Verkalýðsfélag Akraness vill minna á kynningarfund sem verður haldinn í dag um nýgerðan kjarasamning við Launanefnd sveitarfélaga.   Fundurinn verður haldinn  í fundarsal félagsins að Sunnubraut 13.  Kosið verður um samning í póstatkvæðagreiðslu og verða kjörgögn send út á morgun og verður hægt að kjósa um samning til kl 12:00 mánudaginn 20. júní nk.  Hægt er að nálgast samning á skrifstofu félagsins sem og hér á heimasíðunni.  Félagsmenn eru hvattir til að mæta á kynningarfundinn.

Helstu atriði samnings eru eftirfarandi:

Helstu atriði nýs kjarasamnings

Ný launatafla

Mánaðarlaun þeirra sem gegna fullu starfi, skulu greidd skv. eftirfarandi launatöflu frá 1. maí 2005. Bil milli launaflokka er 1,5% og bil milli þrepa er 3,7%.

Mánaðarlaun hækka sem hér segir á samningstímanum:

·              1. maí 2005                  4,24%

·              1. janúar 2006              3,0%

·              1. janúar 2007              3,0%

·              1. janúar 2008              3,0%

Auk þess hækka laun í júní 2006 að meðaltali um ríflega 2% vegna breytinga á tengingu starfsmats í launatöflu. Þetta þýðir að félagar í Verkalýðsfélagi Akraness fá hækkun frá einum upp í þrjá launaflokka sem jafngildir frá 1,5% til 4,5 % en stærsti hópurinn innan félagsins fær 2 launaflokka hækkun eða 3%.

Gildistími

Vert er að benda á að fátítt er að gildistími nýs samnings byrji við enda þess gamla. Gamli samningurinn rann út þann 30. apríl sl. og nýi samningurinn gildir frá 1. maí sl. til 30. nóvember 2008.

Launaþrep og starfsaldur

Launaþrepum fækkar úr sjö í fimm. Skorið var neðan af þrepunum og því fá þeir sem yngri eru meiri hækkun en þeir sem eru eldri. Þeir sem voru á byrjunarlaunum fá 12,1% hækkun, en þeir sem eru í fimmta þrepi frá 4,24% hækkun.

1. þrep: byrjunarlaun

2. þrep: frá 20 ára aldri

3. þrep: frá 25 ára aldri

4. þrep: frá 31 árs aldri

5. þrep: frá 36 ára aldri

Þann 1. júní 2006 tekur eftirfarandi gildi: Eftir 15 ára starf hjá sveitarfélögum skulu starfsmenn fá persónuálag sem nemur 1 stigi sem eru 2%.

 Engir unglingataxtar eru lengur til. Fólk sem er ráðið í tímavinnu, þess vegna 16 og 17 ára, eru ekki lengur í hlutfalli af einhverjum öðrum taxta. Það eru ráðið á byrjunarlaun sem þýðir að um enn meiri hækkun er að ræða fyrir 16 og 17 ára heldur en aðra. Þegar fólk er ráðið í vinnu skal því raðað í þann flokk sem starfsheiti þess segir til um.

Samningur þessi nær ekki til nemenda vinnuskóla sem starfræktir eru á vegum sveitarfélaga. Með vinnuskóla er átt við starfssemi á vegum sveitarfélaga þar sem börnum er gefinn kostur á samspili vinnu, þjálfunar og kennslu í sumarleyfi sínu. Að öðru leyti vísast til 10. kafla laga nr. 46/1980 um aðbúnað, hollustuhætti og öryggi á vinnustöðum og reglugerðar 426/1999 um vinnu barna og unglinga.

Ekki vaktaálag vegna afleysinga

Inner komið ákvæði um að ef fólk er að leysa af og fær borgað skv. tímavinnu skal ekki greitt vaktaálag á þær stundir sem eru utan hefðbundins dagvinnutíma heldur greidd yfirvinna, þ.e. greidd skal dagvinna á dagvinnutímabili og yfirvinna á yfirvinnutímabili.

Desemberuppbót

Um sama hlutfall er að ræða og áður, en hækkar til samræmis við launahækkanir.

·     Desember 2005 kr. 57.989

·     Desember 2006 kr. 59.729

·     Desember 2007 kr. 61.520

·     Desember 2008 kr. 63.366

Orlofsuppbót

Orlofsuppbótin hækkar um helming og skal vera sem hér segir:

·     maí 2005 kr. 21.800,-

·     maí 2006 kr. 22.400,-

·     maí 2007 kr. 23.000,-

·     maí 2008 kr. 23.600,-

Nýtt ákvæði er komið inn um að orlofsuppbótin skuli greidd 1. maí ár hvert, en áður átti að greiða hana í síðasta lagi 15. ágúst.

Ákvæðisvinna við ræstingar

Ákvæðisvinna við ræstingar hækkaði umfram aðra, eða um 5,5% og aukalega mun koma inn 1% hækkun þann 1. janúar 2006.

Einnig kom inn í skilgreiningu á aðalhreingerningu að bónleysing flokkast með sama álagi og aðalhreingerning:

Útköll og aukavinna

Inner komið ákvæði sem segir að þegar um útköll eða aukavinnu er að ræða skal þeirri meginreglu fylgt að þeir starfsmenn skuli kallaðir til starfa sem að jafnaði hafa viðkomandi starf með höndum.

Frí út á Yfirvinnu

Heimilt er starfsmanni, með samkomulagi við vinnuveitanda, að safna allt að 5 frídögum á ári vegna yfirvinnu, á þann hátt að yfirvinnutímar komi til uppsöfnunar en yfirvinnuálagið er greitt við næstu reglulegu útborgun. Frí út á yfirvinnu á að margfalda með stuðlinum 1,8.

Orlof

Réttur til 30 daga orlofs er nú við 38 ára aldur en var 40 ára áður.

Tryggingar

Inn kom nýtt ákvæði varðandi skaðabótakröfu að starfsmaður sem í starfi sínu sinnir einstaklingi sem að takmörkuðu eða jafnvel engu leyti getur borið ábyrgð á gerðum sínum, á rétt á að beina skaðabótakröfu sinni vegna líkams- eða munatjóns að launagreiðanda en ekki að viðkomandi einstaklingi

Verkfæri og fatnaður

Föt sem starfsmönnum er úthlutað, eins og kulda- og regngöllum, skulu nú vera í umsjón viðkomandi starfsmanns, í stað þess að fötum sé útdeild á ákveðinn hóp og þau notuð sameiginlega innan hópsins eins og áður var.

Einnig kom inn ákvæði um að hreinsun á fatnaðinum en ekki náðist að semja um viðbótarfatnað nema í einstaka tilfellum.

Afleysingar

Nýr kafli um afleysingar kom inn í samninginn sem skýrir mjög vel bæði hvernig farið er með mál staðgengla yfirmanns sem vinna sem slíkir allt árið. Einnig er sérákvæði um aðra, sem ekki eru staðgenglar yfirmanns, en leysa af sem slíkir.

Persónustig í stað símenntunarflokka

Hér á ferðinni mesta breytingin frá því sem áður var, því nú koma inn svokölluð persónustig í staðinn fyrir ákvæði um símenntunarflokka. Hætt verður við kerfið sem áður var notað, en með því var mest hægt að fá hækkun um fjóra launaflokka. Uppbygging þess var þannig að þeir sem höfðu aflað sér símenntunar og voru 22 ára fengu hækkun um tvo launaflokka, 28 ára fengu þriðja flokkinn og 36 ára einstaklingur fékk fjórða launaflokkinn.

Nú fá menn stig eftir starfsaldri hjá sveitarfélögunum, sem lítur svona út:

·                                                  1 stig (2%) eftir 1 árs starf hjá sveitarfélögum.

·                                                  Samtals 2 stig (4%) eftir 5 ára starf hjá sveitarfélögum.

·                                                  Samtals 3 stig (6%) eftir 9 ára starf hjá sveitarfélögum.

Þetta gildir eingöngu fyrir nýja starfsmenn. Enginn tapar á þessu vegna þess að gömlu starfsmennirnir halda auðvitað öllu sínu áfram nema þá aðeins að nýja kerfið komi betur út fyrir þá. Breytingin er sú að nú koma prósentur ofaná grunnflokkinn.

Stúdentspróf gefur 2 stig eða 4%

Til viðbótar kemur að einstaklingar fá nú aukastig vegna stúdentsprófs í hvaða starfi sem er. Jafnframt kemur nú til viðbótar að hafi starfsmaður lokið viðurkenndu diplómanámi á háskólastigi tengt starfssviði sínu hækkar persónuálag hans um 2 stig enda sé námið að lágmarki 30 einingar. Hækkun skv. þessari grein á þó einungis við þegar námið er ekki metið í starfsmati eða leiðir til þess að starfsmaður flyst í annað starf. Ófaglærður starfsmaður eða leiðbeinandi sem lokið hefur 45 eininga námi til B.Ed. gráðu í leikskólafræðum skal fá 2 persónuálagsstig. Þegar B.Ed. gráðu er náð falla persónuálagsstigin niður.

Þetta þýðir að 36 ára gamall einstaklingur, sem aldrei hefur unnið hjá sveitarfélagi fer bara í grunnflokkinn og þarf að vinna sig upp í starfsaldri til að ná þessum stigum.

Launað námsleyfi

Mikið hefur breyst hvað varðar launað námsleyfi og er nú í fyrsta sinn orðið sambærilegt við það sem gerst hefur hjá starfsmannafélögunum. Nú er heimilt að veita starfsmanni með sérmenntun, sem starfað hefur skv. þessum samningi samfellt í 5 ár hið skemmsta, launað leyfi til þess að stunda viðurkennt framhaldsnám í sérgrein sinni.

Þá er einnig er heimilt að veita launað leyfi til viðurkennds framhaldsnáms til 3ja mánaða hið lengsta á hverjum 5 árum. Í sérstökum tilvikum er heimilt að veita lengra leyfi sjaldnar eða í allt að 6 mánuði á hverjum 10 árum. Einnig er heimilt að veita starfsmönnum, sem ákvæði þetta tekur til, launað námsleyfi tíðar en að framan greinir, en þó skemur hverju sinni og eigi umfram 1 mánuð á hverjum 20 mánuðum, enda leiði ekki af því aukinn kostnað

Fæðingarorlof

Nú í fyrsta sinn eru félagsmenn okkar komnir til jafns við aðra starfsmenn ríkis og sveitarfélaga hvað varðar rétt í fæðingarorlofi.

Starfsmaður launagreiðanda sem er í fæðingarorlofi nýtur réttinda til greiðslu sumarorlofs, persónu- og orlofsuppbótar. Starfsmaður er áfram í þeim lífeyrissjóði(um) sem hann hefur tilheyrt sem starfsmaður launagreiðanda.

Starfsmaður sem nýtur fyrirframgreiðslu launa skal eiga rétt til fyrirframgreiðslu frá launagreiðanda þann mánuð sem hann hefur töku fæðingarorlofs og fellur sá réttur niður þann mánuð sem hann kemur til baka úr fæðingarorlofi.

Veikindaréttur

Ekkert breyttist í kaflanum um veikindarétt nema ef um vinnuslys er að ræða og fólk er að hætta störfum getur það átt rétt á að taka út veikindarétt sinn þó slysið eigi sér stað t.d. degi áður en viðkomandi lætur af störfum. Sem dæmi er hægt að taka einstakling sem unnið hefur hjá Akureyrarbæ í 18 ár og ætlar að láta af störfum á morgun, en lendir í slysi í vinnunni í dag og er heilt ár að jafna sig. Hann heldur veikindarétti sínum allan tímann.

Starfsmenntasjóður

Inn kom ákvæði um að þann 1. janúar 2007 verði stofnaður fræðslusjóður þeirra stéttarfélaga sem standa að þessum samningi sem á að auka möguleika félagsmenn á að sækja um námsstyrki og jafnframt að fá sveitarfélögin til að auka námsframboð. Þá hækkar framlag sveitarfélaga til starfsmenntunarsjóðs úr 0,40% í 0,72%. Forsenda hækkunarinnar er að þau stéttarfélög sem aðild eiga að kjarasamninginum stofni sameiginlegan starfsmenntunarsjóð undir einni stjórn með jafnri stjórnarþátttöku beggja samningsaðila og að heildarframlög sveitarfélaga renni óskipt í sjóðinn frá 1. janúar 2007.

Lífeyrissjóður – loksins, loksins

Greiðslur í lífeyrissjóð verða nú til jafns við opinbera starfsmenn. Nú þurfa starfsmenn hjá sveitarfélögum ekki lengur að borga 5% í lífeyrissjóð heldur einungis 4% eins og allir aðrir. Þetta þýðir að starfsmenn sem vinna samkvæmt samningi þessum skulu vera aðilar að þeim lífeyrissjóðum sem aðildarfélög SGS eiga aðild að. Starfsmaður greiðir 4% iðgjald af heildarlaunum til lífeyrissjóðs og launagreiðandi með sama hætti 11,5% mótframlag í stað 10,5% eins og það var áður.

Þá er einnig komið inn ákvæði um viðbótarlífeyrissparnað, en í þeim tilvikum sem starfsmaður leggur til viðbótarframlag í séreignarsjóð, greiðir vinnuveitandi framlag á móti allt að 2% gegn 2% framlagi starfsmanns frá og með 1. maí 2005.

Þetta er lokaáfanginn í því sem byrjað var að semja um árið 2001 og er fyrsti samningurinn innan Alþýðusambands Íslands sem nær því að jafna þessa hluti.

Bókanir

Með samningnum fylgja nokkrar bókanir og er vert að benda á tvær þeirra:

Undirbúningstími

Önnur bókunin snýr að starfsmönnum grunn- og leikskóla þar sem inni er komið ákveðnara orðalag en áður var varðandi undirbúningstíma og er eftirfarandi:

Haga skal skipulagi vinnutíma starfsmanna í leikskólum, grunnskólum og öðrum sambærilegum stofnunum þannig að það mótist í samráði viðkomandi stjórnenda og starfsmanna. Í því sambandi skal sértaklega taka tillit til þarfa fyrir undirbúnings- og úrvinnslutíma þegar starfsmönnum eru falin verkefni sem að jafnaði eru á verksviði faglærðra starfsmanna eða telja verður að jafnist á við slík verkefni.

Jafnframt skulu stjórnendur skóla skilgreina viðveruskyldu og verkefni starfsmanna þannig að einstökum starfsmönnum séu þessir þættir ljósir við upphaf hvers skólaárs. Stjórnendur skulu rökstyðja fyrir starfsmönnum áform sín um skipulag vinnutímans og endanlega ákvörðun eftir samráðið. 

Stöðugildi í mötuneytum

Hin bókunin fjallar um módel sem búið er að semja um og varðar stöðugildi í mötuneytum og er eftirfarandi:

Samningsaðilar munu taka saman upplýsingar um viðmiðunarreglur sem mótaðar hafa verið og notaðar af nokkrum rekstraraðilum um mönnun í eldhúsum og mötuneytum stofnana sveitarfélaga, m.t.t. stöðugildafjölda aðstoðarfólks, og koma þeim á framfæri við þá aðila sem ekki hafa fram til þessa ákvarðað mönnun í slíkum starfseiningum á grundvelli þess háttar viðmiðunarreglna. Um er að ræða upplýsingamiðlun með það að markmiði að auðvelda rekstraraðilum skipulagningu starfseminnar í samræmi við aðstæður á hverjum stað þannig að sátt ríki milli starfsmanna og stjórnenda á þessu sviði en ekki samningsbundnar reglur.

Fátt getur komið í veg fyrir að undirritað verði undir nýjan kjarasamning fyrir starfsmenn Klafa á morgun.  Samningsaðilar funduðu í dag og komust að samkomulagi með framkvæmdina á nýja bónuskerfinu.  Það sem verður gert á morgun er að aðilar ætla að lesa saman yfir ný samningstextan.  Komi ekkert óvænt uppá  í þeim yfirlestri þá munu  samningsaðilar skrifa undir nýjan kjarasamning