Samningafundur var haldinn með forsvarsmönnum Norðuráls í dag. Fundað var í húsakynninum ríkissáttasemjara. Ekkert markvisst gerðist á fundinum í dag en aðilar eru að ræða saman og reyna að finna einhverja lausn sem báðir aðilar geta verið ásáttir með. Ljóst er samt sem áður að töluvert ber á milli aðila. Á morgun munu nokkrir úr samninganefnd stéttarfélaganna funda með hagfræðingi ASÍ og fulltrúum Norðuráls. Eftir þennan fund á morgun mun væntanlega verða ákveðið hvernig framhaldinu verður háttað í þessum viðræðum
Skrifað var undir viðauka við kjarasamning Íslenska járnblendifélagsins seinni partinn í dag hjá ríkissáttasemjara. Það sem hefur áunnist frá því að kjarasamningurinn var felldur er að það er búið að flýta róteringu starfmanna milli starfsstöðva niður í einn mánuð. Starfsmenn fóru fram á að kaupaukar á vissum svæðum yrðu áfram til staðar. Það er skemmst að frá því að segja að fyrirtækið samþykkti alla þá staði sem starfsmenn óskuðu eftir að yrðu áfram kaupaukaskildir. Greiðsla fyrir hvern kaupauka verður 41.72 króna. Varðandi bónusmálin þá samþykkti fyrirtækið að hafa lágmarksbónus næstu þrjá mánuði uppá 4.2% en samningsaðilar höfðu gert ráð fyrir að meðaltalsbónus þessa árs yrði 2.2%. Vegna skilatímana þá mun fyrirtækið ekki standa fyrir námskeiðum á sumarorlofstímanum og einnig mun fyrirtækið tilkynna starfsmönnum með tveggja vikna fyrirvara hvenær námskeiðin verða haldinn.
Það kemur bókun um að taka upp samvinnu og samráð milli starfsmanna og fulltrúa fyrirtækisins, nefndin verður skipuð þremur fulltrúum starfsmanna og þremur fulltrúum frá fyrirtækinu.
Eingreiðsla vegna breytinga á bónuskerfinu hækkar úr 15.000 þúsund í 50.000 þúsund. Orlofs og desemberuppbótin hækkar úr 92.327 í 96.704.
Þetta voru helstu atriðin sem breyttust.
Ákveðið hefur verið að kynna samninginn í þessari viku og verður fyrsta kynningin á miðvikudaginn en þá koma A vaktin og síðan B vaktin.
Á fimmtudeginum verða það dagmenn sem fá sína kynningu.
Á föstudaginn verða E vaktin og síðan D vaktin og að endingu á sunnudeginum verður það C vaktin sem fær sína kynningu. Hægt verður að kjósa um samninginn eftir hverja kynningu fyrir sig.
Samningafundur verður haldinn á morgun vegna kjarasamnings Norðuráls. Ákveðið hefur verið að funda í húsakynnum ríkissáttasemjara þó svo að ekki sé búið að vísa deilunni til sáttasemjara. Samningsaðilar eru sammála að gott geti verið að funda hjá sáttasemjara þar er nóg pláss ef aðilar þurfa að funda í sitt í hvoru lagi. Fundurinn hefst kl. 14:30
Fundað verður hjá ríkissáttasemjara í dag vegna kjaradeilu stéttarfélaganna við Íslenska járnblendifélagið fundurinn hefst kl 13. Eins og áður hefur komið fram hér á síðunni þá var gengið frá samkomulagi um róteringu ofngæslumanna á fundi fyrir helgi. Það eru nokkur atriði sem starfsmenn vilja einnig sjá breytingu á t.d kaupaukana og bónusinn. Vonandi tekst að klára þessu deilu í dag og Verkalýðsfélag Akraness sæmilega bjartsýnt á að það geti tekist þó vissulega geti brugðið til beggja vona í þeim efnum.
Fundað var með aðstoðarforstjóra og framleiðslustjóra Íslenska járnblendifélagsins í gær. Tilefni fundarins var að ræða róteringu ofngæslumanna sem og samskiptamálin á milli starfsmanna og stjórnenda sem hafa því miður ekki verið nægilega góð á liðnum árum. Það er skemmst frá því að segja að forsvarsmann Íj komu með ýmsar góðar tillögur sem leitt gætu til bættrar samskipta milli aðila. Verkalýðsfélag Akraness finnur fyrir verulegri stefnubreytingu hjá stjórnendum íj, og er þessi stefnubreyting klárlega til góðs fyrir starfsmenn Íslenska járnblendifélagsins. Gengið var frá samkomulagi við framleiðslustjóra ÍJ um flýtingu starfsmanna á milli starfsstöðva (róteringu). Samkomulagið er fólgið í því að ofngæslumenn færast á milli starfa á eins mánaðar fresti í stað þriggja áður.
Vissulega vildu starfsmenn róterast á milli starfa á einnar tarnar fresti, þetta er hins vegar niðurstaðan og eru trúnaðartengiliðir nokkuð sáttir með þessa niðurstöðu því, komið hefur verið töluvert til móts við vilja starfsmanna . Rótering var eitt af þeim málum sem starfsmenn voru afar óánægðir með og vildu knýja fram breytingu á. Nú eru nokkur atriði eftir sem deiluaðilar eru að reyna að finna lausn á t.b kaupaukum sem og bónus starfsmanna. Verkalýðsfélag Akraness óskaði eftir því við trúnaðartengiliðina að þeir kæmu með á fundinn sem verður haldinn hjá ríkissáttasemjara á mánudaginn kemur, það er mikilvægt að trúnaðartengiliðirnir séu með á lokasprettinum. Einnig er nauðsynlegt fyrir Verkalýðsfélag Akraness að hafa trúnaðartengiliðina með til aðstoðar við ákvörðunartöku á þeim ágreiningsatriðum sem eftir eru . Vonandi tekst að ganga frá nýjum kjarasamningi við Íslenska járnblendifélagsins á mánudaginn kemur.
Fundað var með forsvarsmönnum Norðuráls í gærmorgun. Efni fundarins var að fara yfir tilboðið sem Norðurálsmenn lögðu fram á fimmtudaginn, og einnig gerðu stéttarfélögin grein fyrir sinni afstöðu gagnvart tilboði fyrirtækisins. Verkalýðsfélag Akraness gerði forsvarsmönnum Norðuráls grein fyrir afstöðu félagsins til tilboðsins. Einnig gerði formaður félagsins forsvarsmönnum Norðuráls grein fyrir því að Verkalýðsfélag Akraness mun ekki undirrita nein kjarasamning við Norðurál, sem ekki tekur á þeim mikla launamun sem er á milli sambærilegra verksmiðja.
Þetta tilboð sem lagt var fram af forsvarsmönnum Norðurál tók ekkert á þessum mikla launamun sem er á milli sambærilegra verksmiðja ekki neitt. Forsvarsmenn Norðuráls verða að gera sér grein fyrir því strax að þennan launamun þarf að jafna, annað munu starfsmenn Norðuráls ekki sætta sig við og eins og áður hefur komið fram vinnur Verkalýðsfélag Akraness eftir þessum vilja starfsmanna.
Samningafundur var haldinn í morgun vegna kjarasamnings Norðuráls, fundurinn hófst kl 9:00. Forsvarsmenn Norðuráls lögðu fram tilboð um nýjan kjarasamning á fundinum í morgun. Stéttarfélögin eru þessa stundina að kostnaðarmeta þetta nýja tilboð sem forsvarsmenn Norðuráls lögðu fram. Það liggur samt fyrir að þetta tilboð er að mati Verkalýðsfélags Akraness langt frá því að vera ásættanlegt. Krafan frá starfsmönnum er hvell skýr eins og ítrekað hefur komið fram hér á heimasíðunni. Krafan byggist á því að jafna launamuninn á við aðrar sambærilegar verksmiðjur, annað er ekkert sanngirni. Verkalýðsfélag Akraness mun hvergi hvika frá þeirri kröfu starfsmanna. Samninganefnd stéttarfélaganna mun funda sameiginlega í fyrramálið og fara yfir stöðuna. Einnig hefur verið ákveðið að funda aftur með forsvarsmönnum Norðuráls á föstudaginn þar sem stéttarfélögin munu væntanlega svara tilboði fyrirtækisins.
Samningafundur verður á morgun kl 11:00 vegna kjarasamnings Norðuráls. Samninganefnd stéttarfélaganna fundaði í morgun og fór yfir stöðuna og lagði línurnar fyrir fundinn með forsvarsmönnum Norðuráls. Verkalýðsfélag Akraness veit hvað starfsmenn vilja bæði hvað lítur að vaktafyrirkomulagi og einnig kröfuna um að jafna launamuninn við sambærilegar verksmiðjur. Þetta eru þær kröfur sem starfsmenn Norðuráls leggja mestu áherslu á og eftir þessum kröfum starfsmanna mun Verklýðsfélag Akraness vinna.
Samningafundur var haldinn í dag vegna kjaradeilu stéttarfélaganna við Íslenska járnblendifélagið, fundað var í matsal starfsmanna. Til fundarins voru boðaðir allir í samninganefnd stéttarfélaganna ásamt trúnaðartengiliðunum. Fyrir hönd fyrirtækisins voru allir forsvarsmenn fyrirtækisins mætir, ásamt Hannesi Sigurðssyni og Ragnari Árnasyni frá Samtökum atvinnulífsins. Niðurstaðan af fundinum var sú að deiluaðilar myndu einblína á að reyna að leysa þau atriði sem starfsmenn eru hvað mest ósáttir með t.b róteringu, kaupauka og bónusmál. Það kom skýrt fram hjá forsvarsmönnum Íj að fyrirtækið er ekki tilbúið að auka kostnaðarþátt samningsins, meira heldur enn þeir væru í raun og veru búnir gera. Þeir voru samt sem áður tilbúnir til að skoða nokkur atriði nánar. Ætla deiluaðilar að funda um kaupaukana á fimmtudaginn og róteringuna á föstudaginn, vonandi finnst einhver lausn á þessum tveimur atriðum á þessum fundum. Ríkissáttasemjari lagði áherslu á að deiluaðilar verði komnir með þessi ágreiningsatriði á hreint þegar deiluaðilar funda aftur, en til hans hefur nú þegar verið boðað og verður sá fundur haldinn í húsakynnum sáttasemjara mánudaginn 14 feb.
Ríkissáttasemjari mun koma á samningafund sem haldinn verður á morgun vegna kjaradeilu stéttarfélaganna við ÍJ. Fundurinn verður haldinn í matsal Íslenska járnblendifélagsins á Grundartanga og hefst fundurinn kl 13:00. Stéttarfélögin létu forsvarsmenn Íj hafa þær viðbótar kröfur sem starfsmenn gerðu á síðasta samningafundi sem haldinn var um miðjan febrúar. Starfsmenn telja að þessar nýju kröfur þurfi að koma til viðbótar til að hægt verði að ganga frá nýjum kjarasamningi. Á fundinum á morgun munu forsvarsmenn ÍJvæntanlega svara kröfum starfsmanna hvort fyrirtækið geti orðið við þeim eða ekki. Það skýrist líklega heilmikið eftir fundinn á morgun hvernig framhaldið verður í þessari mjög svo erfiðu kjaradeilu.
Samninganefnd stéttarfélaganna ásamt trúnaðarmönnum Norðuráls munu funda á morgun kl 11:00. Efni fundarins er að fara yfir stöðuna og leggja línurnar fyrir fundinn með forsvarsmönnum Norðurlás sem verður á miðvikudaginn nk. Samningsaðilar munu að öllum líkindum funda mun stífar heldur en gert hefur verið að undanförnu, frekar rólegt hefur verið yfir viðræðunum á liðnum dögum. Einnig er ekki ósennilegt samningsaðilar fari að hefja viðræður á fullum krafti um það sem skiptir alla starfsmenn mestu máli, sem eru að sjálfsögðu hækkanir á launaliðum kjarasamningsins.
Stjórn orlofssjóðs fór í alla sumarbústaði sem eru í eigu félagsins og kynnti sér ástand þeirra og hvað þyrfti að lagfæra áður en sumarúthlutunin hæfist. Það er mat stjórnar orlofssjóðs að ástand bústaðanna sé í nokkuð góðu lagi, samt er alltaf eitthvað sem þarf að lagfæra. Það er nú þegar búið að mála (lakka) þrjá bústaði að innan þ.e í Hraunborgum, Svínadalnum og í Húsafelli. Einnig hefur verið ákveðið að setja nýtt parket á bústaðin í Húsafelli fljótlega. Í bústaðnum í Svínadal verður skipt um eldavél og ísskáp svo eitthvað sé nefnt. Einnig eru nokkur smáatriði sem þarf að lagfæra í flestum bústöðunum. Það er gríðarlega mikilvægt að allir sem einn gangi vel um bústaðina þetta eru jú eigur okkar allra sem erum félagsmenn í Verkalýðsfélagi Akraness. Því miður ganga einstaka félagsmann ekki nægilega vel um. Rétt er það það komi skýrt fram að lang flestir félagsmenn ganga mjög vel um og skila bústöðunum í góðu ásigkomulagi.
Næsti samningafundur við forsvarsmenn Norðuráls verður miðvikudaginn 9. mars. Eru viðræðurnar væntanlega að fara á fulla ferð aftur, eftir nokkurt hlé. Krafa starfsmanna liggur fyrir og er krafan hvell skýr. það er að jafna launamuninn sem er á milli Norðuráls og annarra sambærilegra verksmiðja. Þetta er verkefnið sem bíður samninganefndarinnar og Verkalýðsfélag Akraness mun að sjálfsögðu vinna eftir vilja starfsmanna.
Formaður félagsins fundaði með trúnaðartengiliðum Íslenska járnblendifélagsins í dag. Fóru tengiliðirnir yfir stöðuna ásamt formanni og kom skýrt fram hjá trúnaðartengiliðinum að mjög góð samstaða væri á meðal starfsmanna í þessari kjaradeilu. Ef forsvarsmenn Íj koma ekki til móts við kröfur starfsmanna að einhverju leiti þá stefnir í virkilega hörð átök. Þetta var mat trúnaðartengiliðina og tekur Verkalýðsfélag Akraness heilshugar undir þessar skoðanir tengiliðina.
Verkalýðsfélag Akraness
Kt. 680269-6889
Til skrifstofunnar geta félagsmenn leitað eftir
upplýsingum og annarri aðstoð.
300 Akranes
4309900
skrifstofa@vlfa.is
Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.
