• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Fréttir

Fréttir

12
 Oct

Trúnaðarmenn Þorgeirs og Ellerts óttast um starfsöryggi sitt vegna undirboða sem fylgja erlendum starfsmönnum sem hingað koma til starfa í gegnum erlendar starfsmannaleigur !

Trúnaðarmenn Þorgeirs og Ellerts óskuðu eftir því að funda með Verkalýðsfélagi Akraness og Félag iðn- og tæknigreina í dag.  Vildu trúnaðarmennirnir upplýsa stéttarfélögin um þær áhyggjur sem þeir og starfsmenn fyrirtækisins hafa vegna þeirrar þróunar sem átt hefur sér stað að undanförnu og lítur að erlendu vinnuafli.  Þeir telja að starfsöryggi sínu sé illilega ógnað vegna þeirra undirboða sem fylgt hafa starfsmönnum sem koma hingað koma  til starfa,  í gegnum erlendar starfsmannaleigur.  Trúnaðarmennirnir segja réttilega, að þeirra fyrirtæki sé ekki samkeppnishæft við þau fyrirtæki sem eru með erlent vinnuafl og hafi þeirra fyrirtæki því orðið undir í útboðum að undanförnu.  Trúnaðarmennirnir  krefjast þess að stéttarfélögin kanni ítarlega hver launin séu hjá þeim erlendu starfsmönnum sem eru að störfum hér á okkar félagssvæði og hvort þeir séu með þá iðnmenntun sem til þarf.  Fram kom í máli trúnaðarmannanna að ef ekki verður hægt að fá upplýsingar um kaup og kjör þessara erlendu starfsmanna, þá verði stéttarfélögin að grípa til einhverja róttækra aðgerða. Verklýðsfélag Akraness mun klárlega fylgja þessu máli eftir af fullum þunga því starfsöryggi íslensks verkafólks og íslenskra iðnaðarmanna er í húfi.

10
 Oct

Fundað um nýjan fyrirtækjasamning fyrir starfsmenn Fangs

Samningafundur var haldinn í morgun um nýjan fyrirtækjasamning fyrir starfsmenn Fangs.  Þetta var þriðji samningafundurinn sem haldinn er um nýjan fyrirtækjasamning.  Það eru örfá kjaraatriði sem útaf standa og ekki ólíklegt að gengið verði frá nýjum samningi í þessari viku.  Þau kjaraatriði sem liggja nú þegar fyrir í hinum væntanlega fyrirtækjasamningi eru atriði eins og launatafla, vinnutími, matar og kaffitímar,ferðapeningar,orlofs og desemberuppbætur.  Það sem stendur einna helst fyrir því að ekki sé hægt að ganga frá nýjum fyrirtækjasamningi er krafa starfsmanna um að sá bónus sem nú er í greiddur starfsmönnum haldi sér í nýjum samningi.  En það er skýlaus krafa stéttarfélagsins og starfsmanna að bónusinn verði tryggður með einum eða öðrum hætti í hinum nýja fyrirtækjasamningi. 

08
 Oct

Formaður Verkalýðsfélags Akraness kjörinn varaformaður Matvælasviðs sambandsins

Vilhjálmur Birgisson formaður Verklýðsfélags Akraness var kjörinn varaformaður Matvælasviðs Starfsgreinasambands Íslands á ársfundi sambandsins sem haldinn var á Akureyri 6. og 7. október.  Formaður Matvælasviðs var kjörinn Aðalsteinn Baldursson. 

07
 Oct

Ársfundi Starfsgreinasambands Íslands lauk í dag

Fimmta ársfundi Starfsgreinasambands Íslands er lokið. Í ávarpi sínu við slit fundarins sagði Kristján Gunnarsson, formaður, þetta hafa verið góðan fund. Kristján sagði m.a.: „

Okkar bíða mörg og mikilvæg verkefni. Stærst er auðvitað að ná fram leiðréttingu á kjörum okkar fólks. Það er alveg sama hvernig menn stilla þeim málum upp – og við skulum vera viðbúin alls konar mótbárum og fortölum  - forsendur kjarasamninganna hafa ekki gengið eftir og það ber að leiðrétta. Með það verkefni í farteskinu förum við af þessum fundi. “

Ræða Kristjáns er hér í heild.

Góðir félagar

Þetta er búinn að vera góður ársfundur. Hér hefur verið mikil eindrægni og góður andi. Kannski að fagurt og friðsælt umhverfi hér á Akureyri hafi haft þessi góðu áhrif á okkur, eins og Kristján bæjarstjóri fullyrti í gærmorgun.

Fyrir mér hefur þessi ársfundur verið eins og eitt samfellt sjálfsstyrkingarnámskeið. Auðvitað kemur það fyrir okkur öll, að okkur finnst lítið ganga og okkur finnst að árangur erfiðisins sé lítill. Síðan er því stundum haldið fram, að við höfum náð öllum helstu markmiðum okkar – það sé ekkert eftir til að berjast fyrir.

Ég held að Stefán Ólafsson prófessor hafi sýnt okkur fram á hið gagnstæða hér í gær, þegar hann lýsti þróun kjara í Bandaríkjunum, hjá almennu verkafólki annars vegar og hátekjufólki hins vegar. Þar kom berlega í ljós, að allur ávinningur af miklum hagvexti hefur engu skilað til láglaunafólksins, kaupmáttur þess hefur beinlínis rýrnað – á meðan hátekjufólkið og forstjórarnir hafa margfaldað sinn kaupmátt.

Hafi einhver okkar haft einhverjar efasemdir um mikilvægi starfa okkar og hlutverk, þá hljótum við að hafa læknast af þeim. Ég get ekki ímyndað mér að nokkur hér inni vilji stefna í þessa átt.  Þess vegna var þetta þörf áminning og nauðsynleg. Það er nefnilega ákveðið ástand í þjóðfélaginu núna. Ég tek heilshugar undir það sem Grétar Þorsteinsson, forseti Alþýðusambandsins sagði í ávarpi sínu í gærmorgun. Það hefur fjarað undan samfélagslegum gildum, samkennd og samhjálp.

Og sænsku félagarnir settu hlutverk okkar í alþjóðlegt samhengi. Okkar starf skiptir ekki bara máli á heimavellinum, heldur berum við ábyrgð gagnvart félögum okkar í útlöndum – og það munar um þátttöku okkar í alþjóðlegu starfi.

Í máli sænsku félaganna kom meðal annars fram að baráttu sumra félaga okkar í útlöndum er ekki síður hægt að lýsa sem mannréttindabaráttu en verkalýðsbaráttu. Það sýnir ef til vill betur en margt annað hversu tengd þessi viðfangsefni eru – barátta launafólks og mannréttindabarátta. Það er meðal annars þess vegna sem við gripum inn í þegar ríkisstjórnin ætlaði að svelta mannréttindaskrifstofuna með því að svipta hana rekstrarfé. Við getum ekki talað digurbarkalega í útlöndum og sofið á verðinum heima fyrir.

 

Ágætu félagar.

Sjálfsstyrkingin var góður undirbúningur undir umfjöllunina um atvinnu- og kjaramálin. Ég held að ég taki ekki of mikið upp í mig þó ég haldi því fram að við höfum náð að stilla saman kraftana betur en nokkru sinni. Hafi einhvern tíma verið um að ræða sundurlyndi í okkar röðum – þá er það á hröðu undanhaldi. Við finnum styrk hvert frá öðru og málin eru afgreidd í bróðerni.

Það skiptir líka miklu máli. Það hefur trúlega ekki verið jafn mikilvægt um langan tíma, þegar við höfum í huga þær aðstæður sem við búum við í dag og þau verkefni sem framundan eru. Þar má enginn skorast undan. Það sem við eigum sameiginlegt er miklu mikilvægara en smávægilegur skoðanaágreiningur.

Þegar ég sleit ársfundi Starfsgreinasambandsins fyrir ári síðan, sagðist ég vera bjartsýnn. Það var ekkert ofsagt í því. Þetta ár sem síðan er liðið gerir það að verkum að ég kom enn bjartsýnni til þessa fundar – þannig hefur starfið hjá okkur verið og sá andi sem ríkir í Starfsgreinasambandinu. Og vinnan á þessum fundi og samheldnin draga síst úr. Ég veit ekki hvar þetta endar.

Góðir félagar

Ég þakka fundarstjórunum okkar, Guðmundi Þ Jónssyni, og Ásgerði Pálsdóttur, riturum fundarins og starfsfólki góð störf. Hér hefur allt gengið vel fyrir sig.

Þá vil ég líka nota tækifærið og þakka Birni Snæbjörnssyni og hans fólki á Einingu-Iðju fyrir alla þá vinnu sem þau hafa lagt af mörkum – í undirbúningi fundarins og á honum sjálfum. Og kvöldskemmtunin í gærkvöldi var hreint frábær. Sömuleiðis vil ég þakka Aðalsteini á Húsavík og hans fólki fyrir góðar góðar gjafir. Þessa ársfundar verður líklega minnst sem gjafafundarins mikla.

Kærar þakkir Norðlendingar fyrir frábærar mótttökur.

Ég vil jafnframt óska framkvæmdastjórninni til hamingju með endurnýjað umboð og vænti áfram góðs af samstarfinu í henni.

Ágætu félagar.

Okkar bíða mörg og mikilvæg verkefni. Stærst er auðvitað að ná fram leiðréttingu á kjörum okkar fólks. Það er alveg sama hvernig menn stilla þeim málum upp – og við skulum vera viðbúin alls konar mótbárum og fortölum  - forsendur kjarasamninganna hafa ekki gengið eftir og það ber að leiðrétta. Með það verkefni í farteskinu förum við af þessum fundi.

Um leið og ég þakka fyrir samstarfið á fundinum vil ég óska ykkur góðrar og farsællar heimferðar og heimkomu.

Fimmta ársfundi Starfsgreinasambands Íslands er slitið.

Heimild SGS
05
 Oct

Ársfundur Starfsgreinasambands Íslands hefst á morgun

Ársfundur Starfsgreinasambands Íslands verður haldinn 6. og 7. október og verður ársfundurinn haldinn á Akureyri að þessu sinni.  Verkalýðsfélag Akraness á fjóra fulltrúa á ársfundinum og þeir eru Vilhjálmur Birgisson, Þórarinn Helgason, Tómas Rúnar Andrésson og Guðrún Linda Helgadóttir.  Það eru nokkur mjög stór mál sem verða til umræðu á þessum ársfundi.   Nú liggur orðið fyrir að Samtök atvinnulífsins telja að forsendur kjarasamninga séu brostnar og allt útlit er því fyrir að kjarasamningum verði sagt upp í haust.  Eflaust verður mikið rætt um þetta mál á ársfundinum.   Ársfundurinn mun klárlega fjalla ítarlega um þá þróun sem átt hefur sér stað á síðustu misserum og lítur að erlendu vinnuafli.  En stór hópur erlendra starfsmanna sem  vinnur hér á landi kemur í gegnum erlendar starfsmannaleigur.  Oft á tíðum er ekki verið að greiða þessum starfsmönnum eftir íslenskum kjarasamningum, það eru blákaldar staðreyndir.  Það er eitthvað sem Verkalýðsfélag Akraness ætlar ekki að láta viðgangast á sínu félagsvæði !

04
 Oct

Fundað var um nýjan fyrirtækjasamning fyrir starfsmenn Fangs í gær

Samningafundur var haldinn í gær um nýjan fyrirtækjasamning fyrir starfsmenn Fangs.  Eins fram hefur komið hér á heimasíðunni þá lögðu forsvarsmenn fyrirtækisins  fram drög að fyrirtækjasamningi á fundi sem haldinn var í síðustu viku.  Á fundinum í gær lagði Verkalýðsfélag Akraness fram þær breytingar á þeim drögum sem forsvarsmenn Fangs höfðu lagt fram.  Það eru ein fjögur atriði sem starfsmenn og félagið telja að þurfi að koma inn í fyrirtækjasamning til að hægt verði að ganga frá nýjum fyrirtækjasamningi.  Eru þessi atriði nú til skoðunar hjá forsvarsmönnum Fangs.   Næsti fundur verður 10. október 

30
 Sep

Fundað um málefni dönsku smiðanna sem starfa hjá Ístaki

Verkalýðsfélag Akraness, Starfsgreinasamband Íslands og Samiðin funduðu í dag um málefni Ístaks og þá afstöðu sem Samtök atvinnulífsins hafa tekið í því máli.  Ákveðið var á fundinum að fela trúnaðarmanni  Ístaks  að óska eftir gögnum um kjör dönsku smiðanna, sem og kjör annarra erlendra starfsmanna sem á svæðinu starfa.  Því miður er það alltof algengt að fyrirtæki greiða ekki erlendum starfsmönnum eftir þeim kjarasamningum sem um störfin gilda.  Einnig   lagði  Verkalýðsfélag Akraness fram launaseðla og ráðningarsamninga frá þýskum smiðum sem starfa hér á Akranesi og sýna launaseðlarnir að ekki er verið að greiða eftir íslenskum kjarasamningum.  Verkalýðsfélag Akraness og Samiðn munu óska eftir fundi með fulltrúum fyrirtækisins sem hér um ræðir.  Verkalýðsfélag Akraness var búið að gera athugasemdir við launakjör þessara þýsku smiða, en fyrirtækið ákvað að vísa málinu til Samtaka atvinnulífsins og hafnaði að leiðrétta laun starfsmannanna.   

29
 Sep

Verkalýðsfélag Akraness, Starfsgreinasamband Íslands og Samiðin munu funda á morgun vegna Ístaks

Verkalýðsfélag Akraness, Starfsgreinasamband Íslands og Samiðn munu funda á morgun.  Á fundinum verður rædd um þá afstöðu sem Samtök atvinnulífsins eru með varðandi útlendinga sem starfa hér tímabundið og vísa Samtökin í lög nr.54/2001 í því sambandi.  En í bréfi sem SA sendi Verkalýðsfélagi Akraness kemur fram að erlendir starfsmenn sem koma hingað í gegnum erlendar starfsmannaleigur og starfa hér tímabundið njóta ekki fullra kjara samkvæmt íslenskum kjarasamningum.  Einnig segir í bréfinu frá SA að einungis þurfi að tryggja erlendum starfsmönnum sem hingað koma til starfa tímabundið, lágmarkslaun, yfirvinnugreiðslur, orlof, lágmarksvinnutíma og hámarksvinnutíma.   Um þessa afstöðu SA verður rædd um á fundinum á morgun.

Forsvarsmenn Fangs lögðu fram drög að nýjum fyrirtækjasamningi á fundi í dag
28
 Sep

Forsvarsmenn Fangs lögðu fram drög að nýjum fyrirtækjasamningi á fundi í dag

Fundur var haldinn í dag vegna nýs fyrirtækjasamnings fyrir starfsmenn Fangs ehf.  Forsvarsmenn Fangs lögðu fram  drög að nýjum fyrirtækjasamningi á fundinum.  Í þessum drögum er margt mjög jákvætt og greinilegt að vilji er hjá forsvarsmönnum Fangs til að klára þetta mál sem allra fyrst.  Samt sem áður eru ein fjögur atriði sem þarfnast nánari skoðunar við og ekki hægt að samþykkja nema einhver breyting komi til.  Formaður félagsins fundaði strax með starfsmönnum eftir að samningafundinum lauk og kynnti drögin.  Starfsmenn nefndu nokkur kjaraatriði sem klárlega þurfa að vera í nýjum fyrirtækjasamningi til að þeir geti samþykkt samninginn.  Verkalýðsfélag Akraness er samt sem áður nokkuð bjartsýnt á að nýr fyrirtækjasamningur líti dagsins ljós fljótlega, og það jafnvel í næstu viku.  Reyndar veltur það allt á því hvort niðurstaða næst um þau fjögur atriði sem út af standa.

27
 Sep

Undarleg afstaða Samtaka atvinnulífsins

Ístak er hvorki vinnuveitandi né launagreiðandi þessara starfsmanna. Vinnuveitandi og jafnframt launagreiðandi þeirra er GM Staffing.” Þetta segir í bréfi yfirlögfræðings Samtaka atvinnulífsins, til Verkalýðsfélags Akraness, um 50 danska iðnverkamenn sem starfa að stækkun álversins á Grundartanga undir verkstjórn og á vegum Ístak.  SA undirstrikar það sjónarmið, að fyrirtæki innan SA séu óskuldbundin af þeim kjarasamningum sem samtökin hafa gert, m.a. við Starfsgreinasamband Íslands, vegna þeirra stafsmanna sem fluttir eru til landsins á vegum starfsmannaleiga. SA kemst m.o.ö að þeirri niðurstöðu að hluti starfsmanna sé ,,stikk frí” frá leikreglum á íslenskum vinnumarkaði og þá fyrirtækin líka um leið. 
 

SA heldur því t.d. fram í bréfinu, að meirihluti starfsmannanna sé í stéttarfélagi í Danmörku, og því beri Ístak hvorki skylda né geti skilað stéttarfélagsgjöldum af umræddum starfsmönnum, eins og ákvæði kjarasamnings SA og SGS gerir ráð fyrir. SGS gerir ekki athugasemdir við það að fyrirtæki frá Norðurlöndum, vinni sjálf verk á Íslandi með sínu fólki, enda er íslenska verkalýðshreyfingin í nánu samstarfi við þá á Norðurlöndum og gagnkvæm félagsaðild viðurkennd. Þannig hefur danska verktakafyrirtækið Phil og Søn unnið á Íslandi og Ístak á Grænlandi svo dæmi sé tekið af störfum fyrirtækja innan Norðurlandanna. Í sumum tilvikum á þetta einnig við um önnur Evrópulönd og eru þá gefin út vottorð um stéttarfélagsaðild milli landanna.

Það sem er alvarlegt í þessari yfirlýsingu SA núna er hin afar þrönga lögskýring, að fyrirtæki innan SA séu óbundin af kjarasamningum, vegna þess að starfsmenn svokallaðra starfsmannaleiga eiga í hlut.

Hvernig starfsmannaleigur sniðganga ákvæði kjarasamninga og lög um starfskjör á íslenskum og norrænum vinnumarkaði er vel þekkt. Það sem er nýtt er að SA skuli taka undir það sjónarmið að þeir atvinnurekendur sem velja að nota vinnuafl frá starfsmannaleigum, séu sjálfir ,,stikkfrí" frá samningsbundum starfskjörum. Með því er SA að taka undir með þeim sem grafa undan leikreglum á vinnumarkaðnum. SA grefur undan samkeppnisstöðu sinna eigin félagsmanna, sem vilja standa sig á markaði og grefur einnig undan gagnkvæmu trausti aðila vinnumarkaðarins. Slíkt er ólíðandi.

Það er að vísu þekkt að SA og áður Vinnuveitendasamband Íslands, hafa barist með oddi og egg fyrir því láglaunakerfi launataxta sem hér ríkir.  En að SA vilji beinlínis stuðla að því með aðgerðum sínum og athöfnum, að réttlæta, að því er virðist, þau fyrirtæki sem stunda ólögmæt undirboð, með því að nota starfsmannaleigur eins og Ístak gerir, er alveg nýtt, hvort sem starfsmannaleigan er skráð í Danmörku, hérlendis eða í öðrum löndum.

Starfsgreinasamband Íslands mun far gaumgæfilega í saumana á þessari undarlegu stefnu Samtaka atvinnulífsins, auk þess sem fjallað verður um grundvallaratriði á vinnumarkaði á komandi ársfundi sambandsins, sem hefst 6. október n.k.

Birtist á vef SGS
Page 175 of 207

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image