Kynningarfundur um nýgerðan kjarasamning verður haldinn á morgun kl. 13:30 með starfsmönnum Íslenska járnblendifélagsins. Það verða ofngæslumenn sem verða á fundinum á morgun. Á fimmtudaginn verður síðan haldinn kynningarfundur með dagmönnum. Formaður félagsins mun fara mjög ítarlega yfir nýgerðan kjarasamning á þessum kynningarfundum. Hægt verður að kjósa um samninginn eftir báða fundina, og einnig geta starfsmenn kosið alveg fram til
kl. 12:00 þriðjudaginn 15. febrúar.
Samningafundur um vaktafyrirkomulag starfsmanna Norðuráls var haldinn í morgun. Samningsaðilar veltu fyrir sér ýmsum möguleikum á fundinum í morgun með breytingu á vaktafyrirkomulagi starfsmanna Norðuráls í huga. Eru samningsaðilar að skoða þessi mál hvor í sínu lagi og ætla að funda aftur á miðvikudaginn 9. feb kl. 8:30.
Samningafundur verður haldinn í fyrramálið um nýjan kjarasamning við Norðurál. Það sem verður til umræðu á fundinum á morgun er vaktafyrirkomulag starfsmanna. Krafan er skýr frá starfsmönnum það er að fá fimmta vakthópinn inn. Þessi krafa starfsmanna vegur afar þungt í þessum kjaraviðræðum. Verkalýðsfélag Akraness hefur undir höndum áskorun frá starfsmönnum á vöktum, þar sem þeir skora á samninganefnd stéttarfélaganna að tryggja að bætt verði fimmta vakthópnum inn. Einnig skoruðu starfsmenn á samninganefndina að laun og önnur kjaraatriði verði jöfnuð við starfsmenn Alcan (Ísals). Eftir þessari áskorun starfsmanna mun Verkalýðsfélag Akraness vinna eftir.
Formaður félagsins fór í vinnustaðaheimsókn í dag til að heyra í og svara spurningum starfsmanna Íslenska járnblendifélagsins vegna nýs kjarasamnings. Mat formanns eftir þessa vinnustaðafundi, er að það er afar brýnt að starfsmenn kynni sér eins vel og kostur er innihald samnings. Verkalýðsfélag Akraness vill undirstrika hversu nauðsynlegt það er að allir starfsmenn séu vel upplýstir um sín launakjör og önnur kjaraatriði sem starfsmenn hafa áunnið sér inn á liðnum árum og áratugum. Kynningafundir með verkamönnum um nýgerðan kjarasamning verða haldnir dagana þriðjudaginn 8. febrúar og síðan með dagmönnum fimmtudaginn 10. febrúar, báðir fundirnir hefjast kl. 13:30. Enn og aftur ítrekar Verkalýðsfélag Akraness það við sína félagsmenn að hafa samband ef þeir þurfa að fá skýringar á nýgerðum samningi.
Samningafundur um nýjan kjarasamning var haldinn í morgun með forsvarsmönnum Norðuráls. Á fundinum í morgun voru samningsaðilar að klára að fara yfir kröfur stéttarfélaganna grein fyrir grein. Samningsaðilar voru sammála um að funda mjög stíft í næstu viku. Ætla samningsaðilar að funda alla næstu viku þar sem rætt verður um breytingu á vaktafyrirkomulagi starfsmanna. Krafa starfsmanna er skýr, það er að fá fimmta vakthópinn inn. Einnig verður líka fundað um bónusmál starfsmanna í næstu viku.
Starfsmenn Íslenska járnblendifélagsins óskuðu eftir því hvort formaður félagsins sæi sér fært að koma á vinnustaðinn og fara lauslega yfir nýgerðan kjarasamning. Að sjálfsögðu varð formaður félagsins við þessari beiðni, og afar ánægjulegt að starfsmenn skuli leita til félagsins til að fá skýringar á nýjum kjarasamningi. Það liggur fyrir að það verður stjörnufundur fljótlega eftir helgi þar sem farið verður yfir samninginn í heild sinni. Það gætti viss misskilnings á nokkrum atriðum og það er mjög mikilvægt að starfsmenn hafi samband við formann félagsins séu starfsmenn ekki vissir um viss kjaraatriði. Hægt er að hafa samband við formann félagsins og óska eftir upplýsingum um nýgerðan kjarasamning hvenær sem er, endilega ef menn eru ekki vissir um einhver atriði í samningum.
Það sem starfsmenn voru að velta fyrir sér var hvort , gamli bónusinn uppá 5.44% og sala á kaupaukum uppá 3% séu inn í heildarkostnaðarmati samningsins, sem hljóðar uppá 20,36% á samningstímanum. Nei alls ekki flutningur á gamla bónusnum og sala á kaupaukunum hefur ekkert með 20.36% að gera. Það er eðlilegt að starfsmenn vilji fá skýringar við þessum atriðum, eins og áður sagði er mjög jákvætt að geta svarað þeim atriðum sem starfsmenn eru að óska skýringa á. Þetta eru jú ykkar launakjör og því afar mikilvægt að starfsmenn séu vel upplýstir um innihald kjarasamningsins. Mun Verkalýðsfélag Akraness ekki láta sitt eftir liggja í að upplýsa starfsmenn um kjör sín og réttindi almennt.
Samtals 20.36%
Eins og áður sagði er fyrirhugað að halda stjörnufund fljótlega eftir helgi. Fæ svar í dag hvenær fundurinn verður nákvæmlega. Á stjörnufundinum verður farið ítarlega yfir samninginn. Samt sem áður endilega að hafa samband vilji starfsmenn fá upplýsingar um nýgerðan kjarasamning.
Gengið var frá nýjum kjarasamningi við forsvarsmenn Íslenska járnblendifélagsins á fimmta tímanum í dag. Heildarkostnaðarmat samningsins er 20,36% á samningstímanum. Samningurinn gildir frá 1. desember 2004 og til 30. nóvember 2008. Það sem er nýtt í þessum kjarasamningi er að það er tekið upp nýtt bónuskerfi sem samningsaðilar eru sammála um að geti gefið starfsmönnum 2,2% á árinu 2005 og væntingar eru um að bónusinn verði farinn að gefa um 5,64% árið 2006. Gamla bónuskerfið verður lagt niður og meðaltalsbónus síðustu ára upp á 5,44% verður fluttur inn í launataxta. Það á að vera búið að greiða atkvæði um nýjan samning fyrir kl. 16:00, fimmtudaginn 17. febrúar n.k. Farið verður í kynningu á kjarasamningnum á næstu dögum. Formaður félagsins hefur fundað 48 sinnum þar af 16 sinnum hjá ríkissáttasemjara, vegna þessa nýja kjarasamnings við Íslenska járnblendifélagið. Það er alveg hægt að fullyrða að gríðarleg vinna og orka hefur farið í þessa kjaradeilu. Verkalýðsfélag Akraness vill þakka trúnaðarmönnum Íj kærlega fyrir þeirra framlag sem hefur verið ómetanlegt, því að gegna starfi trúnaðarmanns getur verið afar vanþakklátt starf. Einnig vill Verkalýðsfélag Akraness þakka ríkissáttasemjara fyrir hans dyggu stjórn í þessum viðræðum og einnig hans góða starfsfólki fyrir gott samstarf.
Samningafundi með forsvarsmönnum Norðuráls var rétt í þessu að ljúka. Það sem samningsaðilar gerðu á þessum fundi var að fara yfir kröfur stéttarfélaganna, grein fyrir grein og miðar þeirri vinnu ágætlega. Samningsaðilar hafa ekkert rætt um launaliði samningsins, og verður væntanlega farið í þær viðræður fljótlega. Næsti fundur hefur verið boðaður fimmtudaginn 3. febrúar kl. 8:30.
Samningafundi við forsvarsmenn Íslenska járnblendifélagsins var frestað til kl. 13:00 á morgun. Stéttarfélögin komu fram með nýja hugmynd á fundinum í dag, til lausnar á þessari erfiðu kjaradeilu. Forsvarsmenn Íslenska járnblendifélagsins báðu um frest eins og áður sagði til morguns sem stéttarfélögin að sjálfsögðu veittu. Það er einlæg von Verkalýðsfélags Akraness að þessari svo mjög erfiðu kjaradeilu ljúki með nýjum kjarasamningi á morgun. Því beri samningsaðilum ekki gæfa til að leysa þessa deilu á fundinum á morgun, er veruleg hætta á að harka hlaupi í þessa kjaradeilu.
Samninganefnd Norðuráls fundaði í morgun. Samninganefndin var að fara yfir stöðuna, eins og hún lítur út eftir að Alcan gekk frá sínum samningi. Samninganefndin mun funda með forsvarsmönnum Norðuráls í fyrramálið og verður haldið áfram við að fara yfir kröfur stéttarfélaganna. Vaktavinnumenn hafa verið duglegir að minna formann félagsins á þá skýlausu kröfu um, að fá fimmta vakthópinn inn. Þeirri kröfu hefur verið komið vel til skila til forsvarsmanna Norðuráls, og munu samningsaðilar eflaust hefja viðræður um fimmta vakthópinn fljótlega.
Fundað verður hjá ríkissáttasemjara vegna kjaradeilu stéttarfélagana við Íslenska járnblendifélagið. Skilaboðin eru skýr hvað Verkalýðsfélag Akraness varðar, mánudagurinn er úrslitastund um það hvort gengið verður frá nýjum kjarasamningi án átaka eða ekki. Eftir samtölum sem formaður félagsins hefur átt við forsvarsmenn Íslenska járnblendifélagsins síðustu daga var ekki annað að heyra en forsvarsmenn Íj hafi mikinn áhuga á að reyna að klára nýjan kjarasamning við starfsmenn Íslenska járnblendifélagsins á fundinum á mánudaginn. Það verður hinsvegar að koma í ljós hvort það tekst eða ekki, fundurinn hefst kl. 14:00.
Það verður mikið um að vera í samningamálum hjá Verkalýðsfélagi Akraness eftir helgi. Strax á mánudagsmorgun mun samninganefnd Norðuráls hittast og fara yfir stöðu mála. Alcan hefur lokið við að gera sinn kjarasamning og gefur samningurinn starfsmönnum (Ísals) 20.47% á samningstímanum. Það liggur því fyrir að launabilið á milli starfsmanna Norðuráls og starfsmanna Alcan hefur aukist enn frekar og er orðið allverulegt. Það mun því reyna mikið á samninganefnd Norðuráls að minnka þetta launabil eins mikið og kostur er. Því krafa starfsmanna Norðruáls er skýr, það er sambærileg laun og starfsmenn Alcan hafa.
Samningafundur um nýjan kjarasamning var haldinn í dag við forsvarsmenn Norðuráls. Eru samningsaðilar rétt að byrja að fara yfir þau kjaraatriði sem stéttarfélögin hafa gert að kröfu sinni. Næsti samningafundur er þriðjudaginn 1. febrúar.
Aðalfundur opinberrar deildar var haldinn í kvöld. Kosið var í stjórn deildarinnar og þeir sem skipa stjórnina eru: Steinunn G. Guðjónsdóttir meðstjórnandi, Guðrún Guðbjartsdóttir varameðstjórnandi, ritari Sigurlaug Guðmundsdóttir og vararitari Ásgerður Magnúsdóttir. Formaður deildarinnar er Sigríður Sigurðardóttir og varaformaður er Hrönn Ásgeirsdóttir. Formaður félagsins vill að það komi skýrt fram að það hefur verið afar ánægjulegt að eiga samskipti við þá sem tilheyra opinberu deildinni. Sér í lagi hefur verið gott samstarf við starfsfólk á Sjúkrahúsi Akraness. Vill formaður félagsins þakka trúnaðarmönnum SHA og einnig þeim sem eru í samráðsnefnd SHA kærlega fyrir frábært samstarf á liðnu ári.
Það kom fram hjá starfsmönnum SHA að þær eru afar óánægðar með þá ákvörðun stjórnenda SHA að breyta um vinnufyrirkomulag. Telja að álag hafi aukist til mikilla muna eftir þessar breytingar, og nokkrar hafi lækkað í launum. Formaður félagsins og starfsmenn sendu forsvarsmönnum SHA í desember áskorun og yfirlýsingu þar sem þessari ákvörðun var harðlega mótmælt. En því miður breytti það ekki ákvörðun stjórnenda SHA. Formaður félagsins kynnti að fyrirhugað væri að koma á námskeiðum fyrir starfsmenn SHA og óskaði formaðurinn eftir tillögum um hvernig námskeið starfsmenn vilja fara á.
Verkalýðsfélag Akraness
Kt. 680269-6889
Til skrifstofunnar geta félagsmenn leitað eftir
upplýsingum og annarri aðstoð.
300 Akranes
4309900
skrifstofa@vlfa.is
Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.
