Formaður Verkalýðsfélags Akraness hefur ákveðið að senda formlegt erindi til forsvarsmanna Íslenska járnblendifélagsins, þar sem óskað verður eftir að mæliákvarðar í nýtingabónusnum verði endurskoðaðir.
Það eru þættir í bónusnum sem hafa því miður alls ekki verið að virka sem skildi. Þó er einn þátturinn af þremur í nýtingabónusnum sem er sýnu verstur og er það í hreinsuðum málmi, sá þáttur í bónusnum hefur ekki skilað þeim ávinningi sem samningsaðilar voru sammála um að hann gæti gert.
Í kaflanum um endurskoðun á bónuskerfinu kemur fram að í febrúar ár hvert er hægt að endurskoða mælikvarða í bónuskerfinu. Sú endurskoðun getur átt sér stað ef mælikvarðarnir liggja í efrimörkum eða neðrimörkum til langs tíma litið. Núna hefur d liðurinn í nýtingarbónusnum legið frá byrjun kjarasamningsins í neðrimörkunum og ekkert sem bendir til að þar sé að verða nein breyting á.
Formaður félagsins telur það afar brýnt að breyta mælikvarðanum í d lið nýtingarbónussins því allt bendir til að hann sé alltof hár.
Þar sem endurskoðun og breyting á mælikvörðum getur einungis átt sér stað í febrúar ár hvert, þótti formanni VLFA nauðsynlegt að senda formlegt erindi um málið.
Opinn kynningarfundur sem Verkalýðsfélag Akraness stóð fyrir um árangursríka aðferð til að takast á við lesblindu var haldinn miðvikudaginn 8. febrúar og tókst mjög vel í alla staði. Vel á þriðja tug manna sóttu fundinn og hlýddu á þær Erlu Olgeirsdóttur og Ástu Guðmundsdóttur Davis ráðgjafa fara yfir hvernig hægt er að hjálpa fólki sem er lesblint með Davis aðferðinni.
Fundarmönnum var boðið að skrá sig í greiningarviðtal þar sem kannað er hvort Davis aðferðin henti viðkomandi einstaklingi. Þó nokkrir skráðu sig í greiningarviðtal á fundinum. Í greiningarviðtali kemur í ljós hvort Davis aðferðin hentar viðkomandi. Ef Davis ráðgjafar telja að Davis aðferðin henti þá er hægt að fara í Davis leiðréttingu.
Þær Erla og Ásta fóru mjög vel yfir hvernig Davis leiðrétting fer fram. Hún felst í 30 klst. vinnu maður á mann, sem oftast er dreift yfir 5 daga í röð. Þá hefur viðkomandi fengið í hendurnar þau tæki sem hann þarf til að leiðrétta lesblinduna og finnur strax greinilega breytingu. Að 5 daga leiðréttingu lokinni þarf um 80 klukkustunda heimavinnu á 1-2 árum, til að tryggja þann árangur sem náðst hefur og leiðrétta lesblinduna til fulls.
Formaður Verkalýðsfélags Akraness vill minna fullgilda félagsmenn á að starfmenntasjóður félagsins veitir styrk til þeirra sem fara í Davis leiðréttingu og einnig fyrir þá sem fara í greiningarviðtal hjá Davis ráðgjafa.
Formaður félagsins hefur verið að bera saman grunnlaun hjá þeim sem starfa hjá sveitarfélögunum og þeim sem starfa á hinum almenna vinnumarkaði. Þegar þessi samanburður er skoðaður þá kemur í ljós að það munar vel á þriðjatug þúsunda á launum á milli þessara tveggja samninga fyrir mjög svo sambærileg störf.
Samanburðurinn á milli kjarasamnings Starfsgreinasambands Íslands við Launanefnd sveitafélaga og kjarasamnings við Samtök atvinnulífsins á hinum almenna vinnumarkaði er eftirfarandi:
| Almenni markaðurinn | Sveitafélögin | ||
| Ræstingafólk | 109.212 | 138.278 | Mismunur 29.066 eða 26,6% |
| Aðstoðarmaður í mötuneyti | 109.212 | 138.278 | Mismunur 29.066 eða 26,6% |
| Almennt verkafólk | 108.000 | 140.352 | Mismunur 32.352 eða 30% |
| Hafnarverkamenn | 115.914 | 142.458 | Mismunur 26.544 eða 23% |
| Sérhæfðir verkamenn | 119.418 | 148.965 | Mismunur 29.547 eða 25% |
| Matráður I | 114.201 | 142.458 | Mismunur 28.257 eða 25% |
| Tækjamaður II | 128.646 | 151.199 | Mismunur 22.553 eða 17.5% |
Þessi samanburður miðast við 7 ára starfsreynslu á almenna markaðnum og hjá sveitafélögunum að starfsmaðurinn hafi náð 36 ára aldri.
Það verður að vera skýlaus krafa að þessi launamunur verði leiðréttur og það sem allra fyrst. Annars verða stéttarfélögin að gera þá kröfu til fulltrúa ASÍ í forsendunefndinni að kjarasamningum verði sagt upp í desember þegar endurskoðunin fer fram
Formannafundur Starfsgreinasambandsins var haldinn í dag. Það voru tvö mál sem helst voru til umræðu á fundinum. Fyrra málið var um heimild Launanefndar sveitafélagana til hækkunar á lægstu launa Síðara málið var um breytingar á lögum Alþýðusambandsins sem lýtur að reglugerðum sjúkrasjóða aðildarfélaga ASÍ.
Á fundinum voru formenn SGS almennt mjög ánægðir með þá ákvörðun Launanefndarinnar að heimila hækkun á launum þeirra sem lægstu hafa launin hjá sveitarfélögunum. Það liggur hins vegar ekki fyrir hvort öll sveitarfélög muni nýta sér þessa heimild.
Formaður Verkalýðsfélags Akraness upplýsti á fundinum að Akraneskaupstaður hafi nú þegar tekið ákvörðun um að fullnýta heimildir Launanefndarinnar.
Formaður Verkalýðsfélags Akraness hvatti sé hljóðs á fundinum og sagði það gríðarleg vonbrigði að Samtök atvinnulífsins skyldu hafna alfarið að fylgja að fordæmi Launanefndar sveitafélaga um hækkun lægstu launa.
Verkalýðsfélag Akraness hefur ítrekað sýnt framá að kjarasamningurinn sem gerður var við verkafólk á hinum almenna vinnumarkaði 7. mars 2004 gaf langtum minna en aðrir kjarasamningar eða einungis 15,8% á samningstímanum.
Samanburður sem Ólafur Darri hagfræðingur ASÍ gerði á þeim kjarasamningum sem gerðir voru á tímabilinu mars 2004 til miðs árs 2005, sína svo ekki verður um villst hvernig verkafólk á almenna vinnumarkaðnum var skilið illilega eftir. Samkvæmt samanburði hagfræðingsins kemur fram að kostnaðarmat margra kjarasamninga var á bilinu 20 og alveg uppí 37% þegar tekið hefur verið tillit til samningstíma samningana. En eins og áður sagði þá var kostnaðarmat kjarasamningsins á almenna markaðnum einungis 15,8%
Þessa vegna skilur formaður Verkalýðsfélags Akraness ekki hvernig það gat gerst að fulltrúar ASÍ í forsendunefndinni um endurskoðun kjarasamninga, hafi ekki beitt sér fyrir sérstaklegri hækkun handa þeim sem taka laun eftir kjarasamningi á hinum almenna vinnumarkaði, þegar endurskoðunin átti sér stað í desember. Það virðist ekkert tillit hafa verið tekið til þess að verkafólk á almenna markaðinum fékk mun minna í kostnaðarhækkanir heldur en kjarasamningar hjá öðrum starfsstéttum.
Forsendunefndin um endurskoðun kjarasamninga komust að þeirri niðurstöðu í desember 2005. Að allir skildu fá það sama eða 26 þúsund í eingreiðslu og hækkun um 0,6% í janúar 2007. Burt séð frá því hversu mikill kostnaðarmunur væri á milli kjarasamningana. Þessi niðurstaða forsendunefndarinnar er að mati formanns félagsins fáránleg.
Það svo sorglegt að sjá hvernig almennt verkafólk hefur farið út úr sínum kjarasamningi að það verður vart með tárum tekið.
Kjarasamningur sem Starfsgreinasambandið gerði við Launanefnd sveitafélagana í maí 2005 gaf 24% á samningstímanum og núna hefur Launanefndin gefið sveitarfélögunum heimild til að hækka lægstu launin um allt að 12% til viðbótar.
Á sama tíma hafna Samtök atvinnulífsins alfarið að fylgja að fordæmi Launanefndarinnar og hækka lægstu launin með sambærilegum hætti og sveitafélögin hafa heimild til.
Á fundinum í dag lá fyrir ályktun þar sem krafist var að SA og ríkið beiti sér fyrir sambærilegum hækkunum til þeirra sem lægstu hafa launin. Formaður Verkalýðsfélags Akraness lagði til við fundinn að bætt væri við ályktunina og var það samþykkt. Viðbótin var eftirfarandi:
"Það er mat fundarins að samningsforsendur kjarasamninga SGS við ríki og SA séu brostnar, ef ekki koma til hækkanir á hinum almenna vinnumarkaði með sambærilegum hætti".
Ef SA og ríkið munu ekki lagfæra laun þeirra sem lægstu hafa launin verða aðildarfélög innan Starfsgreinasambandsins að beita sér af fullum þunga fyrir því að kjarasamningum verði sagt upp þegar endurskoðun fer fram í desember.
Á morgun verður birtur hér á heimasíðunni samanburður á launum í sambærilegum störfum eftir því hvort unnið er hjá sveitafélögunum eða á hinum almenna vinnumarkaði. Launamunurinn er nokkuð sláandi fyrir sambærileg störf.
Opinn kynningarfundur um lesblindu verður haldinn miðvikudaginn 8. febrúar kl. 20:00. Fundurinn verður haldinn að Kirkjubraut 40 3. hæð. Fundur er öllum opinn og skorar stjórn Verkalýðsfélagsins Akraness á sem flesta að mæta og kynna sér hvaða úrræði eru í boði. Það eru Davis ráðgjafarnir Erla S. Olgeirsdóttir og Ásta Valdís Guðmundsdóttir sem munu kynna aðferðir til að takast á við lesblindu og einnig munu þær svara spurningum frá fundarmönnum.
Verkalýðsfélag Akraness auglýsir kynningarfund
Áttu í erfiðleikum með lestur, skrift eða stærðfræði?
Opinn kynningarfundur um árangursríka aðferð til
að takast á viðlesblindu
verður haldinn
Miðvikudaginn 8. febrúar kl. 20 í sal félagsins að Kirkjubraut 40.
Erla S. Olgeirsdóttir og Ásta Valdís Guðmundsdóttir, Davis ráðgjafar, munu á fundinum kynna þessar aðferðir og svara spurningum. Þær hafa báðar töluverða reynslu við að þjálfa lesblinda einstaklinga á öllum aldri.
Hægt er að bóka greiningarviðtal að fundi loknum.
Í greiningarviðtölum er fundið út hvort Davis aðferðin henti einstaklingnum.
Rétt í þessu var að ljúka fundi sem formaður félagsins átti með bæjarráði Akraneskaupstaðar. En eins og áður hefur komið fram hér á heimasíðunni þá var Verkalýðsfélag Akraness búið að gera kröfu um að launakjör starfsmanna Akraneskaupstaðar yrðu samræmd kjarasamningi sem Efling gerði við Reykjavíkurborg. Á fundinum rétt áðan var bæjarráð að svara kröfu félagsins. Það er skemmst frá því að segja að bæjarráð ætlar að nýta sér heimild launanefndar sveitarfélagana til fullnustu. Sem þýðir að launakjör þeirra sem lægstu hafa launin hækka um allt að 12%. Verkalýðsfélag Akraness fagnar innilega þessari niðurstöðu hjá bæjarráði.
Nú verður að beita miklum þrýstingi á Samtök atvinnulífsins og ríkið um að hækka laun þeirra sem lægstu hafa launin á almenna markaðinum og hjá ríkinu. Sú hækkun verður að vera með sambærilegum hætti og sveitafélögin eru að gera þessa stundina. Þeir sem eru á lægstu töxtunum og starfa á hinum almenna vinnumarkaði eru að fá allt að 20% minni launahækkanir á samningstímanum heldur en þeir sem starfa hjá sveitarfélögunum og voru að fá lagfæringu á sínum launum.
Við það getur verkafólk á hinum almenna vinnumarkaði alls ekki sætt sig við. Núna verður verkalýðshreyfingin að knýja Samtök atvinnulífsins og ríkið til að lagfæra launakjör þeirra sem allra lægstu launin hafa og það með öllum tiltækum ráðum sem til eru.
Verkalýðsfélag Akraness
Kt. 680269-6889
Til skrifstofunnar geta félagsmenn leitað eftir
upplýsingum og annarri aðstoð.
300 Akranes
4309900
skrifstofa@vlfa.is
Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.
