Met þátttaka var í hátíðarhöldum á 1. maí á Akranesi, en um 220 manns komu og tóku þátt í hátíðarhöldum sem stéttarfélögin buðu uppá. Í fyrra voru um 150 manns sem tóku þátt í hátíðarhöldunum þannig að hér er um mjög ánægjulega fjölgun um að ræða.
Aðalræðumaður dagsins var Gunnar Páll Pálsson formaður VR. Einnig var boðið uppá tónlistaratriði, upplestur og kór Íslenska járnblendifélagsins flutti nokkur lög. Eins og áður sagði var um met þátttöku að ræða og um tíma leit út að ekki væri sæti fyrir alla fundargesti en með því að fjölga borðum og stólum þá bjargaðist það farsællega.
Stéttarfélögin buðu hátíðargestum uppá kaffiveitingar sem 4. flokkur kvenna sá um með glæsibrag.
Stjórn Verkalýðsfélags Akraness óskar félagsmönnum sínum til hamingju með daginn. Félagið hvetur félagsmenn sína til að taka þátt í hátíðardagskránni. Dagskráin er eftirfarandi:
Safnast verður saman við Kirkjubraut 40 kl. 14:00 og genginn hringur á Neðri-Skagann. Að göngu lokinni verður hátíðardagskrá í sal á 3ju hæð Kirkjubrautar 40.
Ræðumaður dagsins er Gunnar Páll Pálsson formaður VR
Einnig verður boðið uppá hljóðfæraleik, upplestur og söng
Kaffiveitingar
Í dag afgreiddi Alþingi Íslendinga frumvarp til laga sem félagsmálaráðherra lagði fram um frjálsan atvinnu- og búseturétt launafólks innan evrópska efnahagssvæðisins. Formaður Verkalýðsfélags Akraness fór og fylgdist með annarri og þriðju umræðu umræddra laga og þeirri atkvæðagreiðslu sem fram fór í kjölfarið. Fram kom í máli þingmanna sem tóku til máls að umrædd lög hefðu verið gerð í fullu samráði við Alþýðusamband Íslands og Samtök Atvinnulífsins. Það er mat formanns Verkalýðsfélags Akraness að myndast hafi gríðarleg gjá á milli Alþýðusambands Íslands og aðildarfélaga þess sé tekið mið af þeim umsögnum sem fjöldi stéttarfélaga skilaði inn til félagsmálanefndar Alþingis. Það er orðið með öllu óþolandi hvernig ASÍ afgreiðir stór mál nánast einhliða og án þess kanna hver sé afstaða stéttarfélaganna vítt og breitt um landið. Nægir þar að nefna mál eins endurskoðun á kjarasamningum sem fram fór í desember 2005, starfsmannaleigufrumvarpið og nú síðast málefni um frjálst flæði launafólks frá aðildarríkum ESS . Eitt er víst að ekki var haft samband við Verkalýðsfélag Akraness hvað varðar þessi veiga miklu mál, hvorki af ASÍ eða Starfsgreinasambandi Íslands.
Þingmenn bentu á að forsenda fyrir því að þetta frumvarp hafi verið lagt fram með þessum hætti hafi verið umrætt samkomulag aðila vinnumarkaðarins. Einnig kom fram í máli þingmanns Sjálfstæðisflokksins, Péturs Blöndal, að ekki aðeins hafi ASÍ verið sammála fyrirliggjandi frumvarpi heldur sagði hann að ASÍ og Samtök atvinnulífsins hefðu hreinlega búið þetta frumvarp til. Ef satt reynist, verður það að teljast afar óeðlilegt í ljósi andstöðu fjölda stéttarfélaga við þetta frumvarp.
Það er mat formanns Verkalýðsfélags Akraness að sá gríðarlegi áhugi einstakra forustumanna ASÍ á inngöngu í Evrópusambandið hafi valdið því að ASÍ var fylgjandi þessu frumvarpi, því frjálst flæði launafólks er í samræmi við inngöngu í Evrópusambandið. Það er ótrúlegt að ASÍ hafi ekki beitt sér að fullu afli gegn þessu frumvarpi í ljósi þess að stéttarfélög telja frumvarpið ganga á hagsmuni íslenskra launþega. Það er einnig mat formanns félagsins að ef ASÍ hefði beitt sér að fullu afli í því að fá stjórnvöld til framlengja takmörkunum á frjálsri för launafólks frá hinum nýju aðildarríkum ESS þá er allt eins líklegt að íslensk stjórnvöld hefðu gert það.
Fjöldi þingmanna vitnaði í umsagnir stéttarfélaga vítt og breitt um landið og voru þær umsagnir í algjöru ósamræmi við forystu Alþýðusambands Íslands. Í umsögnum sem félagsmálanefnd Alþingis barst frá stéttarfélögum kom fram að þau legðust gegn því að takmörkunum yrði aflétt og hér er um töluverðan fjölda stéttarfélaga að ræða eins og t.d. Verkalýðsfélag Akraness, Verkalýðsfélag Vestfirðinga, Verkalýðsfélag Húsavíkur, Afl - Starfsgreinafélag Austurlands og Samiðn. Einnig vitnuðu þingmenn í andstöðu við fyrirliggjandi frumvarp frá Eflingu og einnig hinar ýmsu ályktanir frá stéttarfélögum. Þess vegna er það formanni Verkalýðsfélags Akraness með öllu óskiljanlegt þegar talað er um að sátt ríki á meðal aðila vinnumarkaðarins.
Það sem aðallega kom fram í þessum umsögnum var að stéttarfélögin telja íslenskan vinnumarkað og íslensk stjórnvöld ekki tilbúin til að taka við því aukna flæði erlends vinnuafls frá hinum nýju aðildarríkjum EES. Það kom líka fram í umsögnunum að því markaðslaunakerfi sem væri búið að vera við lýði á undanförnum árum og áratugum væri ógnað með opnun íslensks vinnumarkaðar á þennan hátt. Til dæmis kom fram í umsögn Verkalýðsfélags Húsavíkur að félagið hefði heimildir fyrir því að pólskir verkamenn væru tilbúnir að koma og vinna í ferðaþjónustu fyrir einungis 300 kr. á tímann. Skemmst er að minnast þess þegar Verkalýðsfélag Akraness leiðrétti launakjör pólskra verkamanna sem störfuðu hjá Spútnik bátum. Voru þeir einungis með 350 kr. á tímann og unnu allt upp í 270 tíma á mánuði. Þetta er meðal þeirra atriða sem stéttarfélögin hafa verið að benda á. Með frumvarpi sem samþykkt var frá Alþingi í dag er einnig verið að skerða eftirlitshlutverk stéttarfélaga stórlega. Fram hefur komið í máli varaformanns Eflingar, Guðmundar Þ. Jónsson að tímakaup byggingarverkamanna hefur lækkað á síðasta ári um allt að 20% vegna aðkomu erlends vinnuafls inn á íslenskan vinnumarkað. Með öðrum orðum þá er það nákvæmlega þetta sem Verkalýðsfélag Akraness hræðist stórlega, þ.e. að íslenskir launþegar muni verða fyrir skerðingu á sínum launum vegna undirboða sem munu fylgja stórauknu framboði erlends vinnuafls frá láglaunasvæðum eins og Póllandi, Litháen, Slóvakíu og hinum aðildarríkjum EES. Stéttarfélögin sem veittu umsögn til félagsmálanefndar vildu að íslensk stjórnvöld nýttu sér þær heimildir sem þau höfðu til að framlengja takmarkanir á frjálsu flæði, sum til eins árs og önnur allt til ársins 2011 eins og heimilt var að gera. Vildu félögin að stjórnvöld og aðilar vinnumarkaðarins myndu nýta þann tíma til að búa til það regluverk sem til þarf vegna aðkomu erlends vinnuafls að íslenskum vinnumarkaði.
Það er íslenskum stjórnvöldum til vansa að hafa ekki nýtt þann tíma sem þau hafa haft á síðastliðnum tveimur árum til að búa sig undir aðkomu erlends vinnuafls að íslenskum vinnumarkaði en engar rannsóknir um afleiðingar gildistöku laga þessara eru til. Það er líka íslenskum stjórnvöldum til vansa að leggja frumvarpið fram nánast örfáum mínútum áður en þau eiga að taka gildi. Einnig er þeim aðilum sem bera ábyrgð á frumvarpi þessu og á ég þar við heildarsamtök íslenskra launþega, Alþýðusambands Íslands, til vansa að hafa gert samkomulag við Samtök atvinnulífsins og íslensk stjórnvöld staðið að því með þessum hætti án samráðs við fjöldann allan af stéttarfélögum vítt og breitt um landið.
Aðalfundi Verkalýðsfélags Akraness var að ljúka rétt í þessu. Fundur gekk mjög vel og var mæting alveg þolanleg. Endurskoðandi félagsins fór yfir reikninga félagsins og kom fram í máli endurskoðanda að afkoma félagsins væri mjög góð.
Ný reglugerð sjúkrassjóðs var samþykkt og mun hún klárlega veita félagsmönnum mun betri og víðtækari réttindi í veikinda og slysatilfellum heldur en áður hafa þekkst hjá félaginu.
Aðalfundur félagsins samþykkti ályktun um frjálsa för launafólks frá nýjum aðildarríkum EES. En landið mun galopnast fyrir launafólki frá nýju aðildarríkjum EES ef frumvarp félagsmálaráðherra verður að veruleika.
Ályktunina er hægt að lesa með því að smella á meira
Ályktun um frjálst flæði launafólks 1. maí
Akranesi 26.apríl 2006
Aðalfundur Verkalýðsfélags Akraness skorar á íslensk stjórnvöld og Alþingi Íslendinga að afnema alls ekki takmarkanir á frjálsri för launafólks frá hinum nýju aðildarríkum EES eins og fyrirhugað er að gera samkvæmt fyrirliggjandi frumvarpi félagsmálaráðherra.
Aðalfundurinn telur það ámælisvert að íslensk stjórnvöld hafi ekki látið gera úttekt eða rannsókn á því hvaða áhrif erlent vinnuafl hefur haft á íslenskan vinnumarkað áður en tekin er ákvörðun um það að galopna landið fyrir launafólki frá nýjum aðildarríkjum EES.
Aðalfundurinn telur að því markaðlaunakerfi sem viðgengist hefur á íslenskum vinnumarkaði á liðnum árum og áratugum sé stórlega ógnað ef það frumvarp sem nú liggur fyrir Alþingi fer í gegn óbreytt.
Aðalfundur telur það einnig óskiljanlegt af hverju verið er að skerða eftirlitshlutverk stéttarfélaganna með erlendu vinnuafli eins og fram kemur í fyrirliggjandi fumvarpi félagsmálaráðherra. Ljóst er að á stéttarfélögum hvílir rík skylda til að tryggja að á félagssvæði þeirra sé unnið samkvæmt íslenskum lögum og kjarasamningum og hafa stéttarfélögin þar víðtækra hagsmuna að gæta.
Það verða kaldar kveðjur sem Alþingi Íslendinga sendir íslenskum launþegum á sjálfan baráttudag launafólks 1. maí nk. ef frumvarp félagsmálaráðherra verður samþykkt óbreytt.
Aðalfundur Verkalýðsfélags Akraness skorar á íslenska launþega að fylgjast með því hvernig þingmenn greiða fyrirliggjandi frumvarpi um frjálsa för launafólks frá hinum nýju aðildarríkjum EES atkvæði sitt.
Stjórn VLFA vill minna félagsmenn á aðalfundinn sem haldinn verður annað kvöld kl. 20:00 að Kirkjubraut 40, 3. hæð.
Meðal dagskrárliða er kynning stjórnar á skýrslu fyrir liðið starfsár, kynntar verða breytingar á reglugerð sjúkrasjóðs og endurskoðandi félagsins kynnir ársreikninga 2005.
Félagsmenn eru eindregið hvattir til að mæta og hafa þannig áhrif á starfsemi félagsins. Kaffiveitingar í boði.
Félagsmálanefnd Alþingis hefur óskað eftir því við formann félagsins að Verkalýðsfélag Akraness veiti umsögn um frumvarp sem félagsmálaráðherra hefur lagt fram. Frumvarpið lýtur að frjálsri för launafólks frá hinum nýju aðildarríkum Evrópusambandsins.
Að sjálfsögðu mun Verkalýðsfélag Akraness verða við beiðni félagsmálanefndar og skila inn umsögn fyrir kl. 17:00 miðvikudaginn 26. apríl eins og óskað var eftir.
Afstaða stjórnar Verkalýðsfélags Akraness er hvellskýr í þessu máli, þ.e að það megi ekki undir nokkrum kringumstæðum afnema takmarkanir á frjálsri för launafólks frá hinum nýju ríkum ESS þann 1. maí nk. Til að mynda voru 2.417 Íslendingar án atvinnu í mars samkvæmt nýjum tölum frá Vinnumálastofnun og því til viðbótar eru 600 manns að missa atvinnuna á Reykjanesi vegna brotthvarfs Bandríkjahers.
Með því að falla frá skilyrði um atvinnuleyfi má reikna með að gríðarlegur fjöldi erlendra starfsmanna streymi til landsins í leit að atvinnu, þar sem þeir margir búa þeir við viðvarandi atvinnuleysi og hörmuleg kjör í sínu heimalandi. Reynslan sýnir okkur að einstaka atvinnurekendur víla ekki fyrir sér að nýta sér þessa aðstöðu til að koma sér upp ódýru vinnuafli og pressa á lækkun þeirra kjara sem þekkjast á íslenskum vinnumarkaði.
Þá er líklegt að aukið framboð á starfsfólki frá þessum löndum ýti enn frekar undir lækkun markaðslauna, gerviverktöku og atvinnuleysi meðal Íslendinga.
Verkalýðsfélag Akraness telur íslenskan vinnumarkað ekki tilbúinn til að taka við auknu flæði launafólks 1. maí. Þess vegna telur félagið eðlilegt að fresta gildistöku reglnanna um þrjú ár og tíminn notaður til að setja skýrar reglur sem kveði á um ábyrgð fyrirtækja sem ráða til sín erlent starfsfólk varðandi kjör og skattskil til opinberra aðila.
Það þarf að liggja fyrir að stéttarfélögin hafi heimild til að afla gagna hjá atvinnurekendum sem hafa erlent vinnuafl í sinni þjónustu, t.d. ráðningarsamninga, tímaskriftir og launaseðla og það án þess að grunur um brot sé til staðar. Þessi heimild verður að vera til staðar því reynslan sýnir að erlent vinnuafl veit einfaldlega ekki hver réttindi sín eru á íslenskum vinnumarkaði og dæmin sýna að einstaka atvinnurekendur hafa nýtt sér vankunnáttu erlends vinnuafls á réttindum sínum.
Á skrifstofu félagsins er þessa dagana unnið að lokafrágangi sumarúthlutunar 2006. Aðsókn í orlofshús félagsins var mjög góð því alls bárust 184 umsóknir um dvöl í þeim í sumar.
Stefnt er að því að fyrstu úthlutun verði lokið mánudaginn 24. apríl og fá allir umsækjendur sent bréf frá félaginu þar sem þeir fá upplýsingar um hvort og þá hvaða hús féll þeim í skaut. Greiðslufrestur hjá þeim sem fá úthlutað úr fyrstu úthlutun er 3. maí. Annarri úthlutun verður lokið 10. maí og greiðslufrestur hjá þeim er til 17. maí.
Eftir það verða lausar vikur auglýstar hér á vefsíðunni og gildir um þær reglan "fyrstur kemur-fyrstur fær". Hægt er að bóka þessar vikur á skrifstofu félagsins.
Starfsfólk skrifstofu Verkalýðsfélags Akraness óskar félagsmönnum gleðilegs sumars!!
Endurskoðandi félagsins fór yfir ársreikninga félagsins með stjórnum allra sjóða félagsins í gærkveldi. Það er óhætt að segja að afkoma félagsins sé glæsileg en heildarhagnaður allra sjóða félagsins nemur rúmum 30 milljónum króna. Hagnaður félagssjóðs nam tæpum 7 milljónum. Rétt er að minna á að þegar ný stjórn tók við félaginu 19. nóvember 2003 var félagssjóður rekin með tveggja og hálfrar milljóna króna yfirdrætti. Er því um algeran viðsnúning um að ræða hjá félaginu og hefur peningalega staða félagsins aukist um 57% frá því ný stjórn tók við Verkalýðsfélagi Akraness 19. nóvember 2003.
Í ljósi góðrar afkomu félagsins hefur stjórn sjúkrasjóðs ákveðið að stórauka réttindi félagsmanna hvað varðar réttindi í veikindum. Breytingar á reglugerð sjóðsins verður kynnt á aðalfundi félagsins sem haldinn verður miðvikudaginn 26. apríl kl. 20:00 að Kirkjubraut 40 3 hæð.
Einstaka þingmönnum og ráðherrum hefur verið tíðrætt um að laun þeirra sem lægstu hafa launin hafi hækkað umtalsvert meira heldur en laun annarra í þessu landi. Annað sýnir samantekt sem fyrrverandi formaður Hlífar gerði ekki alls fyrir löngu á þingfarakaupi annars vegar og hins vegar á lágmarkslaunum verkafólks. Þar kemur fram að þingfarakaup þingmanna hafi hækkað frá 1. janúar 1998 til 1. febrúar 2006 um 114%, en lágmarkslaun verkafólks á hinum almenna vinnumarkaði hækkaði um 70% á sama tímabili. Mismunur 44%
| Þingfarakaup | 1998=220.168- | 2006=471.427 | Hækkun 251.259 | Samtals 114% |
| Lágmarkslaun | 1998=63.399- | 2006=108.000 | Hækkun 44.601 | Samtals 70% |
Krónulega séð hefur þingfarakaup alþingismanna hækkað tæplega sexfalt á við lágmarkslaun verkafólks á umræddu tímabili.
Ef lágmarkslaun verkafólks hefðu fengið sömu prósentuhækkanir og þingfarakaupið hefur fengið þá þyrfti að hækka lágmarkslaun um 27.673 krónur og færi uppí 135.673 krónur á mánuði.
Það er með algerum ólíkindum að launamisrétti af þessum toga skuli hafa verið látið viðgangast í þessu litla samfélagi okkar. Að hlusta svo á einstaka þingmenn og ráðherra tala um að launakjör þeirra lægst launuðustu hafi hækkað umtalsvert meira en önnur laun, þeir eru klárlega ekki að miða við sín eigin laun svo mikið er víst.
Það væri fróðlegt að fá að vita hvort alþingsmönnum og ráðherrum þessa lands finnist það eðlilegt að laun þeirra skuli hafa hækkað langt umfram lágmarkslaun verkfólks.
Þingmenn hljóta að vera tilbúnir að beita sér fyrir því að lágmarkslaun verkafólks fái sömu prósentuhækkanir og þeir sjálfir hafa fengið á liðnum árum.
Samanburður þessi sýnir enn og aftur hvernig verkafólk á hinum almenna vinnumarkaði hefur setið skelfilega eftir á liðnum árum. Það verður að koma til sérstakrar leiðréttingar á launum verkafólks á hinum almenna vinnumarkaði þegar endurskoðun á kjarasamningunum fer fram í haust. Ef ekki næst samstaða innan forsendunefndarinnar að leiðrétta kjör þeirra sem lægstu hafa launin þá er ekkert annað í stöðinni en að segja kjarasamningum upp og sækja þá leiðréttingu með fullu afli.
Það skal sérstaklega tekið fram að hér er einungis gerður samanburður á þeim hækkunum sem Kjaradómur hefur gert á þingfarakaupi alþingismanna, þannig að launahækkanir, styrkir og önnur hlunnindi sem þingmenn hafa náð sér í þar fyrir utan, t.d. með lagasetningum eru ekki inni í þessu dæmum.
Formaður félagsins hefur náð samkomulagi við lögmann Samtaka atvinnulífsins vegna ágreinings sem hefur verið uppi um túlkun á neysluhléum starfsmenna Klafa ehf. Ágreiningur hefur verið uppi um allanga hríð hvað neysluhlé vaktavinnumanna varðar.
Forsvarsmenn Klafa og lögmaður SA féllust á sjónarmið Verkalýðsfélags Akraness í þessu máli og mun túlkunin um neysluhléin gilda frá 1. apríl. Það var afar ánægjulegt að það skuli hafa tekist að leysa þetta mál með þessum hætti og er það báðum samningsaðilum klárlega til góðs.
Stjórn sjúkrasjóðs Verkalýðsfélags Akraness mun funda í kvöld ásamt lögmanni félagsins. En lögmaður félagsins hefur unnið að gagngerum breytingum á reglugerð sjóðsins. Það er alveg ljóst að þær breytingar sem gerðar verða á reglugerð sjóðsins munu hafa umtalsverða breytingu fyrir félagsmenn og það til góða. Sem dæmi má nefna þá gera tillögur sem stjórn sjóðsins er að skoða gera ráð fyrir því að félagsmenn muni eiga rétt á 80% af heildarlaunum sínum þó ekki hærri en 250 þúsund eftir að greiðsluskyldu atvinnurekanda líkur í veikindum. Þennan rétt getur félagsmaðurinn átt í allt að 120 daga. Hér er um gríðarlega breytingu að ræða og mikil hagsbót fyrir félagsmenn. Nánar verður greint frá reglugerðabreytingunum þegar þar liggja allar fyrir hér á heimasíðunni.
Fulltrúar Starfsgreinasambands Íslands gengu á fund heilbrigðisráðherra, Sivjar Friðleifsdóttur í gær. Erindi fundarins var að gera ráðherra grein fyrir þeim vanda sem væri að skapast á öldrunar- og heilbrigðisstofnunum, en mikil óánægja ríkir meðal þeirra starfsmanna sem eru í SGS og vinna eftir kjarasamningum við ríkið. Launakjör þessara starfsmanna eru mun lakari heldur en hjá þeim sem vinna sambærileg störf hjá sveitarfélögunum.
Þrátt fyrir að heilbrigðisráðherra beri ekki ábyrgð á kjarasamningum við starfsmenn, ber hann engu að síður pólitíska og faglega ábyrgð á því að hægt sé að halda stofnununum í rekstri. Það verður ekki gert án starfsfólks.
Starfsmenn sjúkrahús Akraness hafa komið óánægju sinni á framfæri við formann félagsins með launakjör sín og þann mikla launamun sem er á sambærilegum störfum hjá þeim sem starfa hjá sveitafélögunum. Starfsmennirnir benda réttilega á að launamunur á milli starfsmanna sem starfa hjá sveitafélögunum og hins vegar ríkinu getur numið allt að 40 þúsundum króna á mánuði fyrir nákvæmlega sömu störf. Að sjálfsögðu er þetta algerlega óviðunandi ástand og hefur formaður félagsins nú þegar sett sig í samband við forsvarsmenn SHA.
Það er svartur dagur í dag hjá íslenskum launþegum vegna þeirra ákvörðunar ríkisstjórnar Íslands að falla frá takmörkunum á innflutningi vinnuafls frá nýjum aðildarríkjum Evrópusambandsins. Ríkisstjórnin samþykkti í morgun lagafrumvarp Jóns Kristjánssonar, félagsmálaráðherra, um að aflétt verði takmörkunum á innflutningi vinnuafls frá nýjum aðildarríkjum Evrópusambandsins frá og með 1. maí. Samkvæmt því verður ríkisborgurum viðkomandi ríkja heimilt að koma hingað í atvinnuleit og ráða sig í vinnu án atvinnuleyfis en vinnuveitendur verða að tilkynna um ráðningu til Vinnumálastofnunar.
Í dag virkar þetta þannig að atvinnurekendur þurfa að sækja um atvinnuleyfi fyrir erlent vinnuafl frá hinum nýju aðildarríkjum EES. Til að fá atvinnuleyfi í dag fyrir erlent vinnuafl er alger grunnforsenda að ekki séu Íslendingar til í þau störf sem óskað er eftir að manna með erlendu vinnuafli. Einnig þurfa atvinnurekendur að leggja fram til stéttarfélaganna ráðningarsamninga til umsagnar. Með því er tryggt að stéttarfélögin hafa góða yfirsýn yfir það sem er að gerast á viðkomandi starfssvæði. Með frumvarpinu sem félagsmálaráðherra lagði fram í morgun kemur fram að atvinnurekendur þurfa ekki að leggja fram ráðningarsamninga til stéttarfélaganna sem er klárlega mikil afturför og gerir stéttarfélögunum mun erfiðara að fylgjast með því hvort verið sé að brjóta á réttindum erlendra starfsmanna.
Formaður Verkalýðsfélags Akraness spyr hví í ósköpunum er verið að afnema takmarkanir á frjálsri för launafólks frá nýjum aðildarríkum EES á sama tíma og það blasir við að 600 Íslendingar eru að missa atvinnu sína á Keflavíkurflugvelli?
Það liggur líka fyrir að forstjóri Vinnumálastofnunar hefur sagt að íslensk stjórnvöld eigi að fara sér hægt í því að afnema takmarkanir þar sem hann telji að menn séu ekki alveg tilbúnir með það regluverk sem til þarf. Einnig hefur ASÍ lagt til að farin yrði svokölluð danska leið en í þeirri leið hefði áfram þurft að sækja um atvinnuleyfi fyrir erlenda starfsmenn frá hinum nýju aðildarríkjum EES.
Það er líka hægt að benda á að íslensk stjórnvöld hafa ekki séð sóma sinn í því að láta þýða íslenska kjarasamninga yfir á tungumál umræddra landa. Þannig að það er afar erfitt fyrir erlenda starfsmenn frá ríkjum EES að vita hver sé réttindi þeirra á íslenskum vinnumarkaði.
Það er einnig alveg ljóst að frjálst flæði erlends vinnuafls mun stórskaða það markaðslaunakerfi sem viðgengst hefur á íslenskum vinnumarkaði á liðnum árum og áratugum. Í viðtali við varaformann Eflingar í Fréttablaðinu í gær kom fram að tímakaup byggingarverkafólks hefur lækkað umtalsvert á liðnum misserum vegna aðkomu erlends vinnuafls á íslenskan vinnumarkað. Ekki mun það batna þegar erlent vinnuafl mun flæða inná íslenskan vinnumarkað með þeim félagslegum undirboðum sem því munu fylgja. Reynslan sýnir að það eru til atvinnurekendur sem víla ekki fyrir sér að misbjóða erlendu vinnuafli bæði hvað varðar aðbúnað sem og önnur launakjör.
|
Eftirfarandi frétt birtist á heimasíðu Norðuráls í dag: Ákveðið hefur verið að flýta viðbótarstækkun Norðuráls á Grundartanga en verkefnið mun auka framleiðslugetu álversins úr 220.000 tonnum á ári í 260.000 tonn. Gert er ráð fyrir að framkvæmdum verði lokið á fjórða ársfjórðungi 2007.
Landsvirkjun hefur fallist á að veita umframorku tímabundið til að flýta gangsetningu stækkunarinnar og gera Norðuráli þannig kleift að nýta þjónustu verkfræðifyrirtækja og verktaka sem best.
Landsvirkjun áætlar að geta afhent orku frá því í júlí 2007 og fram í nóvember 2008, eða lengur, en þá er þess vænst að orka verði tiltæk frá Orkuveitu Reykjavíkur samkvæmt fyrirliggjandi langtímasamningi Norðuráls og OR. |
|
|
|
Getum einbeitt okkur fyrr að Helguvík “Við þökkum Landsvirkjun fyrir að vinna með okkur svo við getum tekið þetta skref í stækkun álversins á Grundartanga fyrr en áður var kunngert,” segir Logan W. Kruger, forstjóri Century Aluminum, móðurfélags Norðuráls. “Þessi tilhögun mun gera okkur kleift að einbeita okkur fyrr en ella að fyrirhugðu verkefni í Helguvík og ætti að auðvelda okkur að nýta áfram krafta hins hæfa og öfluga íslenska teymis sem hefur staðið sig svo vel á Grundartanga. Við höfum gert ráð fyrir að þróa Helguvíkurverkefnið í áföngum og teljum að með því móti lögum við okkur ekki aðeins að tímasetningum orkuframboðs, heldur geri það okkur einnig kleift að nýta íslenska þekkingu og mannauð eins vel og kostur er. Jafnframt teljum við að slík þrepaskipt framvinda þjóni best hagsmunum íslensks efnahagslífs.”
Álver Norðuráls á Grundartanga hafði fram á þetta ár 90.000 tonna framleiðslugetu. Í febrúar sl. hófst þar viðbótarframleiðsla á áli vegna stækkunar sem mun auka framleiðslugetu álversins í 220.000 tonn á fjórða ársfjórðungi 2006. |
Verkalýðsfélag Akraness
Kt. 680269-6889
Til skrifstofunnar geta félagsmenn leitað eftir
upplýsingum og annarri aðstoð.
300 Akranes
4309900
skrifstofa@vlfa.is
Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.
