Stjórn sjúkrasjóðs fundaði í kvöld nokkur erindi lágu fyrir fundinum. Stjórnin ákvað að hefja undirbúning að breytingum á reglugerð sjúkrasjóðsins sem lagðar verða fyrir aðalfund félagsins sem haldinn verður um miðjan apríl.
Markamiðið með þessum breytingum er að auka enn frekar þá þjónustu sem sjóðurinn er að veita félagsmönnum. T.b stendur til að auka umtalsvert sjúkradagpeninga til félagsmanna í veikindum eftir að greiðsluskyldu atvinnurekanda líkur.
En hugmyndir eru um að sjúkradagpeningar geti numið allt að 80% af launum félagsmannsins eftir að veikindarétti hjá atvinnurekanda ljúki. Ef þessi breyting á sjúkradagpeningum verður að veruleika mun það þýða algjörlega byltingu fyrir okkar félagsmenn sem verða fyrir því óláni að veikjast í lengri tíma en veikindaréttur starfsmannsins segir til um.
Formaður félagsins fór og heimsótti nokkur fyrirtæki í dag í þeim tilgangi að heyra hvað brennur á félagsmönnum þessa daganna.
Einnig eru þessar vinnustaðaheimsóknir hugsaðar til þessa að fá tillögur frá félagsmönnum hvað megi bæta í þjónustu félagsins.
Það er afar ánægjulegt fyrir stjórn og starfsmenn félagsins að þeir félagsmenn sem formaður ræddi við í dag eru nokkuð ánægðir með þá þjónustu sem félagið er að veita í dag.
Stjórn félagsins leggur mikla áherslu á að vera í nánu og góðu sambandi við sína félagsmenn og eru þessar heimsóknir einn liður í því.
Stjórn félagsins er einnig alltaf að leita leiða til að auka þjónustuna enn frekar og ef þið félagsmenn eruð með einhverjar snjallar hugmyndir í þá veru endilega hafið samband við skrifstofu félagsins.
Í síðasta kjarasamningi Íslenska járnblendifélagsins var samið um nýtt bónuskerfi sem samningsaðilar voru sammála um að ætti að geta veitt báðum aðilum töluverðan ávinning. Því miður hefur sá ávinningur látið á sér standa.
Verkalýðsfélag Akraness hefur óskað eftir fundi með forsvarsmönnum Íj um þetta mál og stendur núna til að sá fundur gæti orðið 26. janúar.
Formaður félagsins hefur verið í sambandi við trúnaðartengiliði Íslenska járnblendifélagsins vegna þessa máls.
Verkalýðsfélag Akraness vill fara yfir alla þætti í hinu nýja bónuskerfi og reyna að finna hvað veldur því að sumir liðir í bónuskerfinu virka ekki sem skildi.
Það er verulegt hagsmunamál bæði fyrir eigendur Íj sem og starfsmenn Íj að finna hvað veldur því að bónuskerfið er ekki að skila þeim ávinningi sem aðilar voru sammála um að það ætti að geta skilað.
Verkalýðsfélag Akraness hefur haldið áfram að bera saman kjör starfsmanna Reykjavíkurborgar sem vinna eftir nýgerðum kjarasamningi Eflingar og starfsmanna Akraneskaupstaðar en þeir vinna eftir kjarasamningi Launanefndar sveitafélaga.
Það er verulega sláandi þegar rýnt er í samanburð á launatöxtum þessara tveggja sveitafélaga, en í þessum samanburði er um að ræða mjög sambærileg störf. Hér á heimsíðunni var bent á launamun almennra verkamanna og skólaliða og var launamunurinn hjá verkamönnum 9.2% og skólaliðum 12.5%
Verkalýðsfélag Akraness hefur nú borið saman launamun þeirra starfsmanna sem starfa við heimaþjónustu, flokkstjórn við bæjarframkvæmdir, Matráð (yfirmaður) og ræstingu. Launamunurinn milli starfsmanna Akraneskaupstaðar og Reykjavíkurborgar fyrir áðurnefnd störf er eftirfarandi:
Heimaþjónusta I Rvk. 136.599 Akrn 109.355 mism 24.9%
Heimaþjónusta II Rvk. 147.177 Akrn 130.748 mism 12.5%
Heimaþjónusta III Rvk. 156.208 Akrn 134.700 mism 16%
Verkamaður(flokkstjóri) Rvk 163.344 Akrn 128.816 mism 26%
Matráður(yfirmaður) Rvk 163.344 Akrn 151.738 mism 7.6%
Aðstoðarmaður í eldhúsi Rvk 119.485 Akrn 107.740 mism 11%
Ræsting Rvk 117.720 Akrn 107.740 mism 9.2 %
Eins og sést á þessari samantekt á launkjörum starfmanna Akraneskaupstaðar og Reykjavíkurborgar er verulegur launamunur sem Verkalýðsfélag Akraness á verulega erfitt með að sætta sig við og vart hægt að láta átölulaust.
Félagið bíður eftir viðbrögðum bæjarráðs vegna bréfs sem félagið sendi inn þar sem óskað var eftir viðbrögðum bæjaryfirvalda á þeim mikla launamun sem orðin er á milli Reykjavíkurborgar og Akraneskaupstaðar. Erindi félagsins var tekið fyrir á bæjarráðsfundi í gær.
Formaður Eflingar Sigurður Bessason hefur hælt Steinunni Valdísi borgarstjóra í hástert fyrir það að hækka laun þeirra sem hafa lægstu launin og undir það tekur formaður Verkalýðsfélags Akraness. Mættu önnur sveitafélög fara að fordæmi Reykjavíkurborgar, hvað það varðar.
Formaður Verkalýðsfélags Akraness fór í hefðbundna eftirlitsferð inn á stækkunarsvæði Norðuráls í morgun. Eftirlitið lítur m.a að aðbúnaði og kjörum erlendra starfsmanna sem starfa við stækkun Norðuráls.
Það sem kannað var í morgun lítur að hóp erlendra starfsmanna sem koma frá Slóvakíu og munu vinna við niðursetningu á ofnum í Skautsmiðjunni.
Formaður félagsins fékk allar þær upplýsingar sem óskað var eftir hjá verktakanum sem sér um verkið og er það afar ánægjulegt þegar verktakar eru jafn samvinnufúsir eins reyndist í morgun. En ekkert bendir til annars en aðbúnaður og kjör Slóvakana séu í samræmi við íslenska kjarasamninga.
Eigendur Norðuráls funduðu með Verkalýðsfélagi Akraness fyrir jól um málefni erlends vinnuafls á stækkunarsvæði Norðuráls. Það kom skýrt fram hjá forsvarsmönnum Norðuráls á þeim fundi að ekki yrði liðið að verkatakar myndu hunsa þær leikreglur sem gilda á íslenskum vinnumarkaði.
Þessi afstaða eiganda Norðuráls hefur gert það að verkum að verktakar sem vinna við stækkun Norðuráls reyna eftir fremsta megni að hafa hlutina í lagi. Það er allavega mat formanns félagsins eftir eftirlitsferðina í morgun.
Verkalýðsfélag Akraness hefur sent bæjarráði Akranesskaupstaðar bréf þar sem óskað er eftir fundi. Í bréfinu er óskað eftir viðbrögðum bæjarráðs vegna nýgerðs kjarasamnings Eflingar við Reykjavíkurborg.
Kjarasamningurinn sem Efling undirritaði 4. des felur í sér mun hagstæðari tengingu við við launatöflu fyrir starfsmenn borgarinnar en samningur sem Starfsgreinasamband Íslands gerði 29. maí við Launanefnd sveitarfélag gagnvart starfsmönnum annarra sveitarfélaga.
Verkalýðsfélag Akraness fagnar þeirri stefnu sem Reykjavíkurborg hefur tekið í að bæta kjör þeirra sem lægstu hafa launin. Vonandi munu önnur sveitarfélög fylgja að fordæmi Reykjavíkurborgar og lagfæra kjör þeirra sem lægstu hafa launin.
Hér eru tvö dæmi um hvernig kjörin eru mismunandi eftir því hvort starfsmenn vinna eftir kjarasamningi Launanefndar sveitarfélaga eða kjarasamningi Reykjavíkurborgar en um mjög sambærileg störf er um að ræða:
Almennur verkamaður hjá Reykjavíkurborg er með í byrjunarlaun 123.097 hjá Akraneskaupstað 112.661 mismunur 10.436 þúsund eða 9.2%
Skólaliði hjá Reykjavíkurborg er með í byrjunarlaun 134.599
hjá Akraneskaupstað eru byrjunarlaunin 119.575 mismunur 15.024 þúsund á mánuði eða 12.5%
Verkalýðsfélag Akraness gerir ráð fyrir, að það geti ekki verið vilji forsvarsmanna Akraneskaupstaðar að starfsmenn kaupstaðarins, hafi allt önnur og lakari launakjör en starfsmenn Reykjavíkurborgar sem sinna sambærilegum störfum. Á þeirri forsendu er óskað eftir fundi með bæjarráði, til að ræða hvernig brugðist skuli við þessari stöðu sem upp er komin. Félagið telur að verði tenging starfsmats við launatöflu og símenntunarflokka ekki samræmd milli þessara hópa, þá hafi öll vinnan við starfsmatið verið til einskis unnin.
Hægt er að lesa bréfið til bæjarráðs með því að smella á meira.
Bæjarráð Akraneskaupstaðar
Stillholti
300 Akranes Akranesi 9. janúar 2005
Efni: Viðbrögð við nýgerðum kjarasamningi Eflingar og Reykjavíkurborgar
Efling Stéttarfélag og Reykjavíkurborg undirrituðu kjarasamning 4. desember sl., sem færir þeim hópum starfsmanna borgarinnar sem hafa haft hvað lökust kjör, verulegar launahækkanir. Þessu ber að fagna og jafnframt því að með þessum samningi eru lagfærð laun þeirra sem starfa við umönnun barna og aldraðra. Oftast eru það konur sem þessum störfum sinna og löngu orðið tímabært að meta þeirra störf að verðleikum.
Starfsgreinasamband Íslands og Launanefnd sveitarfélaga undirrituð kjarasamning 29. maí sl. sem byggður er á sama starfsmatskerfi og samningur Eflingar og Reykjavíkurborgar og hefur mikil vinna verið lögð í að koma því kerfi á. Tilgangurinn hefur verið m.a. að þróa aðferðir til að greiða sömu laun fyrir jafn verðmæt störf, óháð kyni eða því hjá hvaða sveitarfélagi þau væru unnin. Við þessa vinnu hefur verið mjög gott samstarf milli aðila, bæði mismunandi stéttarfélaga, þ.e. ASÍ og BSRB félaga og launanefndar.
Kjarasamningurinn sem undirritaður var 4. des. felur í sér mun hagstæðari tengingu við við launatöflu fyrir starfsmenn borgarinnar en samningurinn frá 29. maí gera gagnvart starfsmönnum annarra sveitarfélaga.
Verkalýðsfélag Akraness gerir ráð fyrir, að það geti ekki verið vilji forsvarsmanna Akraneskaupstaðar að starfsmenn kaupstaðarins, hafi allt önnur og lakari launakjör en starfsmenn Reykjavíkurborgar sem sinna sambærilegum störfum. Hér með er óskað eftir fundi með bæjarráði, til að ræða hvernig brugðist skuli við þessari stöðu sem upp er komin. Félagið telur að verði tenging starfsmats við launatöflu og símenntunarflokka ekki samræmd milli þessara hópa, þá hafi öll vinnan við starfsmatið verið til einskis unnin.
Einnig þarf að ræða um sérákvæði sem félagsmenn í Verkalýðsfélagi Akraness voru með í sínum kjarasamningi og lítur að sumaruppbót og fermetragjaldi í flatarmældri ákvæðisvinnu. En ekki var tekið tillit til þessara sérákvæða þegar gengið var frá nýjum kjarasamningi við Launanefnd sveitarfélaga 29. maí 2005
Virðingarfyllst,
Vilhjálmur Birgisson
formaður
Verkalýðsfélag Akranes mun gefa út dagbók fyrir félagsmenn og mun dagbókin einnig gilda sem félagskírteini. Ýmsar hagnýtar upplýsingar verða í dagbókinni eins t.d um veikindarétt félagsmanna og margt fleira. Dagbókin er komin í prentun og mun verða póstlögð seinni partinn í næstu viku til félagsmanna.
Verkalýðsfélag Akraness hefur að undanförnu verið að benda á hversu illa verkafólk á hinum almenna vinnumarkaði fór út úr sínum kjarasamningi, sé tekið mið af öðrum kjarasamningum.
Í frétt sem birtist hér á heimasíðunni á þriðjudag undir fyrirsögninni af hverju gat Starfsgreinasambandið ekki samið fyrir verkafólk á almenna markaðinum... var sýndur samanburður á þeim kjarasamningum sem gerðir hafa verið á íslenskum vinnumarkaði frá því að samningurinn á almenna markaðnum var gerður 7. mars 2004. Þennan samanburð vann hagfræðingur ASÍ Ólafur Darri Andrason.
Samanburðurinn vakti þó nokkra athygli þar sem hann sýndi svart á hvítu og staðfesti um leið hvernig kjarasamningurinn á almenna markaðnum var langtum lakari heldur en aðrir kjarasamningar sem gerðir voru.
Fréttamaður af Blaðinu hafði samband við formann félagsins þar sem þeim á Blaðinu þótti þetta nokkuð athygli verðar upplýsingar um kostnaðaráhrif kjarasamninga á íslenskum vinnumarkaði.
Tekið var viðtal við formann félagsins um þennan samanburð sem hagfræðingur ASÍ hafði unnið og birtist fín frétt um málið í Blaðinu á þriðjudaginn var.
Í Blaðinu í dag birtist hins vegar frétt við formann Starfsgreinasambands Íslands þar sem hann er spurður útí þennan samanburð sem birtist hér á heimasíðunni.
Formaður SGS sagði að ekki væri sanngjarnt að bera kjarasamninga saman með þessum hætti, það yrði að taka tillit til gildistíma samninganna annars væru menn að bera saman epli og appelsínur.
Formaður Verkalýðsfélags Akraness vill að það komi skýrt fram að hagfræðingur ASÍ tók akkúrat tillit til þess í þessum samanburði á kostnaðaráhrifum kjarasamninganna.
Í samanburðinum miðaði hagfræðingurinn við 48 mánuði eins og gildistími samningsins á almenna markaðinum er. Hann umreiknaði þá kjarasamninga sem gilda í skemmri eða lengri tíma, einmitt til að gera samanburðinn sambærilegan.
Því miður er það bláköld staðreynd að verkafólk á hinum almenna markaði fékk langtum minna heldur en aðrir hópar og er það eitthvað sem við í Starfsgreinasambandi Íslands eigum viðurkenna og læra af.
Samanburðurinn frá hagfræðingi ASÍ lítur svona út eftir að tekið hefur verið tillit til gildistíma kjarasamninganna
Kostnaðaráhrif þeirra kjarasamninga sem Starfsgreinasamband Íslands gerði voru eftirfarandi:
Almenni markaðurinn. 15.8%
Við ríkið. 24.0%
Við Sveitarfélögin 23.9%
Kostnaðaráhrif annarra kjarasamninga
BSRB félög við Sveitarfélögin 23.6%
BSRB við ríkið 20.8%
KÍ framhalds 25.8%
KÍ grunnskóli 30.0%
KÍ leikskóli 37.0%
Efling við Reykjavíkurborg 30.0%
Eins og sést á þessum launasamanburði hagfræðings ASÍ þá sitja þeir sem lægstu hafa launin enn og aftur eftir og er það sorglegt.
Það er líka undarlegt að við endurskoðun á forsendum kjarasamninga var ekkert tillit tekið til þess að kjarasamningur á almenna markaðinum var langtum rýrari en aðrir samningar eins samanburðurinn sannar. Að sjálfsögðu átti forsendunefnd ASÍ og SA að grípa til sérstakar leiðréttingar fyrir almennt verkafólk. Formaður Verkalýðsfélags Akraness mótmælti á formannafundi SGS harðlega þeirri niðurstöðunni sem kom frá forsendunefndinni á sínum tíma.
Það eina sem hægt er að gera í þessu er að læra af þessu og láta þessu líkt aldrei gerast aftur. Því er rétt að nota slagorð Starfsgreinasambandsins þegar gengið verður til kjarasamningagerðar í árslok 2007, Sameinuð til sóknar !
Embætti lögreglustjórans á Akranesi verður lykilembætti en ekki embættið í Borgarnesi eins og tillögur höfðu verið gerðar um. Þetta kom fram í tillögum sem Björn Bjarnason dómsmálaráðherra kynnti á ríkisstjórnarfundi í morgun.
Sem kunnugt er lagði nefnd um nýskipan lögreglumála það til í haust að embætti lögreglustjórans í Borgarnesi yrði svokallað lykilembætti. Jafnframt yrði stofnuð þar rannsóknardeild en rannsóknardeild sem starfað hefur um áratuga skeið á Akranesi yrði jafnframt lögð niður. Stjórn Verkalýðsfélags Akraness mótmælti þessari tillögu á sínum tíma harðlega og sendi frá sér ályktun vegna þess. Nú hefur dómsmálaráðherra ákveðið að embætti lögreglustjórans á Akranesi verði lykilembætti og fagnar Verkalýðsfélag Akraness þessum nýju tillögum dómmálráðherra. Ályktunin sem stjórn VLFA sendi frá sér á sínum tíma vegna þessa máls hljóðaði eftirfarandi:
Ályktun
Akranesi 23. nóvember 2005
Stjórn Verkalýðsfélags Akraness mótmælir harðlega fyrirhugaðri skerðingu á starfsemi lögreglunnar á Akranesi. Telur stjórnin varhugavert með hliðsjón af stærð bæjarfélagsins að flytja rannsókn mála í annað umdæmi.
Samskipti félagsins við lögregluyfirvöld í Borgarnesi vegna atvika á starfssvæði félagsins á Grundartanga styrkja þessa skoðun.
Telur stjórn félagsins mun eðlilegra að starfsemi lögreglunnar á Akranesi verði efld og umdæmi hennar stækkað og látið m.a. ná til Grundartanga, en mikill meiri hluti þeirra sem þar starfa búa á Akranesi.
Það er mat stjórnar félagsins að tillögur um skerðingu á löggæslu á Akranesi sé mjög svo óeðlilegt. Sé tekið mið af því að í næsta nágreni við umdæmi lögreglunar á Akranesi er mesta umferðarsvæði landsins bæði á sjó og landi. Einnig hefur á síðustu árum orðið gríðarleg aukin á allri starfsemi á stóriðjusvæðinu á Grundartanga.
Stjórn Verkalýðsfélag Akraness skorar á dómsmálaráðherra sem og þingmenn Norðurvesturkjördæmis að tryggja að fyrirhuguð skerðing á löggæslumálum Akurnesinga verði ekki að veruleika.
Einnig skorar stjórn Verkalýðsfélag Akraness á dómsmálaráðherra og þingmenn Norðurvesturkjördæmis að beita sér fyrir því að lögreglan á Akranesi verði efld til muna og umdæmi hennar stækkað.
F.h stjórnar, Verkalýðsfélags Akraness
______________________________________
Vilhjálmur Birgisson, formaður
Grétar Þorsteinsson forseti ASÍ sagði í viðtali við ríkisútvarpið hann óttaðist að senn sjóði upp úr á íslenskum vinnumarkaði vegna þess launamisréttis sem orðið er í þessu þjóðfélagi.
Forseti ASÍ bendir á að launahækkanir þeirra sem hæst eru launaðir hafi hækkað tvöfalt meira heldur en þeir sem lægstu hafa tekjurnar.
Formaður Verkalýðsfélags Akraness tekur undir með forseta ASÍ um að senn sjóði upp úr á íslenskum vinnumarkaði. Við sem erum í forsvari fyrir þá sem lægstu hafa launin berum að hluta til ábyrgð á hvernig komið er fyrir verkafólki á hinum almenna vinnumarkaði.
Nægir þar að nefna hvernig samið var fyrir verkafólk á hinum almenna markaði í síðustu kjarasamningum. Samið var til fjögurra ára og gaf samningurinn okkar fólki einungis 11,5% í beinar launahækkanir og heildarkostnaðaráhrif samningsins var 15,8%. Var það gert til að viðhalda stöðugleikanum og vonuðust til aðilar það myndi tryggja okkar fólki kaupmáttaraukningu.
Það var Starfsgreinasamband Íslands sem ruddi brautina fyrir aðra samninga og átti kjarasamningur SGS að vera almennt stefnumarkandi fyrir aðra kjarasamninga. Hvað gerðist eftir að almenni markaðurinn gekk frá sínum samningi ? Allir aðrir hópar sömdu um mun hærri launahækkanir heldur en gert var 7.mars 2004. Eins og margoft hefur komið fram hér á heimasíðunni þá skrifaði Verkalýðsfélag Akraness ekki undir kjarasamninginn 7. mars 2004, vegna þess hversu rýr hann var að mati félagsins. En skoðum hvað aðrir kjarasamningar gáfu.
Almenni markaðurinn. 15,8%
Kjarasamningar sem gerðir voru við Sveitarfélögin voru eftirfarandi:
BSRB félög 23,6 %
KÍ grunnskóli 30,0 %
KÍ leikskóli 37,4 %
ASÍ félög 23,9 %
Kjarasamningar sem gerðir voru við ríkið voru eftirfarandi:
BSRB félög 20,8%
BHM félög 23,2%
FÍN 19,8%
KÍ framhaldssk 25,8%
ASÍ félög 24,0%
Einnig var samið við Alcan, Norðurál, ÍJ og Sementsverksmiðunna og gáfu þeir samningar frá 20% uppí 25%
Þessi samanburður miðast við að samningarnir gildi í 48 mánuði eins og kjarasamninginn á almenna markaðinum gerir. Þeir kjarasamningar sem gilda í skemmri tíma hafa verið umreiknaðir upp í 48 mánuði. Samburður þessi var unninn af Ólafi Darra Andrasyni hagfræðingi ASÍ.
Munið að kjarasamningur Starfsgreinasambandsins gaf 15,8%, svo tala menn um að hækka þurfi lægstu launin, þvílík hræsni.
Á þessu sést svo ekki verður um villst hvernig almennt verkafólk fékk langtum um minna heldur en aðrir hópar í þessu þjóðfélagi.
Það er í raun og veru sorglegt að sjá enn og aftur hvernig verkafólk á almenna vinnumarkaðinum fer út úr sínum kjarasamningi. Eitt er líka á hreinu að stór hluti verkafólks á hinum almenna markaði er klárlega ekki að njóta þess launaskriðs sem talað er um að sé í þessu þjóðfélagi.
Það er einnig undarlegt að Starfgreinasamband Íslands og Flóabandalagið töldu ekki ráðlegt að semja nema um hóflegar launahækkanir fyrir almenna markaðinn 7. mars 2004. Síðan var hægt að semja við ríkið uppá 24% og við Sveitarfélögin upp á 24,9%. Reyndar samdi Efling við Reykjavíkurborg upp á 30% rétt fyrir jól.
Formaður Verkalýðsfélags Akraness spyr sig hvers vegna var hægt að semja við ríkið og Sveitarfélögin með þessum hætti en ekki fyrir almennt verkafólk, sem tekur laun sín eftir kjarasamningi SGS. Það þarf að svara verkafólki á hinum almenna vinnumarkaði hvernig á þessu stendur.
Verkalýðsfélag Akraness sendir þér og þínum bestu nýársóskir með þökk fyrir samstarfið á liðnu ári.
Í nýgerðum kjarasamningi Klafa var tekið upp nýtt bónuskerfi. Bónusinn skiptist í tvo hluta annars vegar sem lítur að hráefnum og hinsvegar um öryggis og þrifamál á athafnasvæði Klafa á Grundartanga.
Í hverjum mánuði er gerð úttekt á vinnusvæði Klafa og var formanni félagsins boðið að vera með í þeirri úttekt í morgun, ásamt trúnaðarmanni og framkvæmdastjóra Klafa.
Það er skemmst frá því að segja að farið var um allt vinnusvæði starfsmanna Klafa og var svæðið til mikillar fyrrimyndar. Það er vart hægt að ætlast til að athafnasvæðið líti betur út á miðað við eðli þeirra starfsemi sem þarna er unnin.
Bónusinn getur gefið starfsmönnum að hámarki 7% á öll laun og er því um töluverða hagsmuni um að ræða fyrir starfsmenn. Eftir úttektina var bónusinn fyrir desember reiknaður út og kom í ljós að hann gaf starfsmönnum 5,4% sem er um 80% af því sem hann getur gefið.
Formaður félagsins er ekki í neinum vafa að bónusinn hjá Klafa er að svínvirka, báðum aðilum til góðs.
Jóla- trúnaðarráðsfundur Verkalýðsfélags Akraness var haldinn í gærkveldi. Mjög góð mæting var á fundinum í gær. Það gladdi fulltrúa trúnaðarráðs að sjá að heiðursfélagarnir Bjarnfríður Leósdóttir fv. varaformaður félagsins og Herdís Ólafsdóttir (fædd 1911) fv. formaður og ritari kvennadeildarinnar skyldu sjá sér fært að mæta.
Formaður félagsins fór yfir það helsta sem gerst hefur á liðnu starfsári.
Sagði formaður félagsins að það væri afar sorglegt að sjá hvernig almennt verkafólk hefði farið útúr sínum kjarasamningi. Enn og aftur sömdu flest allar starfsstéttir um mun meira heldur almenni markaðurinn. Og alltaf er ætlast til að verkafólk á hinum almenna vinnumarkaði taki hóflegar kauphækkanir og semji til langs tíma, með það að markamiði að stöðugleikanum sé viðhaldið. Einnig sagði formaðurinn að það væri orðið löngu tímabært að fleiri en verkafólk axli ábyrgðina við að viðhalda stöðugleikanum í þessu landi.
Bjarnfríður Leósdóttir fv varaformaður og baráttu kona með meiru kvaddi sér hljóðs á fundinum í gær. Vildi hún þakka stjórn félagsins kærlega fyrir frábært starf á þeim tveimur árum sem hún hefur stjórnað félaginu. Bað hún stjórn félagsins að halda áfram á þeirri braut sem hún hefur verið Verkalýðsfélagi Akraness til heilla.
Að lokum var boðið uppá veitingar í boði félagsins
Formaður Verkalýðsfélag Akraness fagnar innilega að Halldór Ásgrímsson forsætisráðherra skuli hafa óskað eftir því við formann Kjaradóms, að dómurinn endurskoði fyrri ákvörðun sína um laun þjóðkjörinna einstaklinga. Vonandi verður kjaradómurinn við þeirri ósk.
Það er ekki hægt að bjóða íslensku verkafólki það lengur að það eitt og sér sé látið viðhalda stöðugleikanum í þessu landi.
Kjarasamningurinn sem gerður var fyrir verkafólk á hinum almenna vinnumarkaði og undirritaður var 7. mars 2004 gaf almennu verkafólki 11,5% í beinar launahækkanir á samningstímanum og heildarkostnaðaráhrif samningsins var 15,8%. Samningstíminn var til fjögurra ára.
Ekki þótti ráðlegt á sínum tíma að semja nema um hóflegar kostnaðarhækkanir að mati forsvarsmanna SGS. Var það gert með von um að stöðugleiki myndi ríkja á samningstímanum. Vonuðust aðilar einnig eftir að hóflegur kjarasamningur myndi tryggja almennu verkafólki kaupmáttaraukningu í stað kaupmáttarskerðingar.
Það var Starfsgreinasamband Íslands sem ruddi brautina með undirritun kjarasamnings 7. mars 2004. Eitt af forsenduákvæðum samnings var,að sú launastefna og þær kostnaðarhækkanir sem í samningum fólust væru almennt stefnumarkandi fyrir aðra samningagerð á vinnumarkaðnum.
En hvað gerðist eftir að SGS undirritaði kjarasamninginn 7. mars 2004. Jú allar aðrar starfsstéttir sömdu um mun hærri launahækkanir eða frá 19% og uppundir 35%. Eins og áður hefur komið fram þá gaf kjarasamningurinn á almenna markaðinum 15,8%
Það er því sorglegt að sjá hvernig almennt verkafólk þarf enn og aftur að horfa uppá allar aðrar starfsstéttir í þessu þjóðfélagi fá langtum meira heldur en það sjálft.
Svo tala ráðamenn og margir aðrir um að laga þurfi kjör þeirra lægst launuðu, þvílík hræsni !
Verkalýðsfélag Akraness
Kt. 680269-6889
Til skrifstofunnar geta félagsmenn leitað eftir
upplýsingum og annarri aðstoð.
300 Akranes
4309900
skrifstofa@vlfa.is
Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.
