum 8,17% sem er afar ánægjulegt enda eru miklir hagsmunir í húfi fyrir þá starfsmenn sem taka laun eftir áðurnefndum kjarasamningi.