• Þjóðbraut 1, 300 Akranes
  • Mán - Fim: 8:00 - 16:00, Föstudaga 08:00 - 15:15
Fréttir

Fréttir

Hópuppsögn Eflingar er á ábyrgð lýðræðislega kjörinnar stjórnar félagsins
20
 Apr

Hópuppsögn Eflingar er á ábyrgð lýðræðislega kjörinnar stjórnar félagsins

Eðlilega hefur hópuppsögn á skrifstofu Eflingar vakið upp mikla undrun og gremju víða innan verkalýðshreyfingarinnar.

Enda blasir það við stéttarfélögin vítt og breitt um landið geta ekki stutt hópuppsagnir af þessum toga, enda hefur það verið eitt af baráttumálum stéttarfélaganna að berjast gegn slíkum hópuppsögnum á hinum íslenska vinnumarkaði.

Það er skoðun formanns félagsins að það hafi verið mistök hjá lýðræðis kjörinni stjórn Eflingar að velja hópuppsögn til að ráðast í þær nauðsynlegu skiplagsbreytingar sem þau höfðu boðað í sinni kosningabaráttu. Það er mat formanns að stjórn Eflingar hefði getað náð fram þeim skiplagsbreytingum án þess að grípa til þessara hópuppsagna.

Það hefur vart farið framhjá neinum sem fylgjast með verkalýðsbaráttu að það eru búnar að vera væringar inná skrifstofu Eflingar um allanga hríð og því má segja að það hafi legið í loftinu að gerðar yrðu skiplagsbreytingar á starfsemi skrifstofunnar eins og Baráttulistinn boðaði í sinnu kosningabaráttu. Hins vegar kom það formanni VLFA á óvart að þessi róttæka leið skildi hafa verið farin eins og hópuppsögn

Að því sögðu liggur fyrir að formaður félagsins getur ekki stutt hópuppsagnir á skrifstofu Eflingar eða aðrar hópuppsagnir sem eiga sér stað á íslenskum vinnumarkaði enda ganga hópuppsagnir algerlega gegn hans gildum og baráttu fyrir atvinnuöryggi og lífsafkomu launafólks á íslenskum vinnumarkaði.

Það er alltaf ömurlegt og hræðilegt þegar launafólk missir atvinnuöryggi og lífsviðurværi sitt og ekkert annað hægt að gera en að harma þegar slíkt gerist.

Þessi aðgerð að beita þessu vafasama tæki sem hópuppsögn er liggur alfarið á ábyrgð lýðræðis kjörinnar stjórnar Eflingar og það er hún ein sem ber ábyrgð á þessari ákvörðun. En formaður ítrekar að það er hans bjargfasta skoðun að hér hafi verið gerð mistök enda hefði verið hægt að ná fram þeim skipulagsbreytingum sem stjórn taldi nauðsynlegar án hópuppsagna.

Í öll þau skipti sem uppsagnir eiga sér stað og er sama hvort það eru hóp- eða einstaklingsuppsagnir þá er það skilda stéttarfélaga að standa vörð um réttindi sinna félagsmanna og tryggja að farið sé í hvívetna eftir lögum, reglum og að kjarasamningsbundin réttindi séu virt.

Þetta mál er allt hið ömurlegasta og vonast formaður til þess að allir starfsmenn sæki aftur um starf og eins margir og kostur er fái endurráðningu. En eins og staðan er í dag veit enginn hvort allir verði endurráðnir eða enginn og því erfitt að vera að fabúlera um hvað muni gerast þegar ekkert liggur fyrir í þeim efnum þessa stundina.

Til að svara spurningunni aftur um hvort formaður styðji þessa hópuppsögn hjá Eflingu, þá er stutta svarið að sjálfsögðu, nei, ekkert frekar en aðrar hópuppsagnir sem eru á íslenskum vinnumarkaði og vill formaður ítreka að hans mat er að hægt hefði verið að ná fram skipulagsbreytingum með öðrum hætti en hópuppsögn.

Þessari skoðun vill formaður koma á framfæri því sumar fyrirsagnir í fjölmiðlum hafa ekki verið í samræmi við það sem formaður hefur sagt. Formaður VLFA ber svo sannarlega traust til Sóveigar Önnu hvað baráttu fyrir kjörum þeirra sem höllustum fæti standa en með því er hann ekki að styðja þessar hópuppsagnir og hann er ekki að taka upp hanskann hvað þessar hópuppsagnir varðar.  En hann tekur hanskann upp fyrir henni sem öfluga baráttukonu fyrir að standa vörð um þá sem höllustum fæti standa á íslenskum vinnumarkaði.

Formaður hefur einnig sagt í fjölmiðlum að hann og Sólveig Anna séu alls ekkert alltaf sammála en eitt eru þau algjörlega sammála um og það er það sem lýtur að því að tryggja að lágmarkslaun á íslenskum vinnumarkaði dugi fyrir nauðþurftum frá mánuði til mánaðar og lágtekjufólk geti haldið mannlegri reisn. Þar er formaður VLFA og formaður Eflingar algerir samherjar og er það formanni til efs að til sé meiri hugsjónarmanneskja en Sólveig Anna þegar kemur að því að berjast fyrir kjörum þeirra sem höllustum fæti standa í íslensku samfélagi.

Þetta er staðreynd sem ekki er hægt að véfengja enda talar barátta og árangur Sólveigar Önnu hvað það varðar algerlaga fyrir sig.

Hagvaxtarauki tók gildi 1. apríl sl.
06
 Apr

Hagvaxtarauki tók gildi 1. apríl sl.

Samið var í síðustu kjarasamningum, í fyrsta skipti, um viðauka sem tæki mið af stöðu hagkerfisins. Með þessu móti myndi launafólk fá fasta krónutölu í launahækkun á mánaðarlaun sín ef ákveðin hagvaxtarauki næðist. Til þess að hagvaxtaraukinn virkist þurfti hagvöxtur á mann að verða meiri en 1%. Fyrir árið 2021 hækkaði hagvöxtur á mann um 2,53% milli ára. Þar með var félagsfólki sem tekur laun eftir kjarasamningum SGS tryggð hækkun á mánaðarlaunataxta um 10.500 kr. og hækkun á almenn laun um 7.875 kr. á mánuði skv. kjarasamningi.

Samið var um að hækkunin kæmi til greiðslu 1. maí og því hækka taxtar og mánaðarlaun frá 1. apríl.

Rétt er að geta þess að þessi 10.500 kr. hækkun er til viðbótar þeim taxtahækkunum samkvæmt kjarasamningum Starfsgreinasambands Íslands við Samtök atvinnulífsins, Samband íslenskra sveitafélag og ríkið sem hækkuðu taxtar um 25 þús. kr. 1. Janúar 2022 en almenn hækkun var 17.250 kr.

Hér er er hægt að sjá uppfærða launataxta 

Formaður VLFA kosinn formaður Starfsgreinasambands Íslands
26
 Mar

Formaður VLFA kosinn formaður Starfsgreinasambands Íslands

Í gær á þingi SGS var Vilhjálmur Birgisson formaður Verkalýðsfélags Akraness kosinn formaður Starfsgreinasambands Íslands en rétt er að geta þess að SGS er fjölmennasta landssamband verkafólks á Íslandi og stærsta landssambandið innan ASÍ með samtals um 72 þúsund félagsmenn.

Kosið var á milli hans og Þórarins Sverrissonar formanns stéttarfélags Öldunnar í Skagafirði. Vilhjálmur fékk 54% atkvæða og kom fram í ræðu hans eftir að kjörinu hafi verið lýst að hann væri djúp snortinn yfir þessum stuðningi og traust sem þingfulltrúar SGS hefðu sýnt honum við að gegna þessu krefjandi verkefni sem er að gegna forystu SGS.

Vilhjálmur fór yfir í ræðu sinni um hvaða mál hann hefur lagt mestu áherslu á, á undanförnum árum en þau hafa m.a. verið eftirfarandi:

En hver eru helstu áherslumálin mín sem forystumaður í verkalýðshreyfingunni á liðnum 17 árum?

Jú, þau hafa verið eftirfarandi:

  • Ég hef ætíð lagt ofuráherslu á að samið sé í formi krónutöluhækkana, enda liggur fyrir að prósentuhækkanir eru aflgjafi misskiptingar, óréttlætis og gera ekkert annað en að auka ójöfnuð á íslenskum vinnumarkaði.
  • Það þarf að tryggja réttarstöðu launafólks gagnvart grófum kjarasamningsbrotum með skýrum févítis ákvæðum í lögum og/eða í kjarasamningum. Einnig er brýnt að tryggja að launafólk tapi ekki launakröfum sínum á grundvelli „tómlætis“ fyrir dómstólum.
  • Það þarf að berjast áfram gegn okurvöxtum, verðtryggingu og græðgisvæðingu fjármálakerfisins.
  • Það þarf að styrkja húsnæðismarkaðinn og stöðu leigjenda m.a. með því að setja á leiguþak.
  • Það þarf að endurskoða lífeyrissjóðskerfið þar sem hagsmunir sjóðsfélaga verði hafðir að leiðarljósi og tryggja þarf að lífeyrissjóðirnir komi að þjóðarátaki í uppbyggingu á húsnæði fyrir tekjulágt fólk á íslenskum húsnæðismarkaði.
  • Það er einnig mikilvægt að halda áfram að létta á skattbyrði þeirra tekjulægstu.
  • Taka þarf á arðsemisgræðgi fyrirtækja enda eru það á endanum launafólk og neytendur sem þurfa að greiða fyrir arðsemismarkmið fyrirtækja í formi hærra vöruverðs og lægra kaupgjalds.
  • Síðast en ekki síst hef ég ætíð barist gegn öllum hugmyndum um að komið verði á nýju vinnumarkaðsmódeli í anda Salek samkomulagsins, enda gengur það út á að skerða og takmarka samnings- og verkfallsrétt launafólks. Mikilvægt er fyrir launafólk að muna að samningsfrelsi og verkfallsréttur launafólks er hornsteinninn í íslenskri verkalýðshreyfingu og þann rétt þarf að verja með öllum tiltækum ráðum.

Í lok ræðurnar sem kom að við verðum að halda áfram að stíga þétt og kröftug skref í baráttunni fyrir bætum kjörum verkafólks. Það er hins vegar mikilvægt að allt verkafólk átti sig á því að réttinda- og kjarabarátta er eilífðarverkefni sem lýkur aldrei, hvorki í komandi kjarasamningum eða í kjarasamningum framtíðarinnar

Það er hins vegar ekkert náttúrulögmál að lágmarkslaun dugi ekki fyrir nauðþurftum frá mánuði til mánaðar, eða að hér viðgangist okurvextir, okurleiga, húsnæðisskortur og hátt vöruverð á öllum sviðum. 

Nei, ekkert af þessu er náttúrulögmál heldur mannanna verk sem hægt er að breyta. Það eina sem þarf er kjarkur, vilji og þor!

Verkalýðsfélag Akraness veitir úkraínsku flóttafólki neyðaraðstoð
10
 Mar

Verkalýðsfélag Akraness veitir úkraínsku flóttafólki neyðaraðstoð

Stjórn Verkalýðsfélags Akraness fordæmir innrás Rússlands í frjálst og fullvalda ríki Úkraínu sem er skýrt brot á alþjóðalögum og við styðjum allar friðsamlegar aðgerðir sem bundið geta enda á stríðið.

Stjórn Verkalýðsfélag Akraness telur á grundvelli mannúðarsjónarmiða að félaginu sé skylt að bregðast við og aðstoða flóttafólk sem hingað kemur vegna stríðsástandsins sem nú geisar í þeirra landi. Stjórn VLFA hefur því ákveðið að leggja sitt lóð á vogarskálarnar við móttöku úkraínsk flóttafólks til Íslands með fjárstuðningi og með því að lána tímabundið sumarhús sitt í Ölfusborgum í þetta brýna verkefni.

Auk þessa mun félagið styrkja hjálparstarf vegna flóttafólksins frá Úkraínu um eina evru fyrir hvern félagsmann eða um 500.000 kr.

Stjórn VLFA skorar jafnframt á önnur stéttarfélög hér á landi að leggja sín sumarhús t.d. í Ölfusborgum fram í þetta mannúðarverkefni En í Ölfusborgum eru 38 heilsárs sumarhús fullbúin og klár til notkunar ef þörf er á.

Það er mat stjórnar VLFA að mikilvægt sé að verkalýðshreyfingin sé samstíga í að bjóða fram þessa aðstoð, en með samstilltu átaki stéttarfélaga í Ölfusborgum væri hægt að skapa 38 fjölskyldum eða um 190 manns húsaskjól. Stjórn VLFA er sannfært um að það væri líka styrkur og stuðningur fyrir þetta fólk að vera allt saman á sama stað, enda getum við vart sett okkur í spor þessa fólks.

Á grundvelli mannúðar og manngæsku eigum við í verkalýðshreyfingunni að bjóða m.a. fram þennan möguleika að lána byggðina í Ölfusborgum til að hjálpa þessu fólki sem er að takast á við hörmungar sem ekkert okkar getur ímyndað sér, en eins og fram hefur komið í fréttum er flóttafólk frá Úkraínu að meirihluta konur og börn.

Samþykkt af stjórn Verkalýðsfélags Akraness 9. mars 2022.

Formaður VLFA býður sig fram til formennsku í Starfsgreinasambandi Íslands
02
 Mar

Formaður VLFA býður sig fram til formennsku í Starfsgreinasambandi Íslands

Þing Starfsgreinasambands Íslands verður haldið daganna 23. til 25. mars 2022 á Akureyri og á þessu þingi verður m.a. kosið til formanns, varaformanns og í framkvæmdastjórn SGS.

 

Að undanförnu hefur hópur formanna innan SGS og fulltrúa sem munu sitja þingið haft samband við mig og skorað á mig að bjóða mig fram til formanns SGS.

 

Í ljósi þessarar áskorunnar og einnig í ljósi þess að Björn Snæbjörnsson núverandi formaður SGS hefur ákveðið að bjóða sig ekki fram hef ég tekið ákvörðun um að bjóða mig fram sem formann Starfsgreinasambands Íslands á komandi þingi SGS.

 

Það liggur fyrir að Starfsgreinasamband Íslands gegnir lykilhlutverki þegar kemur að því að semja um kaup og kjör fyrir verka-og láglaunafólk á íslenskum vinnumarkaði og því skiptir máli að æðsta forysta sambandsins hafi ætíð kjark, vilja og þor til að berjast af alefli fyrir bættum kjörum verka-og láglaunafólki á íslenskum vinnumarkaði.  Rétt er að geta þess að Starfsgreinasamband Íslands er fjölmennasta landsamband verkafólks á Íslandi og stærsta landsambandið innan ASÍ með samtals um 72.000 þúsund félagsmenn.

 

Ég tel mig hafa víðtæka reynslu og þekkingu hvað verkalýðsbaráttu áhræir og vera því rétti aðilinn til að takast á við það verkefni sem er að gegna stöðu formanns SGS. 

 

Áherslumál mín sem forystumaður í verkalýðshreyfingunni á liðnum 17 árum hafa m.a. verið þessi:

  • •             Ég hef ætíð lagt ofuráherslu að samið sé í formi krónutöluhækkanna, enda liggur fyrir að prósentuhækkanir eru aflgjafi misskiptingar, óréttlætis og gerir ekkert annað en auka á ójöfnuð á íslenskum vinnumarkaði.
  • •             Hef barist gegn öllum hugmyndum að komið verði á nýju vinnumarkaðsmódeli í anda Salek samkomulagsins enda gengur það út á að skerða og takmarka samnings- og verkfallsrétt launafólks.  Mikilvægt fyrir launafólk að muna að samningsfrelsi og verkfallsréttur launafólks er hornsteinninn í íslenskri verkalýðshreyfingu og þann rétt þarf að verja með öllum tiltækum ráðum.
  • •             Tryggja þarf réttarstöðu launafólks gagnvart grófum kjarasamningsbrotum með skýrum févítis ákvæðum í lögum sem og tryggja að launafólk tapi ekki launakröfum sínum á grundvelli „tómlætis“ fyrir dómstólum.
  • •             Berjast þarf áfram gegn okurvöxtum, verðtryggingu og græðgisvæðingu fjármálakerfisins
  • •             Styrkja húsnæðismarkaðinn og stöðu leigjenda m.a. með því að setja leiguþak
  • •             Enduskoða lífeyrissjóðskerfið þar sem hagsmunir sjóðsfélaga verði hafðir að leiðarljósi
  • •             Létta á skattbyrði þeirra tekjulægstu
  • •             Taka þarf á arðsemisgræðgi fyrirtækja enda eru það á endanum launafólk og neytendur sem þurfa að greiða fyrir arðsemismarkmið fyrirtækja í formi hærra vöruverðs og lægra kaupgjalds.

Þetta eru nokkur atriði sem ég hef barist fyrir á liðnum árum og tel brýnt að halda áfram og fái ég stuðning þingfulltrúa í kjöri til formanns í SGS mun það klárlega hjálpa til í þeirri baráttu.

 

Það er rétt að geta þess að allar kjararannsóknir sýna að í Lífskjarasamningum var stigið skref í átt að því lagfæra kjör lágtekjufólks, en þau skref þurfa svo sannarlega að verða fleiri og kröftugri á næstu misserum.  Enda er það lýðheilsumál að lágmarkslaun dugi frá mánuði til mánaðar og lágtekjufólk geti haldið mannlegri reisn á launum sínum en þvi miður er því ekki til að dreifa eins og staðan er í dag. 

 

Það er ekkert náttúrulögmál að lágmarkslaun dugi ekki fyrir nauðþurftum frá mánuði til mánaðar, eða hér viðgangist okurvextir, okurleiga, húsnæðisskortur, og hátt vöruverð á öllum sviðum.  Nei, ekkert af þessu er náttúrulögmál heldur mannanna verk sem hægt er að breyta eina sem þarf er kjarkur, vilji og þor!

 

Það er hins vegar mikilvægt að allt verka- og láglaunafólk átti sig á því að réttinda- og kjarabarátta er eilífðarverkefni sem lýkur aldrei!

 

Það er rétt að taka það fram að formennska í SGS hefur ætíð verið hlutastarf og hefur því ekki áhrif á starf mitt sem formaður í Verkalýðsfélagi Akraness enda fer vinna við að vera formaður stéttarfélags og formanns SGS mjög vel saman.   Það hefur ætíð tíðkast að formaður frá einu af aðildarfélögum SGS hefur gengt þessu starfi samhliða starfi sínu hjá sínu stéttarfélagi.

                                                                                                                                                

Búið að opna fyrir umsóknir í orlofshús
01
 Mar

Búið að opna fyrir umsóknir í orlofshús

Nú höfum við opnað fyrir umsóknir í sumarúthlutun orlofshúsa félagsins.  Umsóknartímabilið er alveg extra langt eða frá 1.-31. mars og úthlutun fer fram þann 4. apríl.

Félagið er með bústaði í Húsafelli, við Hótel Gym,  í Svínadal, Kambshólslandi, Kjósinni, Ölfusborgum, Hraunborgum, Vestmannaeyjum, Akureyri og einnig erum við með eina íbúð á  Torrevieja svæðinu á Spáni.  Alls 14 orlofs-hús/íbúðir.

Úthlutun fer þannig fram að allar umsóknir eru skráðar inn í tölvukerfi félagsins. Kerfið raðar öllum umsóknum í röð eftir punktastöðu, þ.e. þeir umsækjendur sem flesta hafa punktana eru fremstir í röðinni og svo koll af kolli. Ef punktar tveggja eru jafnir fær sá eldri úthlutað. Kerfið vinnur sig síðan í gegnum umsóknirnar og úthlutar vikum eftir punktastöðu.

Þeir sem ekki fá úthlutað í fyrri úthlutun lenda sjálfkrafa í endurúthlutun þar sem þeim vikum er úthlutað sem ekki voru greiddar á eindaga fyrri úthlutunar. Fyrir endurúthlutun er heimilt að breyta umsóknum og leggja inn nýjar. Eftir eindaga endurúthlutunar verða lausar vikur auglýstar hér á heimasíðunni og hægt verður að bóka þær á Félagavefnum og á skrifstofu félagsins. Gildir þá hin ágæta regla: Fyrstur kemur, fyrstur fær.

Hér eru helstu dagssetningarnar varðandi  umsóknir og úthlutanir: 

31. mars - Frestur til að skila inn umsóknum um orlofshús

04.apríl - Fyrri úthlutun fer fram, allir umsækjendur fá svarbréf í pósti (einnig er hægt að sjá strax hvort bókun hafi myndast inni á Félagavefnum)

12. apríl  - Eindagi fyrri úthlutunar, þeim vikum sem ekki eru greiddar á eindaga er úthlutað aftur

13.apríl  - Endurúthlutun fer fram, þeir sem fá úthlutað fá það staðfest með bréfi

 - Kl. 12:00 - Fyrstir koma, fyrstir fá! Þeir sem fyrstir koma geta bókað lausar vikur, líka á Félagavefnum (athugið að eftir eindaga endurúthlutunar getur lausum vikum fjölgað)

25.apríl - Eindagi endurúthlutunar, ógreiddar vikur verða lausar til bókunar á Félagavefnum.

 

Hér er svo hægt að nálgast bækling  og umsóknareyðublöð fyrir þá sem ekki vilja nýta sér rafrænar umsóknir.

Einnig liggur þetta frammi á skrifstofunni hjá okkur á Þjóðbraut 1. 

Tómas Rúnar stjórnarmaður í VLFA látinn
24
 Feb

Tómas Rúnar stjórnarmaður í VLFA látinn

Í gær barst mér sem formanni Verkalýðsfélags Akraness tilkynning um að Tómas Rúnar Andrésson stjórnarmaður í Verkalýðsfélagi Akraness hefði orðið bráðkvaddur í gær. Tómas var fæddur árið 1959 og hefði því orðið 63 ára þann 5. maí nk.

Tommi Rúnar eins hann var ætíð kallaður hafði gengt stöðu stjórnarmanns í Verkalýðsfélags Akraness um langt skeið, enda mikill áhugamaður um verkalýðsbaráttu. Tommi starfaði hér á árum áður lengi vel til sjós einnig var hann nokkur á hjá Norðurál. En á síðustu árum hefur hann starfað sem hópferðabílstjóri og hjá Akraneskaupstað.

Ég vil fyrir hönd Verkalýðsfélags Akraness þakka Tomma kærlega fyrir sitt framlag í þágu félagsins og sendi um leið ættingjum og vinum okkar innilegustu samúðarkveðjur.

Sólveig Anna Jónsdóttir kjörinn formaður Eflingar!
16
 Feb

Sólveig Anna Jónsdóttir kjörinn formaður Eflingar!

Formaður vil byrja á því að óska Sólveigu Önnu Jónsdóttur og hennar fólki á Baráttulistanum innilega til hamingju með glæsilegan sigur og það þrátt fyrir að þessi kosningabarátta hafi verið ein sú hatramasta og ógeðfelldasta sem sést hefur í kosningum á Íslandi fyrr og síðar.

Það er ljóst í huga formanns að þessar kosningar munu klárlega hafa einnig áhrif á framtíðarstefnu ASÍ og Starfsgreinasamband Íslands enda byggist valdahlutföll inná þingum ASÍ og SGS á svokölluðu fulltrúalýðræði.

Allir sem hafa fylgst með verkalýðsbaráttunni á liðnum vikum sjá og heyra að það er klofningur í verkalýðshreyfingunni og þessi sigur Sólveigar mun að mínum dómi gera það að verkum að umtalsverðar breytingar munu eiga sér stað á æðstu forystu bæði innan Alþýðusambands Íslands og Starfsgreinasambands Íslands.

Það liggur fyrir að Efling, VR, Verkalýðsfélag Akraness, Grindavíkur og Framsýn unnu þétt saman við gerð lífskjarasamningsins árið 2019 og er það óumdeilt skv. öllum kjararannsóknum að sá kjarasamningur skilaði launafólki góðri niðurstöðu. Vissulega má alltaf gera betur enda lýkur réttindabaráttu launafólks aldrei.

Það er einnig ljóst að þessi félög og ugglaust fleiri munu þétta raðir sínar enda mynda þau meirihluta innan ASÍ og SGS. Þessar kosningar í Eflingu munu að mínu mati leiða til þess að það verður ekki látið átölulaust að áhrif þessa meirihlutahóps endurspegli ekki að einhverju leyti stefnu og markmið og æðstu forystu ASÍ og SGS. 

Rétt skal vera rétt
15
 Feb

Rétt skal vera rétt

Það var nú undarleg sögufölsun sem kom fram í pistli frá Gunnari Karli starfsmanni stéttarfélags Bárunnar á Selfossi á Vísi í fyrir stuttu þar sem hann fjallaði að stærstum hluta um formannskosningarnar í Eflingu.

En í þessum pistli er því haldið ranglega fram að kjarasamningurinn frá 2015 hafi skilað verkafólki meiri ávinningi en lífskjarasamningurinn sem undirritaður var 2019.

Það er grátbroslegt að sjá skuggastjórnendur verkalýðshreyfingarinnar sem félagi Ragnar Þór talaði um í pistli sínum í gær væla eins og stungnir grísir yfir því að nokkuð vel hafi tekist til við gerð lífskjarasamningsins sem leiddur var undir forystu Eflingar, VR og Verkalýðsfélags Akraness.

Svona sögufölsun eins og sést hjá Gunnari Karli er til þess eins að reyna að telja launafólki trú um að kjarasamningurinn frá 2015 hafi skilað meiri ávinningi fyrir verkafólk en lífskjarasamningurinn. Öll svona afbökun á sannleikanum er til þess fallin að reyna að hafa áhrif á formannskosningar í Eflingu.

Það er ekki bara að lífskjarasamningurinn hafi skilað umtalsvert fleiri krónum í launaumslag verkafólks heldur fylgdi með aðgerðapakki frá stjórnvöldum sem var kostnaðarmetinn af stjórnvöldum upp á 80 milljarða til að styðja við lífskjarasamninginn.

Okkur tókst í lífskjarasamningum að til dæmis lækka skattbyrði lágtekjufólks með samkomulagi við stjórnvöld og skilaði sú skattalækkun ein og sér tæplega 12.000 krónum til lágtekjufólks. Þetta er hægt að sjá með nákvæmum hætti á reiknivél um staðgreiðslu hjá ríkisskattstjóra.

Samhliða lífskjarasamningum funduðum við líka með Seðlabankanum þar sem lögð var ofuráhersla á að skapa forsendur fyrir Seðlabankann til að lækka stýrivexti bankans, og það tókst. Það var meira að segja skrifað í forsendur lífskjarasamningsins að ef stýrivextir Seðlabankans myndu ekki lækka um 2% yrði lífskjarasamningurinn uppsegjanlegur.

En skoðum þessa ótrúlega röngu staðhæfingu um að kjarasamningurinn frá 2015 hafi skilað meiri ávinningi fyrir verkafólk en lífskjarasamningurinn. Algengasti launaflokkur verkafólks er lfl. 7 en hann hækkaði úr 211.211 kr. árið 2014 í 272.261 kr. á samningstímanum eða sem nemur 61.050 kr. nánar tiltekið 29%.

Þessi sami launaflokkur nr. 7 hækkaði hinsvegar í lífskjarasamningum úr 272.261. í 362.261 kr. og stendur í þeirri upphæð í dag. Semsagt hækkaði um 90.000 kr. á samningstímanum eða sem nemur 33%.

Þessu til viðbótar liggur fyrir að við sömdum líka um svokallaðan hagvaxtarauka og mun hagvaxtaraukinn sem samið var um í lífskjarasamningnum virkjast á þessu ári. Afar líklegt er að hann muni skila launafólki 13.000 kr. sem koma þá til hækkunar 1. maí á þessu ári. Ef það raungerist sem afar miklar líkur eru á miðað við stöðuna eins og hún er í dag þá hafa launataxtar verkafólks hækkað um 103.000 kr.

Að halda því fram að samningurinn 2015 hafi skilað verkafólki meiru er ótrúlegt þegar liggur fyrir að launataxtar hækkuðu um 61.050 kr. á samningstímanum 2015 en að öllum líkindum 103.000 í lífskjarasamningnum. Þetta þýðir að lífskjarasamningurinn skilar 38% launahækkun en samningurinn 2015 29%. Því til viðbótar er 80 milljarða aðgerðapakki sem fylgdi með lífskjarasamningnum þar sem skattalækkun upp á 12.000 kr. er m.a. hluti af.

Vaxtalækkun

En aðalkjarabótin fyrir verkafólk og íslensk heimili liggur í lækkun vaxta eins og var eitt af stóru markmiðum lífskjarasamningsins og það tókst en fyrir lífskjarasamninginn voru stýrivextir 4,25% og fóru lægst niður í 0,75% þótt vissulega hafi þeir hækkað að nýju og standi núna í 2,75%

En skoðum vextina sem heimilunum var boðið upp á árið 2015 en óverðtryggðir vextir voru þá 7,25% en eru í dag 4,20%. Verðtryggðir vextir voru 3,65% en eru í dag 1,9%.

Þessi vaxtamunur á 35 milljóna húsnæðisláni þýðir að greiðslubyrði hefur lækkað miðað við vextina 2015 um 90.000 á mánuði eða 1,1 milljón á ársgrundvelli. Af verðtryggðu láni að sömu fjárhæð er lækkun á greiðslubyrði 50.000 kr. á mánuði eða 600.000 á ársgrundvelli.

Það er sorglegt þegar aðilar innan verkalýðshreyfingarinnar vilja ekki viðurkenna að lífskjarasamningurinn undir forystu Verkalýðsfélags Akraness, Grindavíkur ,Eflingar  VR og Framsýnar hafi ekki skilað afar góðum árangri þótt alltaf megi gera betur enda lýkur kjarabaráttu launafólks aldrei.

Það er rétt hjá félaga Ragnari Þór að hatrið og níðið í garð þeirra sem hafa gagnrýnt stefnur og markmið ASÍ á liðnum árum og áratugum er grímulaust.

Allir sem þekkja til innan verkalýðshreyfingarinnar vita hvernig fulltrúalýðræðið virkar inni á þingum ASÍ og innan landssambanda ASÍ. Því má klárlega segja að það sé ekkert verið að kjósa eingöngu um forystu í Eflingu heldur hefur sú kosning áhrif á fulltrúalýðræðið inni á þingum ASÍ og SGS.

Það má segja að kosningar í Eflingu, sem er næststærsta stéttarfélag landsins, muni hafa áhrif á stefnu og markmið verkalýðshreyfingarinnar í heild sinni og nú sé kannski að renna upp sá dagur að loksins verði lokauppgjör innan verkalýðshreyfingarinnar.

En rétt skal vera rétt og ég vísa svona sögufölsun á bug sérstaklega þegar verið er að reyna að hafa áhrif á formannskjör í Eflingu með slíku bulli!

Búið að greiða úr félagsmannasjóðnum
01
 Feb

Búið að greiða úr félagsmannasjóðnum

Í dag fengu 582 félagsmenn Verkalýðsfélags Akraness sem starfa hjá Akraneskaupstað, Hvalfjarðasveit og Hjúkrunar-og dvalarheimilinu Höfða greitt út úr Félagsmannasjóði sem samið var um í síðustu samningum. Heildarupphæðin sem greidd var úr sjóðunum nam 24.064.323

Rétt er að vekja athygli að allir félagsmenn fengu bréf sent heim fyrir nokkrum dögum þar sem upphæð greiðslu hvers og eins var getið.

Page 8 of 207

Fréttir

Nýjar fréttir

Verkalýðsfélag Akraness

Verkalýðsfélag Akraness
Kt. 680269-6889

Til skrifstofunnar geta félagsmenn leitað eftir
upplýsingum og annarri aðstoð.

  • Þjóðbraut 1,

    300 Akranes

  • Sími:

    4309900

  • Netfang:

    skrifstofa@vlfa.is

Afgreiðslutími

Mánudag-fimmtudag kl. 08:00-16:00 og föstudaga kl. 8:00-15:15. Utan afgreiðslutíma félagsins er hægt að ná í formann félagsins, Vilhjálm Birgisson, í síma 865-1294.

Nýjar fréttir

Style Switcher
Layout Style
Predefined Colors
Background Image