• Sunnubraut 13, 300 Akranes
  • Mán - Föst: 8.00 - 16.00
20
Mars

Orlofshús - Sumar 2018

Á Félagavefnum er nú opið fyrir umsóknir um dvöl í orlofshúsum félagsins sumarið 2018 (Veljið Orlofshús-umsókn til að leggja inn umsókn). Umsóknareyðublöð eru einnig á leiðinni til félagsmanna í pósti. Umsóknarfrestur er til 9. apríl og fer úthlutun fram daginn eftir. Þeir sem ætla að póstleggja umsóknir ættu að hafa það í huga að hafi umsókn ekki borist félaginu 9. apríl er ekki hægt að skrá hana fyrir úthlutun.

Auk orlofshúsa sem félagið á í Húsafelli, Svínadal, Kjós, Ölfusborgum, Hraunborgum og á Akureyri verður boðið upp á dvöl í húsi í Vestmannaeyjum eins og síðustu ár. Því til viðbótar mun VLFA hafa húsaskipti við Framsýn stéttarfélag og geta félagsmenn VLFA dvalið í orlofshúsi á Illugastöðum í Fnjóskadal tímabilið 15. júní til 24. ágúst. Í staðinn geta félagsmenn Framsýnar dvalið í Bláskógum í Svínadal. Einnig hefur félagið tekið eitt hús á leigu í Flókalundi í 6 vikur í sumar.

Úthlutun fer þannig fram að allar umsóknir eru skráðar inn í tölvukerfi félagsins. Við úthlutun raðar kerfið öllum umsóknum í röð eftir punktastöðu, þ.e. þeir umsækjendur sem flesta hafa punktana eru fremstir í röðinni og svo koll af kolli. Ef punktar tveggja eru jafnir fær sá úthlutað sem fyrr sótti um. Kerfið vinnur sig síðan í gegnum umsóknirnar og úthlutar vikum eftir punktastöðu. Þeir félagsmenn sem fá úthlutað geta strax séð það á Félagavefnum, en þar mun myndast bókun sem hægt er að greiða með greiðslukorti. Greiða þarf fyrir úthlutaðar vikur í síðasta lagi 24. apríl. Hafi vika ekki verið greidd fyrir þann tíma er litið svo á að félagsmaðurinn ætli ekki að nýta úthlutaða viku og vikunni er úthlutað aftur.

Þeir sem ekki fá úthlutað í fyrri úthlutun lenda sjálfkrafa í endurúthlutun þar sem þeim vikum er úthlutað sem ekki voru greiddar á eindaga fyrri úthlutunar. Leyfilegt er að breyta umsóknum og leggja inn nýjar fyrir endurúthlutun.

Helstu dagssetningar 2018:

9. apríl - Frestur til að skila inn umsóknum um orlofshús.

10. apríl - Fyrri úthlutun fer fram, allir umsækjendur fá svarbréf í pósti (einnig er hægt að sjá strax hvort bókun hafi myndast inni á Félagavefnum).

24. apríl  - Eindagi fyrri úthlutunar, þeim vikum sem ekki eru greiddar á eindaga er úthlutað aftur.

2. maí  - Endurúthlutun fer fram, þeir sem fá úthlutað fá það staðfest með bréfi.

2. maí - Kl. 12:00 - Fyrstir koma, fyrstir fá! Þeir sem fyrstir koma geta bókað lausar vikur, líka á Félagavefnum (athugið að eftir eindaga endurúthlutunar getur lausum vikum fjölgað).

11. maí  - Eindagi endurúthlutunar, ógreiddar vikur verða lausar til bókunar á Félagavefnum.

14
Mars

Íbúðarfélagið Bjarg ætlar að reisa 33 leiguíbúðir á Akranesi

Í dag klukkan 17:00 mun Bjarg íbúðarfélag undirrita viljayfirlýsingu við Akraneskaupstað um að reistar verði 33 íbúðir við Asparskóga 12-14-16 á Akranesi. Gert er ráð fyrir því að framkvæmdir hefjist síðsumars og að íbúðirnar verði afhentar á fyrsta ársfjórðungi 2019. 

Rétt er að geta þess að Bjarg íbúðafélag er húsnæðissjálfseignastofnun sem stofnuð var af verkalýðshreyfingunni og er Verkalýðsfélag Akraness því aðili að íbúðarfélaginu Bjargi. Rétt er líka að geta þess að Bjarg íbúðarfélag er rekið án hagnaðarmarkmiða og er ætlað að tryggja tekjulágum fjölskyldum á vinnumarkaði aðgengi að hagkvæmu, öruggu og vönduðu íbúðarhúsnæði í langtímaleigu. Um er að ræða svokölluð leiguheimili að danskri fyrirmynd “Almene boliger”.

Verkalýðsfélag Akraness fagnar þessari viljayfirlýsingu innilega enda mun þessi leigukostur sem Bjarg býður upp á gefa tekjulágu fólki kost á aðgengi að hagkvæmu, öruggu og vönduðu íbúðarhúsnæði í langtímaleigu.

Leiðarljós íbúðarfélags Bjargs eru:

– Öryggi
– Langtímalausn
– Hagkvæm leiga
– Vandaðar og vel hannaðar íbúðir
– Spennandi kostur fyrir fólk á leigumarkaði

09
Mars

Formenn VR, Eflingar og Verkalýðsfélags Akraness funda í dag

Það má klárlega halda því fram að straumhvörf hafi orðið í íslenskri verkalýðsbaráttu þegar kom í ljós að B-listi undir forystu Sólveigar Önnu Jónsdóttur hafi borið sannfærandi sigur í stjórnarkjöri í stéttarfélaginu Eflingu. En sigur Sólveigar var gríðarlega stór þar sem hennar listi fékk 80,17% greiddra atkvæða og því liggur algerlega fyrir að umboð hennar getur vart verið skýrara.

Um leið og það lá fyrir að B-listi Sólveigar Önnu Jónsdóttur ætlaði að bjóða fram til stjórnarkjörs í Eflingu og það lá fyrir að áherslur B-listans samræmdust algjörlega áherslum Verkalýðsfélags Akraness ákvað formaður að styðja B-listafólk opinberlega enda mikilvægt að fólk sem hefði sömu sýn og við í VLFA næði kjöri þar. Það var ekki bara að formaður lýsti opinberlega yfir stuðningi við Sólveigu Önnu og hennar fólk heldur fór formaður einnig með henni á þrjá vinnustaði til að fara yfir þá miklu baráttu sem þarf til að ná árangri við að lagfæra kjör íslensks verkafólks.  

Það má segja að við sem höfum stjórnað Verkalýðsfélagi Akraness frá árinu 2004 höfum beðið eftir þessum degi lengi enda liggur fyrir núna að nýr meirihluti hafi náð yfirhöndinni innan ASÍ.  Meirihluti þar sem formenn þeirra stéttarfélaga hafa sömu sýn, áherslur og stefnur þegar kemur að því að lagfæra kjör lágtekjufólks og kröfur á hendur stjórnvöldum. Þessi meirihluti samanstendur af VR, Eflingu, Framsýn og Verkalýðsfélagi Akraness en þessi fjögur stéttarfélög hafa 53% vægi innan ASÍ. Þessu til viðbótar liggur fyrir að fleiri stéttarfélög, sérstaklega innan Starfsgreinasambands Íslands, munu að öllum líkindum taka undir þessar nýju áherslur og stefnubreytingar sem þessi félög munu leggja áherslu á. 

Hver hefði trúað því að þessar gríðarlegu breytingar myndu eiga sér stað á forystu tveggja stærstu stéttarfélaga innan ASÍ? Í fyrra vann Ragnar Þór Ingólfsson glæsilegan sigur til formennsku í VR en vinátta og sameiginleg sýn á stéttarfélagsbaráttu formanns VLFA og VR hefur verið til staðar frá því hann tók við formennsku. Eftir þennan mikla sigur Sólveigar Önnu til formennsku í Eflingu styrkist staða þessa bandalags til mikilla muna enda hefur Sólveig Anna sömu sýn á hvernig heyja á verkalýðsbaráttu eins og formenn VR og VLFA.

Það er morgunljóst að með þessum glæsilegu sigrum Ragnars Þórs og Sólveigar Önnu til formanns í tveimur af stærstu stéttarfélögum á Íslandi hafa verið send skýr skilboð um að svokallaðri samræmdri láglaunastefnu verði algjörlega hafnað og krafa um markvissari og róttækari  verkalýðsbaráttu verði tekin upp þar sem unnið verði af alefli að því að lagfæra kjör lágtekjufólks.

Það er líka ljóst að Samtök atvinnulífsins og stjórnvöld verða að opna augun fyrir þeim staðreyndum að þessi meirihluti mun ekki og ætlar sér ekki að sætta sig við þá misskiptingu, óréttlæti og ójöfnuð sem hefur fengið að viðgangast í íslensku samfélagi í marga áratugi.

Krafan verður skýr. Lagfæra þarf lægstu tekjur þannig að ráðstöfunartekjur þeirra hækki umtalsvert.  Það er hægt að gera bæði með krónutöluhækkunum sem og breytingu á skattkerfinu þar sem horft verður á að létta á skattbyrði þeirra sem höllustum fæti standa í íslensku samfélagi.

Það er líka mikilvægt fyrir stjórnvöld að átta sig á því að meirihluti innan ASÍ mun ekki láta þetta skefjalausa dekur við fjármálaöflin átölulaust lengur. Dekur sem byggist á okurvöxtum, verðtryggingu og því að húsnæðisliðurinn sé inni í lögum um vexti og verðtryggingu.  Einnig er morgunljóst að taka verður á hinum tryllta leigumarkaði þar sem græðgivæðingin hefur svo sannarlega tekið sér bólfestu enda nægir að nefna í þessu samhengi að leiguverð á höfuðborgarsvæðinu hefur hækkað um 75% frá árinu 2011 á meðan lægstu laun hafa einungis hækkað um 52% á sama tíma. Svo tala menn um fordæmalausa kaupmáttaraukningu hjá þeim tekjulægstu!

Já það er af nægu að taka en eitt af því sem þessi meirihluti mun klárlega leggja áherslu á er að samið verði um krónutöluhækkanir í stað prósentuhækkana enda eru prósentuhækkanir aflgjafi misskiptingar, óréttlætis og eykur á ójöfnuð í íslensku samfélagi.

Í dag ætla formenn VLFA, VR og nýkjörinn formaður Eflingar að funda og fara yfir stöðuna og stilla saman strengi sína en það er ljóst að þessir formenn hafa sömu sýn á hvernig eigi að fara í næstu kjarasamningsgerð en kjarasamningar á hinum almenna vinnumarkaði verða lausir um áramótin næstu.

En eitt er víst að Samtök atvinnulífsins og stjórnvöld skulu átta sig á því að þessi hópur mun taka upp ný vinnubrögð þar sem ekki verður liðið að byrja kjarasamningsviðræður í nóvember og ljúka þeim mörgum mánuðum eftir að kjarasamningar runnu út. Slík vinnubrögð og eftirgjöf er liðin og núna verður aldrei liðið að kjarasamningar verði ekki klárir um leið og nýr samningur rennur út.

05
Mars

Stoðar lítt að vera með forsenduákvæði í kjarasamningum ef ekki á að nýta þau þegar forsendur eru brostnar

Formannafundur ASÍ sem haldinn var fimmtudaginn 28. febrúar 2018, samþykkti í atkvæðagreiðslu að segja ekki upp kjarasamningum. Alls greiddu 49 atkvæði en þeir voru með 79.062 félagsmenn (heilsársstörf) á bak við sig.

 

Niðurstaða formanna: 

Já, vil segja upp 21 (42,9%)

Nei, vil ekki segja upp 28 (57,1%)

 

Vægiskosning:

Já 52.890 (66,9%)

Nei 26.172 (33,1%)

Í atkvæðagreiðslunni þurfti bæði meirihluta fundarmanna sem fóru með atkvæði á fundinum og meirihluta þess atkvæðavægis sem að baki þeim standa. Þar sem ekki náðist meirihluti fundarmanna var tillaga um uppsögn samninga felld.

Kjarasamningar á almennum vinnumarkaði munu því gilda til ársloka.

 

Formaður félagsins skal fúslega viðurkenna að hann hefur verið mjög hugsi eftir þennan formannafund. Hann er hugsi yfir því af hverju myndaðist ekki breið samstaða um uppsögn kjarasamninga. Sérstaklega í ljósi þess að degi fyrir formannafundinn fékk almenningur í þessu landi fréttir af því að laun forstjóra Landsvirkjunar hafi verið hækkuð um 800 þúsund á mánuði. Það má líka segja að það stoði lítt að vera með forsenduákvæði í kjarasamningum og fara síðan ekkert eftir þeim þegar forsendur eru brostnar.

Þessu til viðbótar kom líka frétt í gær sem kvað á um að launakostnaður 26 lykilstjórnenda viðskiptabankanna þriggja hafi numið rúmum 1 milljarði í fyrra. Þessu öllu til viðbótar hefur legið fyrir að kjararáð hefur hækkað embættismenn og æðstu ráðamenn þjóðarinnar í launum frá árinu 2013 frá 500 þúsundum á mánuði upp í allt að 750 þúsund eða sem nemur 64% uppí tæp 75%

Á sama tíma hafa lágmarkslaunataxtar verkafólks hækkað um 65 þúsund á mánuði eða sem nemur 34%. Þetta þýðir að ef lágmarkslaun hefðu tekið sömu breytingum og kjararáð gaf æðstu ráðamönnum þjóðarinnar frá árinu 2013 þá væru lágmarkslaun ekki 280 þúsund á mánuði heldur 356 þúsund í dag, hér munar 76 þúsundum á mánuði.

Atburðir síðustu daga voru því svo sannarlega kornið sem fyllti mælirinn hjá okkur í Verkalýðsfélagi Akraness og því töldum við ekkert annað í stöðunni en að segja þessum kjarasamningum upp enda fordæmalaus forsendubrestur búinn að eiga sér stað.

Það voru því gríðarleg vonbrigði að ekki skyldi nást meirihluti hjá formönnum fyrir uppsögn þótt rétt sé að geta þess að þeir formenn sem vildu segja samningum upp voru með um 70% félagsmanna að baki sér.

Formaður VLFA gerði grein fyrir  afstöðu stjórnar á formannafundinum og færði góð og gild rök fyrir því af hverju ætti að segja kjarasamningum upp og rakti m.a. allt þetta sem hér kemur fram á fundinum í dag.

Formaðurinn kom líka inn á þann skefjalausa blekkingarleik sem stundaður er þegar talað er um að það sé búin að eiga sér stað fordæmalaus kaupmáttaraukning og þá sérstaklega hjá þeim tekjulægstu.Hann benti á þá bláköldu staðreynd að leiguverð á höfuðborgarsvæðinu og víðar hefur samkvæmt opinberum gögnum hækkað um 75% frá árinu 2011, en á sama tíma hafa lágmarks launataxtar hækkað um 64%. Semsagt bullandi kaupmáttarskerðing hjá lágtekjufólki sem er á leigumarkaði en ekki kaupmáttaraukning eins reynt er að halda fram af Samtökum atvinnulífsins og fleirum.

Formaðurinn sagði líka hátt og skýrt á fundinum að Verkalýðsfélag Akraness muni aldrei taka þátt í nýju vinnumarkaðsmódeli að norrænni fyrirmynd sem gengur út á að skerða og takmarka samningsfrelsi stéttarfélaga og beisla möguleika launafólks að sækja sér alvöru kjarabætur. Hann sagðist vita að Samtök atvinnulífsins, hluti af forystu ASÍ og stjórnvalda hafi verið og muni halda áfram að reyna að koma þessu „fjandans“ vinnumarkaðsmódeli á.

Á þessari forsendu m.a. er formaður afar hugsi og gríðarlega svekktur yfir því að formannafundurinn hafi ekki sameinast um að segja samningum upp og krefja atvinnurekendur um leiðréttingar á forsendubrestinum og einnig krafið stjórnvöld um aðgerðir vegna okurvaxta, afnáms verðtryggingar og að húsnæðisliðurinn færi úr lögum um vexti og verðtryggingu sem og að hækka persónuafsláttinn sem kemur þeim tekjulægstu best. Öll Þessi atriði sem formaður kom inn á í sinni ræðu á formannafundinum, skipta öll miklu máli fyrir launafólk og heimili þessa lands.

Núna þarf að hugsa hvaða leikir eru í stöðunni og formaður ætlar rétt að vona að menn fari ekki að vinna bakvið tjöldin að nýju vinnumarkaðsmódeli en því miður grunar formanni VLFA að svo verði. En eitt er víst að VLFA mun beita sér af alefli gegn öllum slíkum hugmyndum er lúta að nýju Salek samkomulagi!

27
Feb

Stjórn og trúnaðarráð VLFA vill segja upp kjarasamningum

Stjórn- og trúnaðarráð Verkalýðsfélags Akraness hefur samþykkt að segja upp kjarasamningum á hinum almenna vinnumarkaði ef atvinnurekendur og stjórnvöld leiðrétta ekki þann forsendubrest sem orðið hefur.

 Það er morgunljóst að umtalsverður forsendubrestur hefur orðið á kjarasamningnum á hinum almenna vinnumarkaði og það stoðar lítt að vera með forsenduákvæði í kjarasamningum ef þau eiga ekki að virkjast þegar forsendubrestur hefur átt sér stað.

Stjórn og trúnaðarráð Verkalýðsfélags Akraness vill að það komi skýrt fram að það er alltaf ánægjuefni þegar fólk hækkar í launum og stjórn og trúnaðarráð horfir ekki á forsenduákvæði kjarasamninga eins og æðsta forysta ASÍ sem virðist horfa á það með þeim hætti að ákvæðin eigi að halda niðri öðrum launahópum. Stjórn og trúnaðarráð Verkalýðsfélags Akraness horfir á forsenduákvæðið með þeim hætti að ef aðrir hópar semja um meira en samið var um á hinum almenna vinnumarkaði þá beri að leiðrétta það til samræmis við þær hækkanir sem um ræðir í hvert skipti.

 Eins og áður sagði er það alltaf ánægjulegt þegar launahópar ná fram góðum samningum og það liggur til dæmis fyrir að grunnskólakennarar sömdu um meira en um var getið í kjarasamningum á hinum almenna vinnumarkaði árið 2016. Nú liggur fyrir að flugvirkjar hafa samið um töluvert meira og einnig eru umtalsverðar líkur á að flugstjórar hjá Icelandair Group hafi samið um meira en launabreytingar á hinum almenna vinnumarkaði kváðu á um. Allt er þetta ánægjulegt eins og áður hefur komið fram en krafan er skýr, almennt launafólk vill að forsendubrestur samkvæmt ákvæðum kjarasamnings verði leiðréttur þannig að ekki þurfi að koma til uppsagnar.

Síðan má ekki gleyma kjararáði og æðstu stjórnendum ríkisins en nú liggur fyrir að þingfararkaupið hafi hækkað um rúm 74% frá árinu 2013 til dagsins í dag en á sama tíma hafa lágmarkslaun einungis hækkað um 37%. Ráðherrar hafa hækkað um 64% í launum á meðan verkafólk hefur hækkað um 37% eins og áður sagði.

Því má segja ef kjarasamningi verði sagt upp þá er krafan skýr, að lágmarkslaun á Íslandi taki sömu hækkunum og kjararáð hefur hækkað æðstu stjórnendur ríkisins um frá árinu 2013 sem þýðir að lágmarkslaun þurfa að hækka úr 280.000 kr. í 356.000 kr. til að dekka þá hækkun sem kjararáð veitti vegna hækkunar á þingfararkaupi þingmanna.

Bara í dag kom síðan frétt um ofurlaun æðstu stjórnenda í viðskiptabönkunum þremur, að ógleymdum miklum hækkunum til stjórnenda Landsvirkjunar en þar kom fram að forstjóri Landsvirkjunar hafi hækkað um 45% í launum á síðasta ári eða sem nemur 800 þúsund króna hækkun á mánaðarlaunum hans.

 Að þessu sögðu er morgunljóst og hvellskýrt að íslensk verkalýðshreyfing getur ekki undir nokkrum kringumstæðum látið það átölulaust að enn og aftur eigi almennt lágtekjufólk, almenn verkafólk að sitja eftir án þess að fá neinar leiðréttingar eða breytingar á sínum kjörum en eins og allir vita eru lægstu laun og taxtar langt undir öllum framfærsluviðmiðum sem hið opinbera hefur gefið út og lífsins ómögulegt fyrir verkafólk að láta enda ná saman frá mánuði til mánaðar og halda mannlegri reisn. Íslenskt verkafólk vill stöðugleika og sá stöðugleiki á að vera fyrir alla, ekki bara suma.

16
Feb

Ísfiskur hefur starfsemi á Akranesi - 24 ný fiskvinnslustörf

Það er virkilega ánægjulegt að Ísfiskur er í dag að hefja starfsemi hér á Akranesi en Ísfiskur keypti fiskvinnsluhús HB Granda eftir að þeir tóku ákvörðun um að hætta vinnslu á bolfiski á Akranesi.

Í dag hafa verið ráðnir 24 fiskvinnslumenn og -konur en vonir standa til að Ísfiskur muni jafnvel fjölga starfsmönnum enn frekar eftir að starfsemin verður komin á fullt skrið.

Eins og áður sagði eru þetta gríðarlega jákvæðar fréttir að líf sé að færast í þetta merka fiskvinnsluhús að nýju eftir nokkurra mánaða stopp, enda hafa veiðar og vinnsla á sjávarafurðum skipt okkur Akurnesinga mjög miklu máli.

Verkalýðsfélag Akraness vill óska eigendum og starfsmönnum Ísfisks innilega til hamingju með að hafa hafið starfsemi hér á Akranesi og er félagið ekki í neinum vafa um að eiga gott samstarf við fyrirtækið í náinni framtíð.

Fréttir

Style Switcher
Layout Style
Predefined Colors
Background Image