Samkvæmt kjarasamningum sem Verkalýðsfélag Akraness er aðili að eiga lágmarks launahækkanir frá og með 1. janúar 2006 að verða sem hér segir:
Samningur SGS og SA á almennum markaði 2,5%.
Samningur SGS og ríkisins 2,5%,
Samningur SGS og launanefndar sveitarfélaganna 3,0%.
Samningur Samiðnar við SA v/iðnaðarmanna 2,5%.
Samningur Íslenska Járnblendið, Klafi og Fang 2,5%
Samningur við Norðurál 3,0%
Samningur Sjómanna við LÍÚ 3,5%
Verkalýðsfélag Akraness vekur þó athygli á því að lágmarkskauptaxtar í kjarasamningi Samiðnar hækka meira, eða um 5%. Einnig er vakin athygli á því að röðun í launaflokka í kjarasamningi SGS og SA breytist frá og með 1. janúar 2006.
Kynnið ykkur þessar breytingar hjá félaginu og skoðið kjarasamningana. Þeir eru fáanlegir á skrifstofu Verkalýðsfélags Akraness.
Verkalýðsfélag Akraness óskar félagsmönnum sínum sem og öllum landsmönnum gleðilegra jóla og farsældar á komandi ári.
Einnig vill stjórn og starfsmenn félagsins þakka félagsmönnum fyrir frábært samstarf á árinu sem nú er senn á enda.
Fyrirhugað er að halda kynningarfund fyrir félagsmenn um árangursríka aðferð til að takast á við lesblinduna. Notast er við aðferðafræði Ron Davis, sem sjálfur var mjög lesblindur en náði sjálfur miklum árangri með þessum aðferðum. Mörg þúsund manns um heim allan, hafa notað þessa aðferð með góðum árangri.
Erla S. Olgeirsdóttir og Ásta Valdís Guðmundsdóttir, Davis leiðbeinendur/ráðgjafar, munu á fundinum kynna þessar aðferðir og svara spurningum. Þær hafa báðar töluverða reynslu við að þjálfa lesblinda einstaklinga á öllum aldri.
Hægt er að bóka greiningarviðtal að fundi loknum. Í greiningarviðtölum er fundið út hvort Davis aðferðin henti einstaklingnum.
Nánari upplýsingar má fá hjá Erlu Olgeirsdóttur eða Ástu Valdísi Guðmundsdóttur og einnig hjá formanni félagsins sími 865-1294
Nánar auglýst síðar.
Formaður félagsins sat fund með starfsmönnum Fangs ehf. sem framkvæmdastjóri fyrirtækisins boðaði til. Starfsmenn Fangs sjá um ræstingu, mötuneyti, þvott, og launaútreikninga fyrir Íslenska járnblendifélagið.
Tilefni fundarins var að tilkynna starfsmönnum Fangs að Íslenska járnblendifélagið sem á Fang ehf. hefur í hyggju að gera einhverjar breytingar á rekstrinum, jafnvel eru hugmyndir um að selja Fang.
Verkalýðsfélag Akraness hefur nýverið gengið frá mjög góðum fyrirtækjasamningi við Fang ehf. sem hefur tryggt starfsmönnum afar góð launakjör, sem eru mun betri en gerast í sambærilegum störfum. Því mun Verkalýðsfélag Akraness fylgjast mjög vel með framvindu þessa máls með hagsmuni starfsmanna Fangs að leiðarljósi.
Fréttabréf Verkalýðsfélags Akraness kemur út á mánudaginn nk. Blaðinu verður dreift í öll hús á Akranesi og nágreni.
Í blaðinu eru fjölmargar fréttir og ýmsar upplýsingar um starfssemi félagsins sem gagnast geta okkar félagsmönnum. Hægt verður að nálgast fréttabréfið hér á heimasíðunni fljótlega eftir helgi.
Það var núverandi stjórn sem tók ákvörðun um að gefa út tvö vegleg fréttabréf á ári, en það hafði ekki þekkst áður hjá Verkalýðsfélagi Akraness.
Það er afar ánægjulegt að geta sagt frá því að fjórir af þeim sex félagsmönnum Verkalýðsfélags Akraness sem misstu vinnu við gjaldþrot Geca hf. hafa fengið nýja vinnu eða vilyrði um nýtt starf.
Verkalýðsfélags Akraness hefur verið sínum félagsmönnum innan handar við að fylla út atvinnuumsóknir og fleira í þeim dúr. Vonandi greiðist úr málum hina tveggja sem ekki hafa fengið vinnu mjög fljótlega.
Að lenda í því að missa atvinnuna við þessar aðstæður og það í sjálfum jólamánuðunum er afar erfitt og skilja bara þeir sem í því lenda. Því er afar mikilvægt að stéttarfélögin reyni eins og kostur er að koma félagsmönnum sínum til hjálpar eins og hægt er.
Verkalýðsfélag Akraness hefur gert viðskiptasamning við Landsbankann á Akranesi til næstu þriggja ára. Samningurinn felur í sér að öll bankaviðskipti Verkalýðsfélagsins verða færð til Landsbankans.
Ákveðið var að leita tilboða í viðskipti félagsins hjá öllum bönkum á Akranesi, þar sem samningurinn við KB Banka rennur út um næstu áramót.
Samningar náðust við Landsbankann sem lagði fram virkilega hagstætt tilboð og eru bæði stjórnendur Verkalýðsfélagsins og bankans mjög ánægðir með samkomulagið.
Starfsfólk Landsbankans á Akranesi mun leitast við að þjónusta Verkalýðsfélagið og félagsmenn sjálfa sem allra best, ásamt því að bjóða félagsmönnum ávallt bestu mögulegu kjör í bankaviðskipti þeirra.
Landsbankinn mun hafa samband við félagsmenn á nýju ári og bjóða hverjum og einum að koma á fund hjá ráðgjafa þar sem farið verður yfir kjör, veitt ráðgjöf og svarað þeim spurningum sem kunna að brenna á vörum félagsmanna varðandi fjármál.
Starfsfólk Landsbankans á Akranesi hlakkar til að takast á við það verkefni að vera viðskiptabanki Verkalýðsfélags Akraness og vonar að samstarfið eigi eftir að vera ánægjulegt og árangursríkt.
Í morgun var haldinn fundur um málefni erlends vinnuafls á Akranesi. Þetta er í annað sinn sem þessir sömu aðilar koma saman til að funda um erlent vinnuafl.
Á fyrri fundinum var ákveðið að koma á fót samstarfvettvangi með það að markmiði að reyna átta sig á hversu margir erlendir starfsmenn eru að störfum á Akranesi og til að reyna að tryggja að þeir atvinnurekendur sem hafa erlenda starfsmenn fari eftir þeim leikreglum sem gilda á íslenskum vinnumarkaði . Þeir aðilar sem koma sameignlega að þessum verkefni eru Guðmundur Páll Jónsson bæjarstjóri, Jón Pálmi Jónsson bæjarritari, Ólafur Þ. Hauksson sýslumaður á Akranesi, Vilhjálmur Birgisson formaður Verkalýðsfélags Akraness, Stefán Skjaldarson skattstjóri Vesturlandsumdæmis Tryggvi Bjarnason lögfræðingur Skattstofu Vesturlandsumdæmis og Jón S Ólafsson lögreglustjóri
Fundurinn í dag var afar gagnlegur og ljóst er að allir þeir aðilar sem sátu fundinn í dag eru að skoða málefni erlends vinnuafls, hver á sínu sviði.
Það er einnig alveg ljóst að samstarfsvettvangur þessara fjögurra aðila mun klárlega gagnast í baráttunni við þá atvinnurekendur sem ekki fara eftir þeim lögum og reglum sem gilda á íslenskum vinnumarkaði hvað varðar erlent vinnuafl. Ákveðið var að funda aftur fljótlega eftir áramót.
Bæjarstjóri Akraneskaupstaðar hefur boðað formann Verkalýðsfélags Akraness, sýslumanninn á Akranesi og skattstjóra Vesturlands til fundar.
Tilefni fundarins er að fara yfir málefni erlends vinnuafls með það að markmiði að reyna að fá einhverja heildaryfirsýn yfir hversu margir erlendir starfsmenn eru að störfum hér á Akranesi.
Einnig mun Verkalýðsfélag Akraness upplýsa skattayfirvöld og sýslumanninn um þá vinnustaði þar sem erlendir starfsmenn eru að störfum.
Þetta samráðsverkefni bæjarstjórans á Akranesi er til mikillar fyrirmyndar og sýnir í verki að bæjaryfirvöld á Akranesi vilja taka á þeim vandamálum sem fylgt hafa komu erlends vinnuafls til starfa hér á Akranesi.
Formaður félagsins hefur fundað stíft með starfsmönnum Geca hf. vegna gjaldþrots fyrirtækisins. Félagið vinnur að því að fá launaseðla og önnur gögn þannig að hægt sé að gera kröfu í þrotabúið vegna vangreiddra launa. Starfsmennirnir fengu ekki laun sín nú um mánaðarmótin eins þeir áttu rétt á. Einnig hefur ekki verið borgað inná orlofsreikninga mannanna eins og kjarasamningar kveða á um. Það er mjög erfitt að horfa uppá sína félagsmenn missa vinnu sína við þessar aðstæður og þá óvissu sem fylgir í kjölfarið. Verkalýðsfélag Akraness hefur verið að vinna að, í samvinnu við Svæðisvinnumiðlun að útvega mönnunum aðra vinnu og lítur það bara nokkuð vel út þessa stundina.
Vesturlandsblaðið Skessuhorn hefur valið Vilhjálm Birgisson formann Verkalýðsfélags Akraness sem Vestlending vikurnar. Í blaðinu kemur fram að titilinn hljóti hann fyrir einarða baráttu fyrir kjörum og réttindum erlendra starfsmanna á félagssvæði VLFA.
Formaður félagsins vill þakka Skessuhorni kærlega fyrir að velja sig sem Vestlending vikurnar. Þetta er mikil hvatning um halda áfram að verja kjör erlendra verkamanna og þeirri ógn sem steðjar að íslenskum vinnumarkaði.
Einnig vill formaður félagsins nefna þá miklu samstöðu sem ríkir í stjórn félagsins um að verja okkar félagssvæði gegn þeim undirboðum og misnotkun sem fylgt hefur erlendu vinnuafli. Stjórnin hefur tekið ákvörðun um að verja félagsvæðið með öllum tiltækum ráðum.
Fjölmiðlar þessa lands eiga hrós skilið fyrir að vekja athygli á þeim brotum sem erlent vinnuafl hefur orðið fyrir vítt og breytt um landið.
Verkalýðsfélag Akraness skilaði inn til félagsmálanefndar Alþingis tillögum um breytingar á lögum um starfsmannaleigur. Verkalýðsfélag Akraness er undrandi á að Alþýðusamband Íslands skuli ekki vera tilbúið að beita sér fyrir nauðsynlegum breytingum á frumvarpinu.
Það er mat Verkalýðsfélags Akraness að þessar breytingatillögur verði að koma inní frumvarpið til að það nái þeim tilgangi sem til frumvarpsins er ætlast.
Það er t.b með ólíkindum að það eigi að festa það í lög (gr. 16 í frumvarpinu lög nr.54/2001) að kjarasamningar á íslenskum vinnumarkaði gildi ekki að fullu fyrir starfsmenn sem starfa hér tímabundið á vegum erlendra fyrirtækja. (þjónustusamningum) Vantar þar töluvert uppá að þeim erlendu starfsmönnum sem munu starfa eftir lögum nr. 54/2001 séu tryggð lágmarkskjör.
Einnig vill félagið benda á að hendur stéttarfélaga eru algerlega bundnar hvað varðar eftirlit með kjörum þeirra sem koma á vegum starfsmannaleiga samkvæmt frumvarpinu. Það verður að veita stéttarfélögunum einhverja heimild til eftirlits með starfskjörum þessara starfsmanna sem koma á vegum starfsmannaleiga og þá í fullri samvinnu við Vinnumálastofnun.
Verkalýðsfélag Akraness hefur þó nokkra reynslu hvað varðar erlent vinnuafl og þeim vandamálum sem því hefur fylgt. Stéttarfélagið er ekki í neinum vafa að frumvarpið eins og það er nú, er alls ekki til þess fallið að leysa þann vanda sem stéttarfélögin hafa verið að glíma við á undanförnum mánuðum, því miður vantar meira til.
Breytingartillögur og greinargerð Verkalýðsfélags Akraness við frumvarp til laga um starfsmannaleigur eru eftirfarandi:
1. Á eftir 9.gr. frumvarpsins komi ný grein, 10. gr. ásamt fyrirsögn, svohljóðandi, og breytast greinatölur annarra greina samkvæmt því.
10.gr.
Ábyrgð og skyldur notendafyrirtækis.
Starfsmannaleiga skal afhenda notendafyrirtæki ráðningarsamninga þeirra starfsmanna sem leigðir eru. Er notendafyrirtæki óheimilt að nýta sér þjónustu viðkomandi starfsmanna nema ljóst sé af ráðningarsamningi að starfskjör séu í samræmi við kjarasamninga og íslenska löggjöf. Notendafyrirtæki getur leitað umsagnar viðkomandi stéttarfélags.
2. Við 10.gr. er verður 11.gr.
a. Í upphafi greinarinnar bætist ný málsgrein svohljóðandi:
Stéttarfélag getur krafið notendafyrirtæki á félagssvæði sínu um ráðningarsamninga þeirra starfsmanna starfsmannaleiga sem þar starfa sem og önnur þau gögn sem notendafyrirtæki hefur undir höndum um vinnu starfsmanna svo sem tímaskýrslur. Ef stéttarfélag telur að brotið hafi verið gegn ákvæðum laganna ber því að senda Vinnumálastofnun rökstudda kvörtun.
b. Í lok greinarinnar bætist við ný setning svohljóðandi:
Sama gildir um starfsmenn stéttarfélaga
3. Við 16.gr. er verður 17.gr. Liður a.i. orðist svo:
i. 1.tölul. 1.mgr. hljóði þannig:
Lög nr. 55/1980 um starfskjör launafólks og skyldutryggingu
lífeyrisréttinda 1.gr., 6.gr. og 7.gr.
Athugasemdir við einstaka greinar breytingatillagna.
Um lið 1.
Telja verður eðlilegt að gera þá kröfu til notendafyrirtækja að þau hafi undir höndum ráðningarsamninga og ábyrgist að kjör starfsmanna séu í samræmi við íslensk lög og kjarasamninga. Er lagt til að fyrirtækin geti leitað umsagnar viðkomandi stéttarfélags hvort svo sé. Notendafyrirtækin hafa hingað til getað skýlt sér bak við ábyrgð starfsmannaleigunnar og hefur það að mati verkalýðshreyfingarinnar torveldað allar aðgerðir til að tryggja starfsmönnum starfsmannaleiga lögbundin starfskjör. Ætla verður einnig að notendafyrirtækin hafa mun betri þekkingu á kjarasamningum og íslenskri löggjöf en starfsmannaleigur. Má ætla að ábyrgð notendafyrirtækja skapi meiri festu í þessum málum og tilraunum til að komast hjá lögboðnum launagreiðslum fækki. Þessi ábyrgð ætti ekki að íþyngja notendafyrirtækjum og geta þau falið stéttarfélögum málið með því að leita umsagnar þeirra. Samkomulag aðila vinnumarkaðarins um samráðsnefnd til að fjalla um málefni útlendinga nær almennt ekki til starfsmannaleiga þar sem þær eru í fæstum tilvikum aðilar að samtökum atvinnulífsins. Á grundvelli framangreindrar ábyrgðar notendafyrirtækis getur nefndin hins vegar kallað eftir gögnum frá þeim, m.a. ráðningarsamningi.
Um lið 2.
Telja verður að stéttarfélög á starfssvæði notendafyrirtækis sé hæfast til að hafa eftirlit með því hvort brotið sé gegn ákvæðum laganna. Þekking þeirra á kjarasamningum, nálægð og samneyti almennra félagsmanna við starfsmenn starfsmannaleiganna auðveldar þetta eftirlit. Er eðlilegt að félögin geti kallað eftir ráðningarsamningum hjá notendafyrirtækjunum sem og önnur gögn sem fyrirtækin eru með um vinnu þessara starfsmanna, svo sem tímaskýrslur. Þessi eftirlitsheimild stéttarfélaga ætti að tryggja að mál komi fyrr til athugunar hjá Vinnumálastofnun og kvartanir samkvæmt 9.gr. verði færri og rökstuðningur betri. Má ætla að þetta fyrirkomulag leiði til minna álags á Vinnumálastofnun vegna þessara mála en ella.
Um lið 3.
Í frumvarpi til laga um útsenda starfsmenn sem síðar varð að lögum nr.54/2001 um réttarstöðu starfsmanna sem starfa tímabundið á Íslandi á vegum erlendra fyrirtækja kemur fram að frumvarpið er sett fram til að innleiða ákvæði tilskipunar Evrópusambandsins nr. 96/71EB um störf útsendra starfsmanna í tengslum við veitingu þjónustu. Kemur fram í frumvarpinu að lög bandalagsins útiloki ekki einstök aðildarríki frá því að beita löggjöf sinni eða kjarasamningum gagnvart hverjum þeim sem ráðinn er til starfa á yfirráðasvæði þeirra þótt vinnuveitandinn hafi staðfestu í öðru aðildarríki, jafnvel þótt ráðningin sé tímabundinn. ( þetta kemur fram í tl. 10 og 19 í inngangi tilskipunarinnar.) Er talið eðlilegt að erlendum starfsmönnum séu tryggð sömu lágmarksréttindi og íslenskt starfsfólk nýtur á grundvelli kjarasamninga og löggjafar.
Með því er einnig tryggt að notkun á þjónustu starfsmannaleiga skekki síður samkeppnisstöðuna á íslenskum vinnumarkaði.
Fh. Verkalýðsfélags Akraness
_____________________________________
Vilhjálmur Birgisson, formaður
Óskað hefur verið eftir að fyrirtækið Geca ehf verði tekið til gjaldþrotaskipta. Það eru 6 félagsmenn VLFA sem starfa hjá Geca og hafa þeir verið í nánu sambandi við stéttarfélagið á undanförnum dögum vegna þessa. Starfsmennirnir fengu ekki greidd laun nú um mánaðarmótin vegna þeirra fjárhagsvandræða sem fyrirtækið er komið í. Verkalýðsfélag Akraness mun gæta að hagsmunum starfsmannanna eins og kostur er og mun félagið tb. sjá um að gera launakröfu fyrir alla starfsmennina sem send verður til skiptastjóra. Verkalýðsfélag Akraness er að skoða með hvaða hætti félagið getur létt undir með þeim félagsmönnum sem störfuðu hjá Geca. Það er jú skelfilegt fyrir starfsmennina að lenda í því að fá ekki laun sín greidd og það í sjálfum jólamánuðnum. Það munu líða 6 til 8 mánuðir þar til ábyrgðasjóður launa greiðir starfsmönnum þau vangreiddu laun sem þeir eiga inni hjá fyrirtækinu. Eins og áður sagði þá mun stéttarfélagið leita allra leiða til að aðstoða okkar félagsmenn. Til þess eru jú stéttarfélögin.
Verkalýðsfélag Akraness fagnar innilega að bæjaryfirvöld á Akranesi vilji leggja sitt af mörkum til þess að leikreglur á vinnumarkaði séu virtar við þátttöku erlendra starfsmanna á Akranesi og hefur verið komið á fót formlegum samstarfsvettvangi til þess að auðvelda samstarf þeirra félaga og stofnana sem vinna að málum.
|
Í morgun var haldinn fundur um málefni erlends vinnuafls á Akranesi. Það voru bæjaryfirvöld á Akranesi sem stóðu fyrir fundinum. Til fundarins voru boðaðir Ólafur Þ. Hauksson sýslumaður á Akranesi, Vilhjálmur Birgisson formaður Verkalýðsfélags Akraness, Stefán Skjaldarson skattstjóri Vesturlandsumdæmis og Tryggvi Bjarnason lögfræðingur Skattstofu Vesturlandsumdæmis Í bókun fundarins segir að aðilar séu sammála um að hafa með sér samstarf og miðla upplýsingum um málið. Guðmundur Páll Jónsson bæjarstjóri segir að boðað hafi verið til fundarins vegna þeirra umræðu sem átt hefur sér stað að undanförnu um erlenda starfsmenn hér á landi þar á meðal á Akranesi. Hann segir engan vafa á því í sínum huga að ekki hafi verið farið að settum reglum. Því hafi þótt nauðsynlegt að koma á fót samstarfsvettvangi um þessi mál. Ákveðið hefur verið að funda aftur í næstu viku. Bæjarstjórinn sagði í viðtali við skessuhorn í dag hvers vegna bæjarfélagið hafi ákveðið að koma að málinu segir hann mikla hagsmuni í húfi fyrir bæjarfélagið. Einnig sagði Bæjarstjórinn það mjög mikilvægt að staðið sé skil á útsvari vegna þeirra erlendu starfsmanna er hér starfa. Einnig er mjög mikilvægt að sveitarfélagið tryggi að jafnræði sé meðal þegnanna. Ef einstök fyrirtæki komast upp með að brjóta lög og reglur grefur það undan þeim fyrirtækjum hér um slóðir sem standa löglega að hlutum. Slíkt megum við ekki og getum ekki fallist á. Því var mjög ánægjulegt að undirtektir við að koma þessum samstarfsvettvangi á voru góðar. Þannig getum við auðveldað starf þeirra er að þessum málum koma. Sagði Guðmundur Páll Jónsson að lokum í viðtali við Skessuhornið í dag. |
Verkalýðsfélag Akraness
Kt. 680269-6889
Til skrifstofunnar geta félagsmenn leitað eftir
upplýsingum og annarri aðstoð.
300 Akranes
4309900
skrifstofa@vlfa.is
Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.
